ທ່ານສີຈິ້ນຜິງ ກ່າວຄຳໄດ້ດີຫຼາຍໃນເວລາເຂົ້າຮ່ວມກອງປະຊຸມສົນທະນາ “ວາລະດາວອສ໌”
ຕອນຄໍ່າວັນທີ 25 ມັງກອນນີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມສົນທະນາ “ວາລະດາວອສ໌” ຂອງເວທີປຶກສາຫາລືເສດຖະກິດໂລກຜ່ານທາງວີດີໂອແລະກ່າວຄຳປາໄສພິເສດຢູ່ນະຄອນຫຼວງປັກກິ່ງ. ໂດຍເປັນເລື່ອງທີ່ບໍ່ໄດ້ຢູ່ເໜືອຄວາມຄາດຄິດ, ທ່ານສີຈິ້ນຜິງ ມີຄຳເວົ້າທີ່ດີມີຄວາມໝາຍທີ່ເລິກເຊິ່ງບໍ່ໜ້ອຍໃນໂອກາດກ່າວປາໄສຄັ້ງນີ້.
ປະຊາຄົມໂລກໄດ້ເອົາໃຈໃສ່ຢ່າງສູງຕໍ່ຄຳປາໄສພິເສດຂອງທ່ານສີຈິ້ນຜິງຄັ້ງນີ້, ຍ້ອນວ່າຄຳປາໄສໄດ້ກ່ຽວພັນເຖິງສະພາບການດ້ານເສດຖະກິດຂອງໂລກໃນປັດຈຸບັນຢ່າງໃກ້ຊິດ. ດ້ານໜຶ່ງ, ມວນມະນຸດໄດ້ຜະເຊີນກັບສິ່ງທ້າທາຍຕ່າງໆເຊັ່ນ: ພະຍາດໂຄວິດ-19 ໄດ້ແຜ່ລະບາດໃນທົ່ວໂລກຢ່າງໜັກໜ່ວງ, ເສດຖະກິດໂລກຊຸດໂຊມລົງຢ່າງໜັກໜ່ວງແລະອື່ນໆ, ມະນຸດເຮົາໄດ້ຢືນຢູ່ທາງແຍກທີ່ຕ້ອງເລືອກເດີນທາງອີກຄັ້ງໜຶ່ງ. ອີກດ້ານໜຶ່ງ, ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19 ທີ່ບໍ່ເຄີຍພົບເຫັນໃນຮອບຮ້ອຍປີຜ່ານມາ, ຈີນບໍ່ພຽງແຕ່ສາມາດຄວບຄຸມການແຜ່ລະບາດຂອງພະຍາດຢ່າງມີປະສິດທິຜົນເທົ່ານັ້ນ, ຍັງສາມາດບັນລຸການຟື້ນຟູການຜະລິດແລະສາມາດພິກຈັງຫວະການເຕີບໂຕຂອງເສດຖະກິດຈາກຕົວເລກລົບເປັນຕົວເລກບວກ, ກາຍເປັນ “ແສງສະຫວ່າງທີ່ອົບອະນໃນລະດູໜາວ” ໃຫ້ກັບເສດຖະກິດໂລກ. ກໍຄືດັ່ງຄຳເວົ້າຂອງທ່ານສີຈິ້ນຜິງໃນຄຳປາໄສພິເສດເທື່ອນີ້ວ່າ: “ລະດູໜາວທີ່ໜາວຈັດບໍ່ສາມາດກີດຂວາງບາດກ້າວຂອງລະດູບານໃໝ່ໄດ້, ຄວາມມືດຂອງກາງຄືນບໍ່ສາມາດປິດບັງແສງສະຫວ່າງຂອງອາລຸນວັນໃໝ່ໄດ້.”
ຈີນເປັນປະເທດພຽງໜຶ່ງດຽວໃນໂລກທີ່ເສດຖະກິດເຕີບໂຕເປັນເລກບວກ, ລວມຍອດຜະລິດຕະພັນພາຍໃນຫຼື GDP ບັນລຸຫຼາຍກວ່າ 1 ແສນຕື້ຢວນເປັນຄັ້ງທຳອິດ, ພາລະກິດລຶບລ້າງຄວາມທຸກຍາກໄດ້ສຳເລັດຜົນຢ່າງຈົບງາມ, ຍານອະວະກາດ “ສາງເອີ 5” ເດີນທາງສຳຫຼວດດວງຈັນຢ່າງສຳເລັດຜົນ…ຜົນງານຕ່າງໆທີ່ຈີນປະສົບຜົນສຳເລັດໃນປີ 2020 ໄດ້ປະຈັກຕາຕໍ່ຄົນທັງຫຼາຍ. ເພາະວ່າ, ໃນປີ 2020 ເຊິ່ງເປັນປີທີ່ເຕັມໄປດ້ວຍຄວາມຫຍຸ້ງຍາກແລະສິ່ງທ້າທາຍນັ້ນຈີນພັດປະສົບຜົນສຳເລັດດັ່ງທີ່ກ່າວມານັ້ນຈຶ່ງເປັນເລື່ອງທີ່ຫາຍາກແທ້ໆ.
ກ່ອນນີ້ 4 ປີ, ໃນກອງປະຊຸມປະຈຳປີ 2017 ຂອງເວທີປຶກສາຫາລືເສດຖະກິດໂລກ, ທ່ານສີຈິ້ນຜິງ ກໍເຄີຍໄດ້ກ່າວເນັ້ນໜັກວ່າ: ຄວນຊຸກຍູ້ເສດຖະກິດໂລກາພິວັດຢ່າງເດັດດ່ຽວໜຽວແໜ້ນບໍ່ປ່ຽນແປງ, ສ້າງສະຕິປະຊາຄົມຮ່ວມຊາຕາກຳຂອງມວນມະນຸດຢ່າງໝັ້ນທ່ຽງ. ໃນໄລຍະ 4 ປີຜ່ານມາ, ໃນເຫດການສຳຄັນໃນເວທີສາກົນຫຼາຍແຫ່ງ, ທ່ານສີຈິ້ນຜິງ ກໍໄດ້ສະເໜີຄວາມຄິດເຫັນຢ່າງເລິກເຊິ່ງຂອງຕົນກ່ຽວກັບການພັດທະນາເສດຖະກິດຈີນກໍຄືເສດຖະກິດຂອງໂລກ. “ບັນຫາທີ່ມີລັກສະນະທົ່ວໂລກທີ່ມະນຸດພວກເຮົາຜະເຊີນໜ້ານັ້ນ, ບໍ່ມີປະເທດໃດໃນໂລກນີ້ຈະສາມາດແກ້ໄຂໄດ້ພຽງລຳພັງແຕ່ປະເທດດຽວ, ຕ້ອງດຳເນີນການປະຕິບັດງານທົ່ວໂລກ, ທົ່ວໂລກຮັບມືຮ່ວມກັນແລະທົ່ວໂລກຮັບມືຮ່ວມກັນ.” “ໃຫ້ທວນໄຟຂອງລັດທິຫຼາຍຝ່າຍເປັນແສງສະຫວ່າງເຍືອງທາງໃຫ້ມວນມະນຸດກ້າວເດີນໄປໜ້າ, ແລະກ້າວເດີນໄປສູ່ການສ້າງປະຊາຄົມຮ່ວມຊາຕາກຳຂອງມວນມະນຸດຢ່າງບໍ່ຢຸດຢັ້ງ!”
ການພັດທະນາຂອງຈີນປາສະຈາກໂລກບໍ່ໄດ້, ການພັດທະນາຂອງໂລກກໍປາສະຈາກຈີນບໍ່ໄດ້ເຊັ່ນກັນ. ຄຳປາໄສພິເສດຄັ້ງນີ້, ຈະສ້າງວິໄສທັດໃໝ່ແລະເພີ່ມພະລັງທີ່ສ້າງສັນອັນໃໝ່ເຮັດໃຫ້ເສດຖະກິດໂລກຟື້ນຄືນໄດ້ຢ່າງແນ່ນອນ.