ວັນທີ 25 ມັງກອນນີ້, ທ່ານເຊີເກ ຊານາໂຄເອັຟ ຫົວໜ້າສູນຄົ້ນຄວ້າຣັດເຊຍ-ຈີນໄດ້ໃຫ້ສຳພາດຕໍ່ນັກຂ່າວວ່າ: ຄຳປາໄສພິເສດຂອງທ່ານສີຈິ້ນຜິງ ປະທານປະເທດຈີນທີ່ກ່າວໃນກອງປະຊຸມສົນທະນາ“ວາລະດາວອສ໌”ທີ່ມີຫົວຂໍ້ວ່າ“ຈົ່ງໃຫ້ທວນໄຟຂອງລັດທິຫຼາຍຝ່າຍເປັນແສງສະຫວ່າງເຍືອງທາງໃຫ້ແກ່ມວນມະນຸດກ້າວເດີນໄປໜ້າ”ມີຄວາມໝາຍທີ່ສຳຄັນ ເຊິ່ງໄດ້ຊີ້ແຈງທິດທາງການພັດທະນາໃຫ້ກັບໂລກທ່າມກາງການແຜ່ລະບາດຂອງພະຍາດໂຄວິດ-19.
ທ່ານຊານາໂຄເອັຟກ່າວວ່າ: ທ່ານປະທານສີຈິ້ນຜິງໄດ້ຮຽກຮ້ອງໃຫ້ປະເທດຕ່າງໆໃນໂລກຈົ່ງປະຖິ້ມແນວຄິດອະຄະຕິແລະຄ່ານິຍົມທີ່ບັງຄັບໃຫ້ປະເທດອື່ນປະຕິບັດຕາມແນວຄິດຕົນ, ຂ້າພະເຈົ້າຮູ້ສຶກສະເທືອນໃຈຫຼາຍຕໍ່ຈຸດນີ້. ໂລກເຮົານີ້ທີ່ຈິງແລ້ວກໍມີຄວາມຫຼາກຫຼາຍສີສັນ, ຖ້າວ່າພວກເຮົາສາມາດຊອກເຫັນວິທີໃດໜຶ່ງເພື່ອເຮັດໃຫ້ຄວາມຫຼາກຫຼາຍແບບນີ້ສາມາດພັດທະນາໃຫ້ຈະເລີນຮຸ່ງເຮືອງກວ່າເກົ່າ, ມັນກໍຈະກາຍເປັນຮູບແບບການພັດທະນາທີ່ດີທີ່ສຸດ. ການທີ່ຕ້ອງການແຜ່ຂະຫຍາຍລັດທິມະຫາອຳນາດເປັນໄປບໍ່ໄດ້ຢ່າງແນ່ນອນ.
ທ່ານຊານາໂຄເອັຟຍັງກ່າວຕື່ມວ່າ: ທ່ານປະທານສີຈິ້ນຜິງໄດ້ເນັ້ນໃຫ້ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ຍຶດໝັ້ນການປົກປັກຮັກສາຄ່ານິຍົມຮ່ວມຂອງມວນມະນຸດ ນັ້ນກໍຄື ສັນຕິພາບ ການພັດທະນາ ຄວາມຍຸຕິທຳ ຄວາມເປັນທຳ ປະຊາທິປະໄຕ ແລະເສລີພາບ, ເຊິ່ງໄດ້ຊີ້ແຈງທິດທາງແລະເສັ້ນທາງການພັດທະນາໃຫ້ແກ່ມວນມະນຸດທ່າມກາງການແຜ່ລະບາດຂອງພະຍາດໂຄວິດ-19.