ວັນທີ 27 ມັງກອນນີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານນາງໂຈອັນນາ ວິໂຣນິຄາ ປະທານຮ່ວມຂອງກົນໄກເຈລະຈາລະຫວ່າງລັດຖະບານເພື່ອປະຕິຮູບສະພາຄວາມໝັ້ນຄົງຂອງສະມັດຊາໃຫຍ່ສະຫະປະຊາຊາດຄັ້ງທີ 75, ທັງເປັນຜູ້ຕາງໜ້າໂປໂລຍປະຈຳສະຫະປະຊາຊາດ ແລະທ່ານນາງອາຊານີ ຜູ້ຕາງໜ້າກາຕາປະຈຳສະຫະປະຊາຊາດ ຜ່ານທາງວິດິໂອ ຢູ່ນະຄອນຫຼວງປັກກິ່ງ.
ທ່ານວາງຢີ້ກ່າວວ່າ, ການປະຕິຮູບສະພາຄວາມໝັ້ນຄົງກ່ຽວພັນເຖິງການພັດທະນາອົງການສະຫະປະຊາຊາດໃນອະນາຄົດ ແລະຜົນປະໂຫຍດຂອງປະເທດສະມາຊິກທັງຫຼາຍ. ການປະຕິຮູບຕ້ອງສະແດງໃຫ້ເຫັນເຖິງຄວາມຍຸດຕິທຳແລະຄວາມເປັນທຳ, ເພີ່ມທະວີລັກສະນະຕົວແທນແລະສິດປະກອບຄຳຄິດຄຳເຫັນຂອງປະເທດພວມພັດທະນາ, ເພື່ອເຮັດໃຫ້ປະເທດຂະໜາດກາງແລະນ້ອຍ ມີໂອກາດເຂົ້າຮ່ວມການວາງແຜນແລະກຳນົດນະໂຍບາຍຂອງສະພາຄວາມໝັ້ນຄົງໃຫ້ຫຼາຍກວ່າເກົ່າ.
ທ່ານນາງ ວິໂຣນິຄາ ແລະທ່ານນາງອາຊານີ ໄດ້ສະແດງຄວາມຍ້ອງຍໍຈີນທີ່ໄດ້ສຸມຄວາມພະຍາຍາມເພື່ອປົກປ້ອງລັດທິຫຼາຍຝ່າຍ ແລະເພີ່ມທະວີບົດບາດຂອງສະຫະປະຊາຊາດ, ໂດຍກ່າວວ່າ, ຈະສືບຕໍ່ຮັບຟັງຄວາມເຫັນຂອງປະເທດສະມາຊິກຢ່າງກວ້າງຂວາງ, ຮັກສາການແລກປ່ຽນຢ່າງໃກ້ຊິດກັບປະເທດສະມາຊິກຕ່າງໆທີ່ລວມທັງຈີນ, ພະຍາຍາມເຕົ້າໂຮມຄວາມເຫັນທີ່ເປັນເອກະພາບກັນ, ເພື່ອຊຸກຍູ້ວາລະການປະຕິຮູບສະພາຄວາມໝັ້ນຄົງອົງການສະຫະປະຊາຊາດດ້ວຍຮູບແບບທີ່ສອດຄ່ອງກັບຜົນປະໂຫຍດຂອງປະເທດສະມາຊິກອັນໄພສານ.