ຫວັງວ່າການຮ່ວມມືລາວ-ຈີນຊ່ວຍສ້າງຄວາມສຸກໃຫ້ແກ່ປະຊາຊົນລາວ

“ນີ້ແມ່ນໝີ່, ນີ້ແມ່ນເຂົ້າໜົມ, ຍັງມີຜ້າຫົ່ມ...” ຢູ່ໂຮງຮຽນວັດພູຄວາຍ ນະຄອນຫຼວງພະບາງ, ຈົວນ້ອຍໃນໄວປະຖົມທີ່ບໍ່ໃສ່ເກີບຈຳນວນໜຶ່ງຍິ້ມດີໃຈເປັນພິເສດ, ພວກເຂົາກຳລັງຊ່ວຍຂົນເຄື່ອງຊ່ວຍເຫຼືອທີ່ ສະພາການຄ້າ ແຂວງຢຸນນານ ປະຈຳ ສປປ ລາວ ສົ່ງມາ.

ເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ປີນີ້ ນັກທ່ອງທ່ຽວຂອງ ນະຄອນຫຼວງພະບາງ ເມືອງທ່ອງທ່ຽວ ທີ່ມີຊື່ສຽງຂອງປະເທດລາວ ກໍໄດ້ຫຼຸດໜ້ອຍລົງ, ມາບວກກັບມື້ມໍ່ໆມານີ້ ທີ່ສະພາບອາກາດມີອຸນຫະພູມຫຼຸດລົງຕໍ່ເນື່ອງຢ່າງທີ່ບໍ່ຄ່ອຍເປັນໃນແຕ່ລະປີ, ການບິນທະບາດ ແລະ ການຮັບປະກັນຕໍ່ສະບຽງອາຫານປະຈຳວັນຂອງໂຮງຮຽນສົງ 3 ແຫ່ງໃນຫຼວງພະບາງໄດ້ຮັບຜົນກະທົບ, ເຊິ່ງໄດ້ສົ່ງຜົນສະທ້ອນໃຫ້ແກ່ຊີວິດການເປັນຢູ່ຂອງພຣະສົງສຳມະເນນ.

ທ່ານ ແຈງຫົງ(Zhenghong) ປະທານ ສະພາການຄ້າ ແຂວງຢຸນນານ ປະຈຳ ສປປ ລາວ , ຜູ້ອຳນວຍການ ບໍລິສັດ ແຈງຫົງກໍ່ສ້າງເຄຫາ ແລະ ຂົວທາງ ຈໍາກັດ ພາຍຫຼັງທີ່ທ່ານໄດ້ຮັບຂ່າວດັ່ງກ່າວ, ກໍໄດ້ລະດົມ ແຈ້ງການ ກິດຈະກຳ ການຊ່ວຍເຫຼືອ ໃຫ້ບັນດາພຣະສົງສຳມະເນນ ຢ່າງຮີບດ່ວນໃນ “ໂອກາດຕ້ອນຮັບປີໃໝ່ ສົ່ງຄວາມອົບອຸ່ນ”. ພາຍຫຼັງທີ່ຂໍ້ມູນຖືກສົ່ງອອກໄປ, ກໍມີການຕອບຮັບຈາກ ວິສາຫະກິດຈີນປະຈຳລາວ ແລະ ວົງການຕ່າງໆໃນສັງຄົມ, ພາຍໃນ 3 ມື້ ສາມາດທ້ອນໂຮມເຄື່ອງຕ້ານໄພໜາວ ໄດ້ດັ່ງນີ້: ຜ້າຫົ່ມ, ໝີ່, ເສື້ອຜ້າ ລວມເປັນມູນຄ່າ 156,000,000 ກ່ວາກີບແລະ ໃນວັນທີ 18 ເດືອນມັງກອນ ເຄື່ອງກໍໄດ້ສົ່ງໄປເຖິງ ບັນດາພຣະສົງສຳມະເນນ 1170 ອົງ .

ນັບແຕ່ບູຮານະການ, ໂຮງຮຽນສົງເປັນສະຖານທີ່ອັນສຳຄັນທີ່ຄົນລາວມາສຶກສາຮ່ຳຮຽນ. ໃນປັດຈຸບັນ, ໂຮງຮຽນສົງຍັງຄົງເປັນສະຖານທີ່ຮ່ຳຮຽນໜັງສືຂອງເດັກນ້ອຍທີ່ທຸກຍາກ ແລະ ຢູ່ເຂດຫ່າງໄກສອກຫຼີກ.

ສາທຸ ອ່ອນແກ້ວ ເຈົ້າຄະນະ ອ.ພ.ສ ແຂວງຫຼວງພະບາງແລະ ຫົວໜ້າກໍາມາທິການສຶກສາສົງວັດຜາໂອ ອຳນວຍການ ໂຮງຮຽນມັດທະຍົມສົມບູນສົງວັດຜາໂອ ໄດ້ສະແດງຄວາມຂອບໃຈຕໍ່ການຊ່ວຍເຫຼືອຄັ້ງນີ້ ທ່ານກ່າວວ່າ “ຂໍຂອບໃຈນ້ຳໃຈທີ່ມິດສະຫາຍຄົນຈີນສົ່ງມາ, ມີເຄື່ອງຊ່ວຍເຫຼືອຊຸດນີ້, ພຣະສົງສຳມະເນນ ກໍຈະໄດ້ຮ່ຳຮຽນກັນຢ່າງສະຫງົບໃຈ.”

ເດືອນສິງຫາ 2020, ສະພາການຄ້າ ແຂວງຢຸນນານ ປະຈຳ ສປປ ລາວ ໄດ້ສ້າງຕັ້ງຂຶ້ນ, ທ່ານ ແຈງຫົງ ໄດ້ຮັບເລືອກຕັ້ງເປັນປະທານສະພາດັ່ງກ່າວ. 5 ເດືອນມານີ້, ສະພາການຄ້າໄດ້ດຳເນີນການແລກປ່ຽນກັບ ຫຼາຍອົງການຄົ້ນຄ້ວາແລະອົງການລັດຖະບານຂອງປະເທດລາວ, ໄດ້ຈັດຕັ້ງຫຼາຍລາຍການເຄື່ອນໄຫວສາທາລະນະປະໂຫຍດ. “ຈຸດປະສົງເບື້ອງຕົ້ນໃນການສ້າງຕັ້ງສະພາການຄ້າ ແມ່ນຫວັງຢາກເຕົ້າໂຮມກຳລັງໃຫ້ຫຼາຍຂຶ້ນ, ຊ່ວຍເຫຼືອຄົນທີ່ຕ້ອງການຄວາມຊ່ວຍເຫຼືອໃຫ້ໄດ້ຫຼາຍຂຶ້ນ.” ທ່ານ ແຈງຫົງ ກ່າວວ່າ, ປະເທດລາວແມ່ນດິນແດນແຫ່ງຄວາມໂຊກດີຂອງລາວ, ຍ້ອນວ່າໄດ້ຮັບການຊ່ວຍເຫຼືອຈາກໄທບ້ານດຽວກັນ ແລະ ຄົນທ້ອງຖິ່ນຈຳນວນຫຼາຍ, ຕົນເອງຈຶ່ງສາມາດເຮັດວຽກງານໃຫຍ່ໜຶ່ງອອກມາໄດ້ໃນລາວ. ລາວຫວັງວ່າ ສະພາການຄ້າຈະສາມາດຮ່ວມກັນແກ້ໄຂບັນຫາ ໃນເວລາທີ່ວິສາຫະກິດຂອງສອງປະເທດພົບພໍ້ຄວາມຫຍຸ້ງຍາກ ຢູ່ໃນປະເທດລາວ ແລະ ຈີນ.

ປີນີ້ ເປັນການສ້າງຕັ້ງສາຍພົວພັນທາງການທູດ ລາວ-ຈີນຄົບຮອບ 60 ປີ, ທ່ານ ແຈງຫົງ ເຫັນວ່າ ທ່າອ່ຽງຂອງການຮ່ວມມືລະຫວ່າງລາວ-ຈີນ ຍິ່ງນັບມື້ນັບດີຂຶ້ນ. ຄຽງຄູ່ກັບສອງປະເທດຈັບມືກັນກໍ່ສ້າງຄູ່ຮ່ວມຊະຕາກຳລາວ-ຈີນນຳກັນນັ້ນ, ປະເທດລາວພວມເລັ່ງຄວາມໄວໃນການຫັນຈາກ “ປະເທດບໍ່ມີຊາຍແດນຕິດທະເລ” ໃຫ້ເປັນ “ປະເທດເຊື່ອມໂຍງເຊື່ອມຈອດກັບພາກພື້ນ”, ໄດ້ຂັບເຄື່ອນວິສາຫະກິດຂອງສອງປະເທດພັດທະນາໄປຢ່າງຕໍ່ເນື່ອງ. “ໂດຍສະເພາະແມ່ນພາຍຫຼັງການເປີດນໍາໃຊ້ເສັ້ນທາງດ່ວນ ແລະ ເສັ້ນທາງລົດໄຟ, ບໍ່ພຽງແຕ່ຕົ້ນທຶນການຂົນສົ່ງຫຼຸດລົງ, ຮອບວຽນການຂົນສົ່ງກໍຈະສັ້ນເຂົ້າຫຼາຍ, ຕໍ່ປະເທດລາວທີ່ຖືເອົາກະສິກຳເປັນສຳຄັນນີ້ ແມ່ນຜົນກຳໄລທີ່ບໍ່ມີຫຍັງຊິມາດີກ່ວານີ້ໄດ້ແລ້ວ.” ພັດທະນາກະສິກຳຂອງລາວເພື່ອສົ່ງອອກ, ຊາວລາວທັງຫຼາຍ ລ້ວນແຕ່ສາມາດເຂົ້າຮ່ວມໄດ້, ເຊິ່ງຈະຊັກນຳໃຫ້ຄົນທ້ອງຖິ່ນຮັ່ງມີຂຶ້ນ.

ບໍລິສັດຂອງທ່ານ ແຈງຫົງ ໄດ້ມີ ການປູກໝາກຖົ່ວລຽນ, ໝາກພຸກ, ໝາກມ່ວງ ແລະ ອື່ນໆຢູ່ປະເທດລາວ, ກະກຽມສ້າງສວນສາທິດກ່ອນ, ຈາກນັ້ນຈະຮ່ວມ ກັບຜູ້ຊ່ຽວຊານດ້ານກະສິກຳຂອງຈີນ, ເປີດການຝຶກອົບຮົມເຕັກນິກກະສິກຳ. ເດືອນມໍ່ໆມານີ້, ທ່ານ ແຈງຫົງ ກໍໄດ້ຮັບຂ່າວດີອີກຢ່າງໜຶ່ງ, ກໍຄື ປະເທດຈີນໄດ້ຍົກເວັ້ນພາສີນຳເຂົ້າສິນຄ້າລາວ 97% ຂອງລາຍການສິນຄ້າທັງໝົດ, ສຳລັບການສົ່ງອອກຜະລິດຕະພັນກະສິກຳໃນຕໍ່ໜ້າ, ລາວຍິ່ງມີຄວາມໝັ້ນໃຈເພີ່ມຂຶ້ນ.

ທ່ານ ແຈງຫົງ ຄິດວ່າ, ໃນອະນາຄົດ 10 ປີ, ເສດຖະກິດສັງຄົມຂອງປະເທດລາວຈະມີການພັດທະນາແບບກ້າວກະໂດດຢ່າງແນ່ນອນ, ຄຽງຄູ່ກັບການລົງນາມໃນສັນຍາຄູ່ຮ່ວມມືເສດຖະກິດຮອບດ້ານຂອງພາກພື້ນ （RCEP）, ການຮ່ວມມື ລະຫວ່າງຢຸນນານ ແລະ ປະເທດລາວ ຈະເປີດບົດໃໝ່ທີ່ເຕັມປ່ຽມດ້ວຍໂອກາດ ຫຼາຍຂຶ້ນ, ຫວັງຢ່າງຍິ່ງວ່າ ການຮ່ວມມືທີ່ນັບມື້ນັບແໜ້ນແຟ້ນຈະຊ່ວຍສ້າງຄວາມສຸກຂຶ້ນອີກກ້າວໃຫ້ປະຊາຊົນລາວ.