ທ່ານສີຈິ້ນຜິງໄດ້ສົ່ງສານຊົມເຊີຍໄປຍັງທ່ານຫງວຽນຟູຈ້ອງທີ່ໄດ້ຮັບເລືອກຕັ້ງເປັນເລຂາທິການໃຫຍ່ພັກກອມມູນນິດຫວຽດນາມອີກສະໄໝໜຶ່ງ
ວັນທີ 31 ມັງກອນແລ້ວນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ສົ່ງສານໄປຍັງທ່ານຫງວຽນຟູຈ້ອງ ເພື່ອສະແດງຄວາມຊົມເຊີຍທີ່ທ່ານໄດ້ຮັບເລືອກຕັ້ງເປັນເລຂາທິການໃຫຍ່ຄະນະບໍລິຫານງານພັກກອມມູນິດຫວຽດນາມອີກສະໄໝໜຶ່ງ.
ໃນສານຊົມເຊີຍ, ທ່ານສີຈິ້ນຜິງກ່າວວ່າ, ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຫວຽດນາມຄັ້ງທີ 12 ເປັນຕົ້ນມາ, ພາຍໃຕ້ການນຳພາທີ່ເຂັ້ມແຂງຂອງສູນກາງພັກກອມມູນິດຫວຽດນາມທີ່ມີສະຫາຍເລຂາທິການໃຫຍ່ຫງວຽນຟູຈ້ອງເປັນແກນນຳ, ພັກກອມມູນິດຫວຽດນາມໄດ້ເພີ່ມທະວີການກໍ່ສ້າງພັກ ແລະ ນຳພາປະຊາຊົນຫວຽດນາມໄດ້ຮັບຜົນສຳເລັດອັນໃຫຍ່ຫຼວງໃນພາລະກິດກໍ່ສ້າງສັງຄົມນິຍົມ ແລະ ການປ່ຽໜແປງໃໝ່. ຂ້າພະເຈົ້າເຊື່ອໝັ້ນວ່າ, ພາຍໃຕ້ການນຳພາຂອງສູນກາງພັກກອມມູນິດຫວຽດນາມຊຸດໃໝ່ທີ່ມີສະຫາຍຫງວຽນຟູຈ້ອງເປັນແກນນຳ, ພາລະກິດຕ່າງໆຂອງພັກ ແລະ ລັດຫວຽດນາມຍ່ອມຈະປະສົບຜົນສຳເລັດໃຫຍ່ຫຼວງກວ່າເກົ່າ.
ທ່ານສີຈິ້ນຜິງກ່າວຕື່ມວ່າ, ສອງປະເທດຈີນ-ຫວຽດນາມເປັນປະເທດບ້ານໃກ້ເຮືອນຄຽງສັງຄົມນິຍົມທີ່ມີມິດຕະພາບທີ່ດີຕໍ່ກັນ, ທັງແມ່ນປະຊາຄົມຮ່ວມຊາຕາກຳທີ່ມີຄວາມໝາຍທາງຍຸດທະສາດ. ຂ້າພະເຈົ້າໃກ້ຄວາມສຳຄັນຢ່າງສູງຕໍ່ສາຍພົວພັນລະຫວ່າງສອງພັກ ສອງລັດຈີນ-ຫວຽດນາມ, ຍິນດີຮ່ວມກັນກັບສະຫາຍເລຂາທິການໃຫຍ່ຫງວຽນຟູຈ້ອງ, ເພີ່ມທະວີການແລກປ່ຽນດ້ານຍຸດທະສາດ, ສົ່ງເສີມມິດຕະພາບອັນມີມູນເຊື້ອ, ລົງເລິກການແລກປ່ຽນ ແລະ ການຮ່ວມມືໃນຂົງເຂດຕ່າງໆ, ຊຸກຍູ້ພາລະກິດສ້າງສັງຄົມນິຍົມ, ພ້ອມກັນນຳພາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ ກັບ ຫວຽດນາມໃຫ້ຂະຫຍາຍຕົວຢ່າງຕໍ່ເນື່ອງ ແລະ ປອດໄສ, ເພື່ອສ້າງຄວາມສຸກໃຫ້ແກ່ປະຊາຊົນສອງປະເທດຫຼາຍກວ່າເກົ່າ ແລະ ປະກອບສ່ວນຢ່າງຕັ້ງໜ້າເພື່ອຊຸກຍູ້ສັນຕິພາບ ແລະ ການຮ່ວມມືພັດທະນາແບບຕ່າງຝ່າຍຕ່າງໄດ້ຮັບຜົນປະໂຫຍດຂອງໂລກກໍ່ຄືຂອງພາກພື້ນ.