ຈີນຈັດກອງປະຊຸມເພື່ອຊຸກຍູ້ວຽກງານຫ້າງຫາກະກຽມງານກິລາໂອລິມປິກລະດູ ໜາວປັກກິ່ງໃຫ້ດຳເນີນໄປຕາມແຜນ
ວັນທີ1 ແລະວັນທີ 2 ກຸມພານີ້, ກອງປະຊຸມຫົວໜ້າຄະນະນັກກິລາຂອງງານກິລາໂອລິມປິກປັກກິ່ງ 2022 ແລະກອງປະຊຸມຜູ້ຖ່າຍທອດສົດໂລກໄດ້ຈັດຂຶ້ນຕາມລຳດັບ, ເພື່ອຊຸກຍູ້ວຽກງານຫ້າງຫາກະກຽມທີ່ກ່ຽວຂ້ອງກັບງານກິລາໂອລິມປິກລະດູໜາວປັກກິ່ງໃຫ້ດຳເນີນໄປຕາມແຜນການ.
ວັນທີ 1 ກຸມພາ, ກອງປະຊຸມຫົວໜ້າຄະນະນັກກິລາຂອງງານກິລາໂອລິມປິກລະດູໜາວປັກກິ່ງ 2022ໄດ້ໄຂຂຶ້ນໂດຍຜ່ານທາງວິດີໂອ. ໃນພິທີ, ທ່ານໂທມັສ ບັສ ປະທານຄະນະກຳມະການກິລາໂອລິມປິກສາກົນໄດ້ກ່າວຄຳປາໄສໂດຍກ່າວວ່າ: ຈີນໄດ້ປະສົບຜົນສຳເລັດອັນພົ້ນເດັ່ນໃນດ້ານການຮັບມືກັບການແຜ່ລະບາດຂອງພະຍາດໂຄວິດ-19, ຄະນະກຳມະການກິລາໂອລິມປິກສາກົນມີຄວາມໝັ້ນໃຈຢ່າງເຕັມປ່ຽມວ່າຈີນຈະສາມາດຈັດງານກິລາໂອລິມປິກລະດູໜາວປັກກິ່ງໄດ້ຢ່າງສຳເລັດຜົນແນ່ນອນ. ປັດຈຸບັນຍັງມີເວລາເຫລືອອີກໜຶ່ງປີໃນການຈັດງານກິລາໂອລິມປິກລະດູໜາວປັກກິ່ງ, ຫວັງວ່າຄະນະກຳມະການຈັດງານກິລາໂອລິມປິກລະດູໜາວປັກກິ່ງຈະຮ່ວມມືຢ່າງໃກ້ຊິດກັບຄະນະກຳມະການກິລາໂອລິມປິກສາກົນແລະສະຫະພັນກິລາສາກົນປະເພດດ່ຽວ, ເພື່ອຮັບປະກັນໃຫ້ງານກິລາສາມາດຈັດຂຶ້ນໄດ້ຢ່າງປອດໄພແລະສະດວກ.
ກອງປະຊຸມ ຫົວໜ້າຄະນະນັກກິລາແມ່ນກອງປະຊຸມທາງການລະຫວ່າງຄະນະກຳມະການຈັດງານກິລາໂອລິມປິກລະດູໜາວປັກກິ່ງກັບຄະນະກຳມະການກິລາໂອລິມປິກຂອງປະເທດຫຼືເຂດແຄວ້ນທີ່ເຂົ້າຮ່ວມການແຂ່ງຂັນ, ເພື່ອກວດສອບມາດຕະຖານຮອບດ້ານອີກຄັ້ງໜຶ່ງວ່າວຽກງານຫ້າງຫາກະກຽມງານກິລາໂອລິມປິກມີຄວາມພ້ອມຊ່ຳໃດ. ກອງປະຊຸມທີ່ໄດ້ດຳເນີນໄປເປັນເວລາ 2 ວັນນັ້ນ, ຄະນະກຳມະການງານກິລາໂອລິມປິກລະດູໜາວປັກກິ່ງໄດ້ແນະນຳກ່ຽວກັບສະພາບທີ່ກ່ຽວຂ້ອງເຊັ່ນ:ການບໍລິການສຳລັບຄະນະນັກກິລາຂອງງານກິລາໂອລິມປິກປະເທດຫຼືເຂດແຄວ້ນ, ການສະໝັກເຂົ້າຮ່ວມລາຍການແຂ່ງຂັນ, ການລົງທະບຽນ ແລະ ການກະກຽມດ້ານສື່ມວນຊົນເປັນຕົ້ນ.
ກອງປະຊຸມຜູ້ຖ່າຍທອດສົດໂລກແມ່ນເວທີສຳຄັນຂອງການແລກປ່ຽນຄວາມຄິດເຫັນລະຫວ່າງຄະນະກຳມະການຈັດງານກິລາໂອລິມປິກລະດູໜາວປັກກິ່ງກັບຜູ້ຖ່າຍທອດສົດ. ວັນທີ 2 ກຸມພານີ້, ກອງປະຊຸມຜູ້ຖ່າຍທອດສົດໂລກປີ 2021 ສຳລັບງານກິລາໂອລິມປິກລະດູໜາວປັກກິ່ງໄດ້ໄຂຂຶ້ນ. ຄະນະກຳມະການຈັດງານກິລາໂອລິມປິກລະດູໜາວປັກກິ່ງ ແລະ ຜູ້ຮັບຜິດຊອບທີ່ກ່ຽວຂ້ອງຂອງບໍລິສັດຜູ້ຖ່າຍທອດສົດກິລາໂອລິມປິກໄດ້ແລກປ່ຽນຄວາມຄິດເຫັນກ່ຽວກັບການກໍ່ສ້າງພື້ນຖານໂຄງລ່າງ, ການກະກຽມດ້ານສື່ມວນຊົນ ແລະ ການບໍລິການການຖ່າຍທອດເປັນຕົ້ນ.
ທ່ານອານິສເອກຊັກສ ປະທານຄະນະກຳມະການບໍລິຫານບໍລິສັດບໍລິການຖ່າຍທອດສົດກິລາໂອລິມປິກກ່າວວ່າ: ວຽກງານກໍ່ສ້າງເດີ່ນກິລາຕ່າງໆຂອງງານກິລາໂອລິມປິກລະດູໜາວປັກກິ່ງໄດ້ດຳເນີນໄປຢ່າງສະດວກແລະມີຈຸດພົ້ນເດັ່ນຫຼາຍ, ວຽກງານຕ່າງໆໄດ້ດຳເນີນໄປຢ່າງສະດວກ, ເຊື່ອວ່າປັກກິ່ງຈະສາມາດຈັດງານກິລາໂອລິມປິກລະດູໜາວປັກກິ່ງປີ 2022 ໄດ້ຢ່າງສຳເລັດຜົນ.