ວັນທີ 3 ກຸມພານີ້, ທ່ານວ່າງເວີນປິ່ນ ໂຄສົກກະຊວງການຕ່າງປະເທດຈີນໄດ້ແຈ້ງໃຫ້ຮູ້ວ່າ, ໂດຍຕອບສະໜອງຕາມຄວາມຮຽກຮ້ອງຂອງອົງການອະນາໄມໂລກ ຫຼື WHO, ຈີນຕົກລົງສະໜອງວັກຊິນ 10 ລ້ານຫຼອດໃນຂອບ “ແຜນດຳເນີນງານວັກຊິນພະຍາດໂຄວິດ-19” ຂອງອົງການອະນາໄມໂລກ, ຕົ້ນຕໍແມ່ນສະໜອງໃຫ້ແກ່ປະເທດພວມພັດທະນາເພື່ອຕອບຄວາມຕ້ອງການດ່ວນ.
ໃນກອງປະຊຸມຂ່າວ, ທ່ານວ່າງເວີນປິ່ນກ່າວວ່າ: “ນີ້ແມ່ນມາດຕະການສຳຄັນອີກຢ່າງໜຶ່ງທີ່ຈີນຊຸກຍູ້ການແບ່ງປັນວັກຊິນຢ່າງທ່ຽງທຳ ຊຸກຍູ້ການຮ່ວມມືກັບສາກົນເພື່ອຕ້ານພະຍາດ ພ້ອມທັງປະຕິບັດຕາມແນວຄິດປະຊາຄົມຮ່ວມສາທາລະນະຂອງມວນມະນຸດ.”
ທ່ານວ່າງເວີນປິ່ນຍັງແຈ້ງໃຫ້ຮູ້ອີກວ່າ, ຈີນໄດ້ເຂົ້າຮ່ວມ “ແຜນດຳເນີນງານວັກຊິນພະຍາດໂຄວິດ-19” ຢ່າງເປັນທາງການ ແລະ ຈະຮັກສາການແລກປ່ຽນຢ່າງໃກ້ຊິດກັບອົງການ WHO ເຊິ່ງເປັນຜູ້ສະເໜີຂໍ້ລິເລີ່ມແຜນການນີ້, ທັງສຸມຄວາມພະຍາຍາມເພື່ອໃຫ້ວັກຊິນເປັນຜະລິດຕະພັນສາທາລະນະທົ່ວໂລກ ໂດຍປະເທດພວມພັດທະນາສາມາດເຂົ້າເຖິງ ແລະ ຊື້ໄດ້.