ວັນທີ 5 ກຸມພານີ້, ໃນກອງປະຊຸມຖະແຫຼງຂ່າວປະຈຳ, ທ່ານວ່າງເວີນປິ່ນ ໂຄສົກກະຊວງການຕ່າງປະເທດຈີນກ່າວວ່າ, ບາງອິດທິກຳລັງປໍລະປັກຈີນຂອງປະເທດຕາເວັນຕົກເຊັ່ນ: ອາເມຣິກາເປັນຕົ້ນໄດ້ປັ້ນແຕ່ງແລະເປີດປ່າວຂ່າວປອມຈຳນວນຫຼາຍກ່ຽວກັບເຂດຊິ່ນຈ່ຽງຈີນ, ແຕ່ຄວາມຂີ້ຕົວະເຖິງຈະເວົ້າພັນເທື່ອກໍ່ບໍ່ສາມາດປ່ຽນເປັນຄວາມຈິງໄດ້.
ທ່ານວ່າງເວີນປິ່ນກ່າວວ່າ, ເຂດຊິ່ນຈ່ຽງຈີນໄດ້ຕັ້ງໜ້າຕອບສະໜອງກັບເອກະສານຕ້ານການກໍ່ການຮ້າຍເປັນລະບົບຄື “ຍຸດທະສາດການຕ້ານການກໍ່ການຮ້າຍທົ່ວໂລກຂອງອົງການສະຫະປະຊາຊາດ”ເປັນຕົ້ນ, ໄດ້ໂຈມຕີຢ່າງເຂັ້ມງວດຕໍ່ການເຄື່ອນໄຫວການກໍ່ການຮ້າຍດ້ວຍຄວາມຮຸນແຮງທີ່ລ່ວງລະເມີດສິດທິມະນຸດພົນລະເມືອງ, ທຳລາຍຄວາມໝັ້ນຄົງສາທາລະນະ, ທຳລາຍຄວາມສາມັກຄີລະຫວ່າງຊົນເຜົ່າ, ແລະແບ່ງແຍກປະເທດຊາດ. ການຊຶມເຂົ້າຂອງລັດທິຫົວຮຸນແຮງໄດ້ຖືກສະກັດກັ້ນຢູ່ເຂດຊິ່ນຈ່ຽງຢ່າງບັງເກີດຜົນ, ຊິ່ນຈ່ຽງໄດ້ປົກປ້ອງສິດຊີວິດ, ສິດສຸຂະພາບ, ສິດພັດທະນາແລະສິດທິມະນຸດພື້ນຖານຂອງປະຊາຊົນບັນດາເຜົ່າໃນລະດັບໃຫຍ່ທີ່ສຸດ, ຢູ່ເຂດຊິ່ນຈ່ຽງກໍບໍ່ໄດ້ເກີດຄະດີການກໍ່ການຮ້າຍດ້ວຍຄວາມຮຸນແຮງອີກໃນ 4 ປີຕິດຕໍ່ກັນ.
ໃນຂະນະດຽວກັນ, ທ່ານວ່າງເວີນປິ່ນຊີ້ໃຫ້ເຫັນວ່າ, ຝ່າຍຈີນຍິນດີຕ້ອນຮັບບຸກຄົນຕ່າງປະເທດທີ່ມີຄວາມສົນໃຈໄປຢ້ຽມຢາມຊິ່ນຈ່ຽງຫຼາຍກວ່າເກົ່າ, ເພື່ອເບິ່ງການພັດທະນາ, ການປ່ຽນແປງຢູ່ແຫ່ງນັ້ນໂດຍຕົນເອງ, ເພື່ອສຳຜັດກັບເຂດຊິ່ນຈ່ຽງທີ່ແທ້ຈິງ.