ວັກຊີນພະຍາດໂຄວິດ-19 ທີ່ຈີນຊ່ວຍເຫຼືອກຳປູເຈຍ ງວດທຳອິດ ໄດ້ຂົນສົ່ງໄປຮອດນະຄອນຫຼວງພະນົມເປັນໃນວັນທີ 7 ກຸມພານີ້, ທ່ານຮຸນແຊນ ນາຍົກລັດຖະມົນຕີກຳປູເຈຍ ໄດ້ອອກໄປຮັບວັກຊີນດັ່ງກ່າວດ້ວຍຕົນເອງຢູ່ສະໜາມບິນສາກົນພະນົມເປັນ.
ທ່ານຮຸນແຊນ ໄດ້ກ່າວໃນພິທີມອບຮັບວັກຊີນທີ່ຈັດຂຶ້ນຢູ່ສະໜາມບິນວ່າ: ຈີນຊ່ວຍເຫຼືອວັກຊີນແກ່ກຳປູເຈຍ ໄດ້ກາຍເປັນສັກຂີພິຍານທີ່ໜັກແໜ້ນ ທີ່ສະແດງໃຫ້ເຫັນເຖິງຄວາມຮັກແພງ ແລະ ການຮ່ວມມືຢ່າງແໜ້ນແຟ້ນລະຫວ່າງສອງປະເທດ ກໍຄືປະຊາຊົນສອງຊາດ, ນີ້ຈະເປັນການຊຸກຍູ້ການພັດທະນາສາຍພົວພັນຄູ່ຮ່ວມມືຍຸດທະສາດຮອບດ້ານ ແລະ ການສ້າງປະຊາຄົມຮ່ວມຊາຕາກຳ ລະຫວ່າງສອງປະເທດຢ່າງແຂງແຮງ.
ທ່ານຫວາງເຫວີນທ່ຽນ ເອກອັກຄະລັດຖະທູດ ສປ ຈີນປະຈຳກຳປູເຈຍ ກ່າວວ່າ: ຈີນຈະສືບຕໍ່ເພີ່ມທະວີການຮ່ວມມືຕ້ານກັບພະຍາດໂຄວິດ-19 ກັບຝ່າຍກຳປູເຈຍ, ແລະຈະສືບຕໍ່ໃຫ້ການຊ່ວຍເຫຼືອແກ່ກຳປູເຈຍໃນການຕ້ານກັບພະຍາດໂຄວິດ-19 ຕາມຄວາມສາມາດຂອງຕົນ ຈົນກວ່າກຳປູເຈຍຈະສາມາດເອົາຊະນະພະຍາດໂຄວິດ-19 ໄດ້ຢ່າງເຖິງຖອງ.
ວັນທີ 4 ກຸມພານີ້, ກະຊວງສາທາລະນະສຸກກຳປູເຈຍ ໄດ້ອະນຸມັດໃຫ້ນຳໃຊ້ວັກຊີນພະຍາດໂຄວິດ-19 ປະເພດເຊື້ອຕາຍຂອງກຸ່ມບໍລິສັດການຢາແຫ່ງຊາດຈີນ ຫຼື ຊີໂນຟາມ ຢ່າງຮີບດ່ວນ. ກ່ອນໜ້ານີ້ ຄືໃນວັນທີ 3 ກຸມພານີ້, ຝ່າຍກຳປູເຈຍໄດ້ຈັດພິທີຝຶກອົບຮົມການສັກວັກຊີນຂອງຈີນຢູ່ພະນົມເປັນ ໂດຍມີພະນັກງານຝ່າຍຈີນໃຫ້ການຝຶກອົບຮົມແກ່ພະນັກງານການແພດແລະພະຍາບານຂອງຝ່າຍກຳປູເຈຍ.