ວັນທີ 9 ກຸມພານີ້, ຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນ ໄດ້ເປັນປະທານຈັດກອງປະຊຸມສຸດຍອດຈີນ-ປະເທດເອີຣົບກາງແລະເອີຣົບຕາເວັນອອກ, ກອງປະຊຸມດັ່ງກ່າວໄດ້ຈັດຂຶ້ນໂດຍຜ່ານທາງວິດີໂອ ແລະ ໃນກອງປະຊຸມ, ທ່ານສີຈິ້ນຜິງ ປະທານປະເທດຈີນ ໄດ້ກ່າວຄຳປາໄສພາຍໃຕ້ຫົວຂໍ້ “ສາມັກຄີເປັນຈິດໜຶ່ງໃຈດຽວກັນ, ສືບຕໍ່ເສີມຂະຫຍາຍການຮ່ວມມືອັນເກົ່າແລະອັນໃໝ່ ເພື່ອຮ່ວມກັນຂຽນປະຫວັດສາດໜ້າໃໝ່ຂອງການຮ່ວມມືລະຫວ່າງສອງຝ່າຍ”.
ໃນຄຳປາໄສ, ທ່ານສີຈິ້ນຜິງ ກ່າວເນັ້ນໜັກວ່າ: ຈີນ ແລະ ປະເທດເອີຣົບກາງ-ເອີຣົບຕາເວັນອອກ ຮ່ວມມືກັນ, ຍຶດໝັ້ນການປຶກສາຫາລືຮ່ວມກັນ, ສ້າງສາຮ່ວມກັນ, ເຮັດແທ້ທຳຈິງ-ດຸນດ່ຽງກັນ, ເປີດປະຕູ-ເຊື່ອມໂຍງເຂົ້າຫາກັນ, ປະດິດສ້າງ ແລະບຸກບືນກ້າວໜ້າ, ເຊິ່ງແມ່ນພຶດຕິກຳຕົວຈິງຢ່າງມີຊີວິດຊີວາຂອງລັດທິຫຼາຍຝ່າຍ, ແມ່ນພາກສ່ວນປະກອບທີ່ສຳຄັນຂອງສາຍພົວພັນລະຫວ່າງຈີນ-ເອີຣົບ. ຈີນຍິນດີຮ່ວມກັບປະເທດເອີຣົບກາງແລະເອີຣົບຕາເວັນອອກ ເດີນໄປຕາມຍຸກສະໄໝ, ບັນລຸການພັດທະນາຮ່ວມກັນ ແລະ ຕ່າງຝ່າຍຕ່າງມີຜົນປະໂຫຍດ ໃນລະດັບສູງກວ່າເກົ່າ ແລະ ຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ກອງປະຊຸມສຸດຍອດໄດ້ເຜີຍແຜ່ “ແຜນດຳເນີນງານປັກກິ່ງກ່ຽວກັບການຮ່ວມມືລະຫວ່າງຈີນ-ປະເທດເອີຣົບກາງແລະເອີຣົບຕາເວັນອອກປີ 2021” ແລະ “ສະຫຼຸບຜົນສຳເລັດຂອງກອງປະຊຸມສຸດຍອດຈີນ-ປະເທດເອີຣົບກາງແລະເອີຣົບຕາເວັນອອກ”.