ທ່ານວ່າງເວີນປິ່ນ ໂຄສົກກະຊວງການຕ່າງປະເທດຈີນໄດ້ກ່າວຢືນຢັນໃນກອງປະຊຸມຖະແຫຼງຂ່າວທີ່ຈັດຂຶ້ນເປັນປະຈຳໃນວັນທີ 23 ກຸມພານີ້ວ່າ: ອັນທີ່ເອີ້ນວ່າ “ກັບດັກໜີ້ສິນຈາກຈີນ”ນັ້ນເປັນຖ້ອຍຄຳທີ່ບໍ່ຖືກຕ້ອງກັບຄວາມຈິງ, ກົງກັນຂ້າມ, ບຸກຄົນຈຳນວນໜຶ່ງທີ່ມີເຈດຕະນາບໍ່ຫວັງດີຍຸແຍ່ເພື່ອທຳລາຍການພົວພັນຈີນ-ອາຟຣິກກາ ນັ້ນຈຶ່ງແມ່ນຄວາມຈິງ. ຈີນມີຄວາມຍິນດີຢ່າງສະເໝີຕົ້ນສະເໝີປາຍໃນການສະແຫວງຫາວິທີແກ້ໄຂບັນຫາໜີ້ສິນໃຫ້ດີດ້ວຍການປຶກສາຫາລືບົນຈິດໃຈມິດຕະພາບ, ຈີນບໍ່ເຄີຍບັງຄັບໃຫ້ປະເທດອື່ນໄຊ້ໜີ້ຈັກເທື່ອ, ທັງບໍ່ໄດ້ຮຽກຮ້ອງໃຫ້ເຊັນສັນຍາແບບບີບບັງຄັບ.
ທ່ານວ່າງເວີນປິ່ນກ່າວວ່າ: ຈີນໄດ້ໃຫ້ຄວາມສຳຄັນຢ່າງສູງຕໍ່ບັນຫາກ່ຽວກັບການຜ່ອນຫຼືເລື່ອນເວລາໄຊ້ໜີ້ໃຫ້ກັບປະເທດໃນອາຟຣິກາ, ຈີນກຳລັງປະຕິບັດຕາມຄວາມເຫັນທີ່ເປັນເອກະພາບກັນລະຫວ່າງຜູ້ນຳຈີນ-ອາຟຣິກາແລະຂໍ້ລິເລີ່ມເລື່ອນເວລາໄຊ້ໜີ້ຂອງG20 ເພື່ອແກ້ໄຂຄວາມກັງວົນຂອງຝ່າຍອາຟຣິກກາຢ່າງຕັ້ງໜ້າ, ຈີນໄດ້ເຊັນສັນຍາຫຼືບັນລຸຄວາມເຫັນທີ່ເປັນເອກະພາບກັນກັບ 16 ປະເທດອາຟຣິກາກ່ຽວກັບການເລື່ອນເວລາໄຊ້ໜີ້. ຈີນຍັງໄດ້ຍົກເວັ້ນໜີ້ສິນເງິນກູ້ປອດດອກເບັ້ຍທີ່ຈະຮອດເວລາສົ່ງຄືນໃນປີ2020ໃຫ້ກັບ 15 ປະເທດອາຟຣິກກາ ເຊິ່ງນອນຢູ່ໃນຂອບເວທີປຶກສາຫາລືການຮ່ວມມືຈີນ-ອາຟຣິກກາ.
ສຸດທ້າຍ, ທ່ານວ່າງເວີນປິ່ນຊີ້ໃຫ້ເຫັນວ່າ: ບັນຫາໜີ້ສິນຂອງປະເທດທີ່ກຳລັງພັດທະນາເປັນບັນຫາທີ່ມີມາແຕ່ດົນແລ້ວ ທັງມີສາເຫດອັນສະຫຼັບສັບຊ້ອນ. ວິທີແກ້ໄຂທີ່ດີທີ່ສຸດກໍຄືຊ່ວຍເຫຼືອແລະສະໜັບສະໜູນປະເທດເຫຼົ່ານີ້ໃຫ້ເພີ່ມຄວາມສາມາດໃນການພັດທະນາຕົນເອງ ເພື່ອບັນລຸການພັດທະນາໃຫ້ຫຼາຍກວ່າເກົ່າ.