ທ່ານສີຈິ້ນຜິງ ໄດ້ມອບຫຼຽນໄຊ, ໃບຍ້ອງຍໍໃຫ້ແກ່ ທ່ານນາງ ຈາງກຸຍເມີຍ ທີ່ໄດ້ຮັບນາມມະຍົດວ່າ ຜູ້ເປັນແບບຢ່າງໃນການລຶບລ້າງຄວາມທຸກຍາກທົ່ວປະເທດ
ໃນວັນທີ 25 ກຸມພາ, ພິທີສະຫຼຸບຜົນງານ, ຍ້ອງຍໍບຸກຄົນ ແລະ ໜ່ວຍງານທີ່ມີຜົນງານດີເດັ່ນໃນບັ້ນລຶບລ້າງຄວາມທຸກຍາກໃນທົ່ວປະເທດຈີນໄດ້ຈັດຂຶ້ນຢ່າງຍິ່ງໃຫຍ່ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ.
ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ມອບຫຼຽນໄຊ, ໃບຍ້ອງຍໍໃຫ້ທ່ານນາງ ຈາງກຸຍເມີຍ ຜູ້ອໍານວຍການໃຫຍ່ຂອງໂຮງຮຽນມັດທະຍົມປາຍແມ່ຍິງ ເມືອງຫົວຜິງ, ທີ່ໄດ້ຮັບນາມມະຍົດວ່າ ຜູ້ເປັນແບບຢ່າງໃນການລຶບລ້າງຄວາມທຸກຍາກທົ່ວປະເທດ.
ທ່ານນາງ ຈາງກຸຍເມີຍ,ອາຍຸ 63 ປີ, ໄດ້ເຮັດວຽກດ້ານການສຶກສາ ຢູ່ເມືອງລີຈ່ຽງ ແຂວງຢຸນນານ ປະເທດຈີນ ເປັນເວລາຫຼາຍກວ່າ 40 ປີແລ້ວ.
ໃນເດືອນ ຕຸລາ ປີ 1974, ທ່ານນາງ ຈາງກຸຍເມີຍ ໄດ້ຈາກບ້ານເກີດຂອງລາວຢູ່ແຂວງ ເຮີຍຫຼົງຈ່ຽງ (ພາກເໜືອທີ່ສຸດຂອງປະເທດຈີນ) ມາ ແຂວງຢຸນນານ (ພາກຕາເວັນຕົກສ່ຽງໃຕ້ຂອງຈີນ) ເພື່ອສະໜັບສະໜູນການກໍ່ສ້າງດ້ານການສຶກສາຂອງແຂວງຢຸນນານ. ໃນເວລານັ້ນຢູ່ແຂວງຢຸນນານ, ຜູ້ຍິງຫຼາຍຄົນຈາກຄອບຄົວທຸກຍາກຖືກບັງຄັບໃຫ້ແຕ່ງງານກ່ອນໄວຮຽນ, ສຳລັບພວກເຂົາການສຶກສາແມ່ນຄວາມໄຝ່ຝັນທີ່ຫ່າງໄກ. ທ່ານນາງ ຈາງກຸຍເມີຍ ຕ້ອງການໃຫ້ແມ່ຍິງເຫຼົ່ານີ້ທີ່ມີຊີວິດຢູ່ພູເຂົາກໍ່ສາມາດໄດ້ເຂົ້າຮຽນ ແລະ ເຫັນໂລກກວ້າງ. ນາງເຊື່ອວ່າ, ມີພຽງແຕ່ຜ່ານການສຶກສາເທົ່ານັ້ນ ຈິ່ງສາມາດປ່ຽນແປງໂຊກຊະຕາຂອງເດັກນ້ອຍ. ດັ່ງນັ້ນ, ນາງມີຄວາມຄິດທີ່ຈະ ກໍ່ສ້າງໂຮງຮຽນມັດທະຍົມແມ່ຍິງໂດຍບໍ່ເສຍຄ່າຮຽນ.
ທ່ານນາງ ຈາງກຸຍເມີຍ ເລີ່ມລະດົມເງິນບໍລິຈາກ, ໂດຍໄດ້ຮັບການສະໜັບສະໜູນຈາກລັດຖະບານ, ອໍານາດການປົກຄອງທຸກຂັ້ນ ແລະທຸກວົງການໃນສັງຄົມ, ໂຮງຮຽນມັດທະຍົມຕອນປາຍສຳລັບແມ່ຍິງແບບບໍ່ເສຍຄ່າຮຽນ ແຫ່ງທຳອິດຂອງຈີນໄດ້ຖືກສ້າງຂຶ້ນໃນເມືອງຫົວຜິງ ແຂວງຢຸນນານ ໃນປີ 2008. ໃນໄລຍະ 12 ປີ, ທ່ານນາງ ຈາງກຸຍເມີຍ ໄດ້ຊ່ວຍໃຫ້ແມ່ຍິງຜູ້ທຸກຍາກ 1,804 ຄົນທີ່ອາດຈະອອກໂຮງຮຽນ ໄດ້ມີໂອກາດເຂົ້າມະຫາວິທະຍາໄລ! ຫຼັງຈາກຮຽນຈົບ, ນັກຮຽນສ່ວນໃຫຍ່ເຫຼົ່ານີ້ໄດ້ເລືອກເອົາອາຊີບເຊັ່ນເປັນຄູອາຈານ, ແພດ, ຕຳຫຼວດ... ພວກເຂົາເວົ້າວ່າ,ທ່ານນາງ ຈາງກຸຍເມີຍ ໄດ້ປ່ຽນແປງຊີວິດຂອງພວກເຂົາ.