ຕອນບ່າຍວັນທີ 28 ກຸມພາແລ້ວນີ້ຕາມເວລາທ້ອງຖິ່ນ, ວັກຊີນໂຄວິດ-19 ທີ່ຜະລິດໂດຍບໍລິສັດຊິໂນແວກ ທີ່ຈີນຊ່ວຍເຫຼືອຟິລິບປິນນັ້ນ ໄດ້ຂົນສົ່ງໄປຮອດຖານທັບອາກາດ ວິວລາໂມ ທີ່ຕັ້ງຢູ່ນະຄອນຫຼວງມານີລາ, ນີ້ແມ່ນວັກຊີນໂຄວິດ-19 ງວດທຳອິດທີ່ຟິລິບປິນໄດ້ຮັບ. ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ແລະທ່ານຮວງຊີ່ລຽນ ເອກອັກຄະລັດຖະທູດຈີນປະຈຳຟິລິບປິນໄດ້ອອກໄປຮັບວັກຊີນຢູ່ສະໜາມບິນ. ນອກຈາກວັກຊີນທີ່ລັດຖະບານຈີນຊ່ວຍເຫຼືອລັດຖະບານຟິລິບປິນແລ້ວ, ວັກຊີນທີ່ກອງທັບປົດປ່ອຍປະຊາຊົນຈີນຊ່ວຍເຫຼືອຝ່າຍທະຫານຟິລິບປິນກໍ່ໄດ້ຂົນສົ່ງໄປຮອດຟິລິບປິນໃນເວລາດຽວກັນ.
ທ່ານດູເຕີເຕ ປະທານາທິບໍດີຟິລິບປິນໄດ້ສະແດງຄວາມຂອບໃຈຕໍ່ຈີນທີ່ໄດ້ໃຫ້ການຊ່ວຍເຫຼືອວັກຊີນແກ່ຟິລິບປິນ, ໂດຍເຫັນວ່າ: ວັກຊີນງວດນີ້ກໍເປັນບາດກ້າວໜຶ່ງທີ່ຊ່ວຍໃຫ້ຟິລິບປິນສາມາດເອົາຊະນະໃນການຕ້ານກັບການແຜ່ລະບາດຂອງພະຍາດໂຄວິດ-19. ພ້ອມກັນນັ້ນ, ທ່ານດູເຕີເຕ ຍັງກ່າວວ່າ: ຖ້າວ່າ, ການແຜ່ລະບາດຂອງພະຍາດໂຄວິດ-19 ສາມາດສິ້ນສຸດລົງພາຍໃນປີນີ້, ທ່ານຈະເດີນທາງໄປຢ້ຽມຢາມທ່ານປະທານສີຈີ້ນຜິງ ເພື່ອສະແດງຄວາມຂອບອົກຂອບໃຈ ຈີນດ້ວຍຕົນເອງ.