ຕາມຂ່າວCRI：ວັນທີ 1 ມີນານີ້, ທ່ານຫຼີ ສຽວ ເພີງ, ລັດຖະມົນຕີກະຊວງການຄົມມະນາຄົມແລະຂົນສົ່ງຈີນກ່າວໃນກອງປະຊຸມຂ່າວທີ່ຈັດຂຶ້ນໂດຍຫ້ອງຖະແຫຼງຂ່າວຂອງລັດຖະບານຈີນວ່າ: ຄາດຄະເນວ່າເມື່ອຮອດປີ 2035, ຂະໜາດຕາໜ່າງ ສັງລວມແຫ່ງຊາດຈີນຈະບັນລຸປະມານ 7 ແສນກິໂລແມັດ, ໃນນັ້ນມີທາງລົດໄຟປະມານ 2 ແສນກິໂລແມັດ, ທາງເຮືອລະດັບສູງປະມານ 2 ໝື່ນ 5 ພັນກິໂລແມັດ, ສະໜາມບິນພົນລະເຮືອນປະມານ 400 ແຫ່ງ. ພ້ອມກັນນີ້, ຈີນຍັງຈະເພີ່ມທະວີການກໍ່ສ້າງເຂດຈຸດສຸມດ້ານຄົມມະນາຄົມ, ປັບປຸງຕາໜ່າງການຂົນສົ່ງທີ່ມຸ່ງໜ້າສູ່ທົ່ວໂລກໃຫ້ສົມບູນຂຶ້ນຕື່ມອີກ.
ປັດຈຸບັນນີ້, ພະຍາດໂຄວິດ-19 ຍັງພວມແຜ່ລະບາດຢ່າງຮ້າຍແຮງໃນທົ່ວໂລກ, ສະພາບພະຍາດໄດ້ເປັນສິ່ງທັກທາຍທີ່ຂ້ຽວຂາດຕໍ່ການຈໍລະຈອນສາກົນແລະຕໍ່ລະບົບຕ່ອງໂສ້ການສະໜອງ. ທ່ານຫຼີສຽວເພີງກ່າວວ່າ, ເພື່ອຮັບປະກັນຄວາມໝັ້ນທ່ຽງຂອງຕ່ອງໂສ້ການສະໜອງຂອງສາກົນ, ຈີນໄດ້ປະຕິບັດມາດຕະການການເພີ່ມທະວີຄວາມສາມາດດ້ານການຂົນສົ່ງທາງລົດໄຟຈີນ-ເອີຣົບແລະມາດຕະການຕ່າງໆ, ເພື່ອຮັບປະກັນໃຫ້ຕ່ອງໂສ້ການສະໜອງມີຄວາມສະດວກ.