ຕອນບ່າຍຂອງວັນທີ 4 ມີນານີ້, ກອງປະຊຸມຄັ້ງທີ 4 ຂອງສະພາປຶກສາການເມືອງປະຊາຊົນແຫ່ງຊາດຈີນສະໄໝທີ 13 ໄດ້ໄຂຂຶ້ນຢູ່ນະຄອນຫຼວງປັກກິ່ງຂອງຈີນ. ທ່ານສີຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ພ້ອມດ້ວຍຜູ້ນຳພັກ ແລະລັດ ທ່ານອື່ນໆຂອງຈີນໄດ້ເຂົ້າຮ່ວມ.
ທ່ານວ່າງຢາງ, ປະທານສະພາປຶກສາການເມືອງປະຊາຊົນແຫ່ງຊາດຈີນໄດ້ຕາງໜ້າຄະນະກຳມະການປະຈຳສະພາປຶກສາການເມືອງປະຊາຊົນແຫ່ງຊາດຈີນຜ່ານບົດລາຍງານຕໍ່ກອງປະຊຸມຄັ້ງນີ້ ໂດຍໄດ້ທົບທວນຄືນວຽກງານຂອງສະພາປຶກສາການເມືອງປະຊາຊົນແຫ່ງຊາດຈີນໃນປີ 2020 ແລະແຜນການວຽກງານໃນປີ 2021.
ກອງປະຊຸມໃນຄັ້ງນີ້ຈະດຳເນີນໄປເປັນເວລາ 7 ວັນ. ສະມາຊິກສະພາປຶກສາການເມືອງປະຊາຊົນແຫ່ງຊາດຈີນທີ່ມາຈາກພັກຝ່າຍຕ່າງໆ, ຊົນເຜົ່າ ແລະວົງການຕ່າງໆ ຈຳນວນ 2100 ກວ່າທ່ານໄດ້ເຂົ້າຮ່ວມກອງປະຊຸມໃນຄັ້ງນີ້ ໂດຍຈະພິຈາລະນາກ່ຽວກັບບົດລາຍງານວຽກງານຂອງຄະນະກໍາມະການປະຈຳສະພາປຶກສາການເມືອງປະຊາຊົນແຫ່ງຊາດຈີນ ແລະບົດລາຍງານກ່ຽວກັບສະພາບການຍື່ນຍັດຕິ ແລະເຂົ້າຮ່ວມກອງປະຊຸມສະພາປະຊາຊົນແຫ່ງຊາດຈີນ, ຮັບຟັງ ແລະປຶກສາຫາລືກ່ຽວກັບບົດລາຍງານວຽກງານລັດຖະບານ, ແຜນພັດທະນາເສດຖະກິດສັງຄົມ 5 ປີຄັ້ງທີ 14, ແຜນການເປົ້າໝາຍໄລຍະຍາວປີ 2035 ສະບັບຮ່າງ.