(ກອງປະຊຸມສອງສະພາ)ຈີນຈະປະຕິບັດການເປີດປະຕູສູ່ພາຍນອກໃນຂອບເຂດກວ້າງຂວາງກວ່າເກົ່າ, ກວມຂົງເຂດຫຼາຍກວ່າເກົ່າ ແລະ ມີລະດັບສູງກວ່າເກົ່າ
ວັນທີ 5 ມີນານີ້, ໃນເວລາທ່ານຫຼີເຄີ້ສຽງ ນາຍົກລັດຖະມົນຕີຈີນຜ່ານບົດລາຍງານວຽກງານລັດຖະບານໃນກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນສະໄໝທີ 13, ທ່ານກ່າວວ່າ: ຈີນຈະຊຸກຍູ້ການຄ້າກັບຕ່າງປະເທດແລະການລົງທຶນຈາກຕ່າງປະເທດໃຫ້ພັດທະນາຢ່າງໝັ້ນທ່ຽງແລະມີຄຸນນະພາບສູງຂຶ້ນ. ປະຕິບັດການເປີດປະຕູສູ່ພາຍນອກໃນຂອບເຂດກວ້າງຂວາງກວ່າເກົ່າ, ກວມຂົງເຂດຫຼາຍກວ່າເກົ່າ ແລະ ມີລະດັບສູງກວ່າເກົ່າ, ເພື່ອເຂົ້າຮ່ວມການຮ່ວມມືດ້ານເສດຖະກິດໃນສາກົນໃຫ້ດີກວ່າເກົ່າ.
ຊຸກຍູ້ການຄ້າຂາເຂົ້າຂາອອກໃຫ້ພັດທະນາຢ່າງໝັ້ນທ່ຽງ. ເພີ່ມການສະໜັບສະໜູນດ້ານເງິນກູ້ສິນເຊື່ອໃຫ້ກັບວິສາຫະກິດການຄ້າຕ່າງປະເທດຂະໜາດກາງແລະນ້ອຍ. ພັດທະນາການຄ້າຜະລິດຕະພັນປຸງແຕ່ງໃຫ້ໝັ້ນທ່ຽງ, ພັດທະນາອຸດສາຫະກຳໃໝ່ແລະຮູບແບບອຸດສາຫະກຳໃໝ່ເຊັ່ນການຄ້າເອເລັກໂຕຣນິກຂ້າມຊາດເປັນຕົ້ນ, ສະໜັບສະໜູນວິສາຫະກິດບຸກເບີກຕະຫຼາດທີ່ມີຫຼາຍເຄົ້າ. ພັດທະນາການຄ້າການບໍລິການດ້ວຍການປະດິດສ້າງໃໝ່.
ຊຸກຍູ້ໃຫ້ການຈໍລະຈອນສິນຄ້າສາກົນມີຄວາມສະດວກສະບາຍ, ເຮັດໃຫ້ການເກັບຄ່າທຳນຽມຢູ່ຕາມດ່ານເປັນແບບສະບັບ, ເຮັດໃຫ້ການແຈ້ງດ່ານມີຄວາມສະດວກສະບາຍກວ່າເກົ່າຢ່າງບໍ່ຢຸດຢັ້ງ.
ຕັ້ງໜ້ານຳໃຊ້ທຶນຕ່າງປະເທດຢ່າງບັງເກີດຜົນ, ຫຼຸດບັນຊີດ້ານລົບໃນການອະນຸມັດທຶນຕ່າງປະເທດໃຫ້ໜ້ອຍລົງຕື່ມອີກ. ຊຸກຍູ້ການເປີດປະຕູສູ່ພາຍນອກຂອງຂະແໜງການບໍລິການຢ່າງເປັນລະບຽບຮຽບຮ້ອຍ. ເສີມຂະຫຍາຍບົດບາດຂອງບໍລິສັດລະດົມທຶນຢູ່ເຂດພັດທະນາປະເພດຕ່າງໆໃຫ້ດີ, ຊຸກຍູ້ໃຫ້ວິສາຫະກິດທຶນພາຍໃນປະເທດ ແລະ ທຶນຕ່າງປະເທດແຂ່ງຂັນກັນຢ່າງຍຸຕິທຳ, ປົກປ້ອງສິດ ແລະ ຜົນປະໂຫຍດທີ່ຖືກຕ້ອງຕາມກົດໝາຍຂອງວິສາຫະກິດທຶນຕ່າງປະເທດຕາມກົດໝາຍ. ຍິນດີຕ້ອນຮັບນັກທຸລະກິດຕ່າງປະເທດເປີດກວ້າງການລົງທຶນຢູ່ຈີນ, ຊົມໃຊ້ຕະຫຼາດໃຫຍ່ທີ່ເປີດປະຕູສູ່ພາຍນອກ ແລະ ໂອກາດການພັດທະນາຂອງຈີນ.
ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ. ຍຶດໝັ້ນການປຶກສາຫາລືຮ່ວມກັນ, ສ້າງສາຮ່ວມກັນ ແລະ ຊົມໃຊ້ຮ່ວມກັນ, ຍຶດໝັ້ນຖານະຕົ້ນຕໍຂອງວິສາຫະກິດ, ປະຕິບັດຕາມຫຼັກການແບບຕະຫຼາດ, ປັບປຸງລະບົບການລົງທຶນ ແລະ ລະດົມທຶນທີ່ມີຫຼາຍຮູບແບບນັ້ນໃຫ້ສົມບູນແບບ, ຊຸກຍູ້ການຮ່ວມມືໃນໂຄງການໃຫຍ່ຢ່າງເປັນລະບຽບ, ຊຸກຍູ້ການເຊື່ອມຈອດກັນດ້ານພື້ນຖານໂຄງລ່າງ. ຍົກສູງຄຸນນະພາບແລະປະສິດທິພາບຂອງການລົງທຶນ ແລະ ການຮ່ວມມືກັບຕ່າງປະເທດ.
ລົງເລິກການຮ່ວມມືເສດຖະກິດລະຫວ່າງສອງຝ່າຍ ຫຼາຍຝ່າຍ ກໍຄື ພາກພື້ນ. ຍຶດໝັ້ນປົກປັກຮັກສາໂຄງປະກອບການຄ້າຫຼາຍຝ່າຍ. ຊຸກຍູ້ໃຫ້ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ ຫຼື RECP ໃຫ້ບັງເກີດຜົນ ແລະ ໄດ້ຮັບການປະຕິບັດໂດຍໄວ, ຊຸກຍູ້ການເຊັນສັນຍາການລົງທຶນຈີນ-ເອີຣົບ, ເລັ່ງລັດຂະບວນການເຈລະຈາສັນຍາການຄ້າເສລີຈີນ-ຍີ່ປຸ່ນ-ສ.ເກົາຫຼີໃຫ້ໄວເຂົ້າ, ຕັ້ງໜ້າພິຈາລະນາເຂົ້າເປັນສະມາຊິກໃນສັນຍາການພົວພັນຄູ່ຮ່ວມຂ້າມມະຫາສະໝຸດປາຊີຟິກທີ່ຮອບດ້ານແລະກ້າວໜ້າ. ບົນພື້ນຖານເຄົາລົບເຊິ່ງກັນແລະກັນ, ຊຸກຍູ້ການພົວພັນທາງເສດຖະກິດການຄ້າທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນແລະອາເມຣິກາໃຫ້ຂະຫຍາຍຕົວໄປໜ້າ. ຈີນຍິນດີເປີດກວ້າງການເປີດປະຕູສູ່ພາຍນອກກັບປະເທດຕ່າງໆໃນໂລກ ເພື່ອບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດ.