ວັນທີ 7 ມີນານີ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ກ່າວວ່າ, ຖ້ອຍຄວາມທີ່ວ່າເຂດຊິ່ນຈ່ຽງມີການດັບສູນເຊື້ອຊາດນັ້ນໜ້າຫົວຂວັນທີ່ສຸດ, ແມ່ນຂ່າວລືທີ່ມີເຈດຕະນາທີ່ບໍ່ດີ, ທັງເປັນຄຳເວົ້າຂີ້ຕົວະທັງໝົດ. ພວກເຮົາຍິນດີຕ້ອນຮັບປະຊາຊົນບັນດາປະເທດເດີນທາງຢ້ຽນຢາມເຂດຊິ່ນຈ່ຽງ, ສິບປາກເວົ້າບໍ່ທໍ່ຕາເຫັນ, ຂ່າວລືກໍຈະໝົດສິ້ນໄປເອງເມື່ອຜະເຊີນກັບຄວາມເປັນຈິງ.
ຕໍ່ກັບຄຳເວົ້າຂອງອາເມຣິກາ ແລະປະເທດຕາເວັນຕົກຈຳນວນໜຶ່ງທີ່ກ່ຽວຂ້ອງກັບເຂດຊິ່ນຈ່ຽງ, ທ່ານວາງຢີ້ໄດ້ຕອບໂຕ້ຢູ່ທີ່ກອງປະຊຸມຂ່າວຂອງກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນສະໄໝທີ 13. ທ່ານກ່າວວ່າ: ໃນເຂດຊິນຈ່ຽງປະເທດຈີນ, ໃນໄລຍະເວລາ 40 ປີທີ່ຜ່ານມາ, ປະຊາຊົນເຜົ່າອຸຍເກີໄດ້ເພີ່ມຂຶ້ນ 5,55 ລ້ານຄົນເປັນ 12 ລ້ານກວ່າຄົນ ເຊິ່ງເພີ່ມຂຶ້ນ 1 ເທົ່າ. ໃນໄລຍະເວລາ 60 ປີທີ່ຜ່ານມາ, ຍອດປະລິມານເສດຖະກິດຂອງເຂດຊິ່ນຈ່ຽງໄດ້ເພີ່ມຂຶ້ນ 200 ກວ່າເທົ່າ, ຄາດໝາຍອາຍຸຍືນທີ່ສະເລ່ຍຂອງຊາວຊິ່ນຈ່ຽງໄດ້ເພີ່ມຂຶ້ນຈາກ 30 ເປັນ 72 ປີ. ຊາວຕ່າງປະເທດຈຳນວນຫລວງຫລາຍທີ່ເຄີຍໄປເຂດຊິ່ນຈ່ຽງກໍໄດ້ເວົ້າວ່າ: ເຂດຊິ່ນຈ່ຽງທີ່ເຂົາເຈົ້າໄດ້ເຫັນກັບຕານັ້ນຕ່າງກັນຫລາຍກັບການລາຍງານຂ່າວຈາກບາງສື່ຂອງປະເທດຕາເວັນຕົກ.