ວັນທີ 8 ມີນານີ້, ທ່ານວາງເວີນທ່າວ ລັດຖະມົນຕີກະຊວງການຄ້າຈີນໄດ້ເປີດເຜີຍໃຫ້ຮູ້ວ່າ: ປັດຈຸບັນ, ລັດຖະບານຈີນໄດ້ໃຫ້ສັດຕະຍາບັນກ່ຽວກັບສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ ຫຼື RCEPຢ່າງເປັນທາງການ, ຫວັງວ່າປະເທດທີ່ກ່ຽວຂ້ອງຈະສາມາດເລັ່ງລັດວຽກງານທີ່ກ່ຽວຂ້ອງ. ທ່ານຍັງກ່າວວ່າ: ໃນປີນີ້, ຈີນຈະເປີດປະຕູສູ່ພາຍນອກຂອງປະເທດຈີນໃຫ້ກວ້າງກວ່າເກົ່າ ແລະມີເງື່ອນໄຂສະດວກກວ່າເກົ່າ.
ທ່ານວາງເວີນທ່າວກ່າວວ່າ, ການເຊັນສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນມີຄວາມໝາຍຫລາຍ ເພາະພາກພື້ນນີ້ກວມ 1/3 ຂອງຍອດປະລິມານເສດຖະກິດທົ່ວໂລກ, ກາຍເປັນຕະຫລາດຮ່ວມຂະໜາດໃຫຍ່ ເຊິ່ງເຕັມໄປດ້ວຍຄວາມສາມາດບົ່ມຊ້ອມ ແລະພະລັງຊີວິດ. ຈີນໄດ້ສ້າງຕັ້ງກົນໄກເຮັດວຽກການໃຫ້ສັດຕະຍາບັນ ແລະຈັດຕັ້ງປະຕິບັດສັນຍາ RCEP ໂດຍສະເພາະ.
ທ່ານກ່າວຕື່ມວ່າ, ຈີນໄດ້ສຳເລັດການເຈລະຈາສັນຍາການລົງທຶນລະຫວ່າງຈີນ ກັບເອີຣົບ ແລະຈະເລັ່ງການລົງນາມຢ່າງເປັນທາງການໂດຍໄວ, ນອກນີ້, ຍັງໄດ້ຕັ້ງໜ້າຊຸກຍູ້ການເຈລະຈາສັນຍາເຂດການຄ້າເສລີຈີນ, ຍີ່ປຸ່ນ ແລະ ສ ເກົາຫລີ. ຈີນຕັ້ງໜ້າພິຈາລະນາການເຂົ້າຮ່ວມສັນຍາການພົວພັນຄູ່ຮ່ວມຂ້າມປາຊີຟິກຮອບດ້ານ ແລະກ້າວໜ້າ ຫລື CPTPPອີກດ້ວຍ, ໂດຍໄດ້ດຳເນີນວຽກງານກະກຽມຢ່າງຫລວງຫລາຍ ແລະໄດ້ຕິດຕໍ່ພົວພັນກັບຝ່າຍ CPTPP ຢ່າງບໍ່ເປັນທາງການ ເຊິ່ງກຳລັງຂຸ້ນຂ້ຽວດຳເນີນວຽກທີ່ກ່ຽວຂ້ອງ.