ວັນທີ 10 ມີນານີ້, ໃນກອງປະຊຸມຖະແຫຼງຂ່າວປະຈຳ, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວວ່າ, ໃນຂະນະທີ່ຈີນອອກແຮງລຶບລ້າງຄວາມທຸກຍາກຂອງຕົນ, ຈີນຍັງໄດ້ຕັ້ງໜ້າເຂົ້າຮ່ວມການຮ່ວມມືສາກົນເພື່ອຫຼຸດຜ່ອນຄວາມທຸກຍາກສາກົນ.
ອີງຕາມຂ່າວລາຍງານວ່າ, ຫວ່າງມໍ່ໆມານີ້, ທ່ານອັນໂຕນີໂອ ກູເຕີເຣສ ເລຂາທິການໃຫຍ່ອົງການສະຫະປະຊາຊາດໄດ້ສົ່ງສານຊົມເຊີຍຝ່າຍຈີນທີ່ສາມາດຍາດເອົາໄຊຊະນະໃນບັ້ນລຶບລ້າງຄວາມທຸກຍາກຢ່າງຮອບດ້ານ, ທ່ານກ່າວວ່າຜົນສຳເລັດອັນໂດດເດັ່ນທີ່ຈີນໄດ້ຮັບນັ້ນຈະນຳເອົາຄວາມຫວັງມາໃຫ້ແກ່ປະຊາຄົມໂລກ, ແລະເປັນການໃຫ້ກຳລັງໃຈແກ່ຊາວໂລກ.
ທ່ານຈ້າວລີ້ຈ່ຽນກ່າວວ່າ, ຈີນໄດ້ສະເໜີຂໍ້ລິເລີ່ມສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ, ໄດ້ອອກແຮງຊຸກຍູ້ປະເທດທີ່ຢູ່ລຽບຕາມ “ ໜຶ່ງແລວໜຶ່ງເສັ້ນທາງ” ໃຫ້ພັດທະນາເສດຖະກິດ, ຊ່ອຍເຫຼືອພວກເຂົາເຈົ້າໃຫ້ບັນລຸເປົ້າໝາຍໃນການຫຼຸດຜ່ອນຄວາມທຸກຍາກຕາມວາລະການພັດທະນາແບບຍຶນຍົງປີ 2030 ຂອງອົງການສະຫະປະຊາຊາດ, ໄດ້ຊຸກຍູ້ການຮ່ວມມືພັດທະນາເສດຖະກິດສັງຄົມຂອງເຂດແຄວ້ນໃຫ້ກວ້າງຂວາງກວ່າເກົ່າ, ລະດັບສູງກວ່າເກົ່າແລະເລິກເຊິ່ງກວ່າເກົ່າ.