ກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນສະໄໝທີ 13 ໄດ້ລົງຄະແນນສຽງ ຮັບຮອງ “ມະຕິກ່ຽວກັບການປັບປຸງລະບຽບການເລືອກຕັ້ງຢູ່ເຂດບໍລິຫານພິເສດຮົງກົງຂອງສະພາປະຊາຊົນແຫ່ງຊາດຈີນ”, ນີ້ແມ່ນມາດຕະການອັນສຳຄັນຂອງຈີນເພື່ອຍຶດໝັ້ນ ແລະ ປັບປຸງລະບົບລະບຽບການ “ປະເທດດຽວສອງລະບອບ” ແລະ ຮັກສາຄວາມໝັ້ນຄົງອັນຍາວນານຂອງຮົງກົງ, ເຊິ່ງຈະສະໜອງການຮັບປະກັນດ້ານລະບອບທີ່ໝັ້ນແກ່ນກວ່າເກົ່າໃຫ້ແກ່ການຈັດຕັ້ງປະຕິບັດທິດທາງ “ໃຫ້ຜູ້ຮັກຊາດປົກຄອງຮົງກົງ” ຢ່າງຮອບດ້ານ.
ນັບແຕ່ຮົງກົງກັບຄືນສູ່ປະເທດຊາດເປັນຕົ້ນມາ, ສູນກາງຈີນກໍແມ່ນຜູ້ຊີ້ນຳ ແລະ ຜູ້ຊຸກຍູ້ການພັດທະນາລະບຽບການປະຊາທິປະໄຕຂອງຮົງກົງມາໂດຍຕະຫຼອດ. ໃນຖານະທີ່ເປັນອົງການອຳນາດແຫ່ງຊາດສູງສຸດ, ການທີ່ສະພາປະຊາຊົນແຫ່ງຊາດຈີນຜ່ານມະຕິເພື່ອປັບປຸງລະບຽບການເລືອກຕັ້ງຂອງເຂດພິເສດຮົງກົງໃຫ້ສົມບູນຂຶ້ນນັ້ນ ແມ່ນສິດອຳນາດ ແລະ ໜ້າທີ່ຮັບຜິດຊອບ ທີ່ມອບໝາຍໂດຍລັດຖະທຳມະນູນ ແລະ ກົດໝາຍພື້ນຖານຮົງກົງ, ເຊິ່ງຈະສາມາດຮັກສາຜົນປະໂຫຍດສັງລວມ ແລະ ຜົນປະໂຫຍດພື້ນຖານຂອງສັງຄົມຮົງກົງໃຫ້ໄດ້ດີກວ່າເກົ່າ, ຈະຊຸກຍູ້ລະບຽບການປະຊາທິປະໄຕຂອງຮົງກົງໃຫ້ກ້າວໄປໜ້າຢ່າງໜັກແໜ້ນ ທັງຈະຮັບປະກັນໃຫ້ທິດທາງ “ປະເທດດຽວສອງລະບອບ” ໄດ້ຮັບການຈັດຕັ້ງປະຕິບັດຢ່າງໝັ້ນທ່ຽງ ແລະ ຍາວນານ.
ການທີ່ທິດທາງ “ປະເທດດຽວສອງລະບອບ” ສືບຕໍ່ໄດ້ຮັບການຈັດຕັ້ງປະຕິບັດຢ່າງສຳເລັດຜົນຢູ່ຮົງກົງ ແລະ ຮົງກົງຮັກສາຄວາມຈະເລີນຮຸ່ງເຮືອງ ແລະ ສະຖຽນລະພາບເປັນເວລາຍາວນານນັ້ນ ແມ່ນສອດຄ່ອງກັບຜົນປະໂຫຍດຂອງຈີນ ທັງສອດຄ່ອງກັບຜົນປະໂຫຍດຮ່ວມຂອງປະຊາຄົມໂລກ. ຄວາມຕັດສິນໃຈ ແລະ ຄວາມໝັ້ນໃຈຂອງຈີນໃນການຍຶດໝັ້ນປະຕິບັດທິດທາງ “ປະເທດດຽວສອງລະບອບ” ຈະບໍ່ຫວັ່ນໄຫວຄອນແຄນ, ຄວາມຕັດສິນໃຈ ແລະ ເຈດຕະນາທີ່ຄັດຄ້ານອິດທິກຳລັງພາຍນອກໃດໆແຊກແຊງວຽກງານພາຍໃນຂອງຈີນ ກໍຈະບໍ່ຫວັ່ນໄຫວຄອນແຄນເຊັ່ນກັນ. ພວກເຮົາເຊື່ອໝັ້ນວ່າ, ການພັດທະນາຂອງຮົງກົງໃນອະນາຄົດຈະນັບມື້ນັບດີຂຶ້ນ.