ວັນທີ 14 ມີນານີ້, ໂຄສົກຫ້ອງການວຽກງານຮົງກົງ, ມາເກົາ ແລະ ໄຕ້ຫວັນຂອງຄະນະລັດຖະບານຈີນໄດ້ອອກຖະແຫຼງການຕອບໂຕ້ກຸ່ມ 7 ປະເທດທີ່ໄດ້ອອກຖະແຫຼງການກ່າວໂຈມຕີມະຕິຂອງສະພາປະຊາຊົນແຫ່ງຊາດຈີນໃນການປັບປຸງລະບຽບການເລືອກຕັ້ງຂອງເຂດບໍລິຫານພິເສດຮົງກົງໃຫ້ສົມບູນຂຶ້ນ ແລະ ສະແດງຄວາມຄັດຄ້ານຢ່າງຮຸນແຮງຕໍ່ປະເທດທີ່ກ່ຽວຂ້ອງທີ່ແຊກແຊງວຽກງານພາຍໃນຂອງຈີນ.
ໂຄສົກທ່ານນີ້ກ່າວວ່າ: ຫວ່າງກ່ອນນີ້ບໍ່ດົນ, ສະພາປະຊາຊົນແຫ່ງຊາດຈີນໄດ້ຮັບຮອງມະຕິກ່ຽວກັບການປັບປຸງລະບຽບການເລືອກຕັ້ງຂອງເຂດບໍລິຫານພິເສດຮົງກົງໃຫ້ສົມບູນຂຶ້ນ ເຊິ່ງມີຈຸດປະສົງເພື່ອສ້າງພື້ນຖານດ້ານລະບຽບການທີ່ໝັ້ນແກ່ນ ເພື່ອຮັບປະກັນໃຫ້ແນວທາງ “ປະເທດດຽວສອງລະບອບ” ໄດ້ຮັບການຈັດຕັ້ງປະຕິບັດຢູ່ຮົງກົງຢ່າງໜັກແໜ້ນ ແລະ ຖາວອນ. ນີ້ເປັນຄວາມປາຖະໜາຮ່ວມຂອງປະຊາຊົນທົ່ວປະເທດຈີນ ເຊິ່ງລວມທັງພີ່ນ້ອງຮ່ວມຊາດຮົງກົງ, ເປັນນະໂຍບາຍພື້ນຖານທີ່ຮັບປະກັນສະຖຽນລະພາບຢູ່ຮົງກົງ. ສະພາປະຊາຊົນແຫ່ງຊາດຈີນໄດ້ດັດແກ້ ແລະ ປັບປຸງລະບຽບການເລືອກຕັ້ງຂອງເຂດບໍລິຫານພິເສດຮົງກົງໃຫ້ສົມບູນຂຶ້ນ ເຊິ່ງເປັນວຽກງານພາຍໃນຂອງຈີນລ້ວນໆ, ປະເທດອື່ນລ້ວນແຕ່ບໍ່ມີສິດຊີ້ນັ້ນສັ່ງນີ້ກ່ຽວກັບເລື່ອງນີ້. ຖະແຫຼງການຂອງກຸ່ມ 7 ປະເທດທີ່ກ່ຽວກັບເລື່ອງດັ່ງກ່າວເປັນການບິດເບືອນຄວາມຈິງ ແລະ ຫຼົບລີ້ນປີ້ນຄວາມ, ໄດ້ລະເມີດກົດໝາຍສາກົນ ແລະ ຫຼັກການພື້ນການໃນການພົວພັນລະຫວ່າງຊາດ, ເປັນການແຊກແຊງວຽກງານພາຍໃນຂອງຈີນຢ່າງຮ້າຍກາດ.