ວັນທີ 16 ມີນານີ້, ຫ້ອງການສະຖິຕິແຂວງຢຸນນານໄດ້ເປີດເຜີຍຂໍ້ມູນໂດຍສະແດງໃຫ້ເຫັນວ່າ, ແຕ່ເດືອນມັງກອນຫາເດືອນກຸມພາໃນປີນີ້, ຕົວຊີ້ວັດທາງດ້ານເສດຖະກິດຕົ້ນຕໍຂອງແຂວງຢຸນນານໄດ້ເພີ່ມຂື້ນຢ່າງຫຼວງຫຼາຍ, ການດຳເນີນງານດ້ານເສດຖະກິດສະແດງທ່າອ່ຽງການຟື້ນຟູທີ່ໝັ້ນທ່ຽງຢ່າງຕໍ່ເນື່ອງນັບຕັ້ງແຕ່ປີທີ່ຜ່ານມາ, ແລະ ຄວາມຄາດຫວັງຂອງຕະຫຼາດສືບຕໍ່ດີຂຶ້ນ.
ໃນເດືອນມັງກອນຫາເດືອນກຸມພາ, ການຜະລິດອຸດສາຫະກຳໃນແຂວງຢຸນນານໄດ້ເພີ່ມຂື້ນຢ່າງໄວວາ, ແລະ ມູນຄ່າເພີ່ມຂອງວິສາຫະກິດອຸດສາຫະກຳທັງໝົດທີ່ມີລາຍຮັບຂອງທຸລະກິດກາຍ 20 ລ້ານຢວນ,ໄດ້ເພີ່ມຂຶ້ນ 24.1% ເມື່ອທຽບໃສ່ໄລຍະດຽວກັນຂອງປີທີ່ຜ່ານມາ. ໃນນັ້ນ, ມູນຄ່າເພີ່ມຂອງຂະແໜງການບໍ່ແຮ່ໄດ້ເພີ່ມຂື້ນ 21,6%, ມູນຄ່າເພີ່ມຂອງຂະແໜງການການຜະລິດໄດ້ເພີ່ມຂຶ້ນ 23,7%, ມູນຄ່າເພີ່ມຂອງຂະແໜງການຜະລິດ ແລະ ການສະໜອງນ້ຳ, ແກັສ, ພະລັງງານຄວາມຮ້ອນ, ພະລັງງານໄຟຟ້າໄດ້ເພີ່ມຂື້ນ 27%.
ແຕ່ເດືອນມັງກອນຫາເດືອນກຸມພາ, ການລົງທຶນຊັບສິນຄົງທີ່ (ບໍ່ລວມຄອບຄົວກະສິກຳ) ໃນແຂວງຢຸນນານເພີ່ມຂຶ້ນ 50,2% ເມື່ອທຽບໃສ່ໄລຍະດຽວກັນຂອງປີກາຍນີ້, ໃນນັ້ນ,ການລົງທຶນກະສີກຳໄດ້ເພີ່ມຂຶ້ນ 1,1 ເທົ່າ, ການລົງທຶນອຸດສາຫະກຳໄດ້ເພີ່ມຂຶ້ນ 23,8% , ແລະ ການລົງທຶນການບໍລິການໄດ້ເພີ່ມຂຶ້ນ 52,5%.
ແຕ່ເດືອນມັງກອນຫາເດືອນກຸມພາ, ຍອດຂາຍຍ່ອຍສິນຄ້າບໍລິໂພກຂອງສັງຄົມຂອງແຂວງຢຸນນານບັນລຸໄດ້ 153,288 ຕື້ຢວນ, ເພີ່ມຂຶ້ນ 23,1% ເມື່ອທຽບໃສ່ໄລຍະດຽວກັນຂອງປີກາຍນີ້, ຍອດການຄ້າຕໍ່ຕ່າງປະເທດຂາເຂົ້າຂາອອກຂອງແຂວງຢຸນນານມີເຖິງ 54,580 ຕື້ຢວນ, ເພີ່ມຂຶ້ນ 86,2% ເມື່ອທຽບໃສ່ໄລຍະດຽວກັນຂອງປີກາຍນີ້, ສະແດງໃຫ້ເຫັນທ່າອ່ຽງການເຕີບໂຕຢ່າງໄວວາ.
ມາຈາກ: ໜັງສຶພິມລາຍວັນຢຸນນານ
ນັກຂ່າວ: ຫູຊຽວລົງ