ກະຊວງການຄ້າຈີນໄດ້ເປີດເຜີຍຕົວເລກຂໍ້ມູນຫຼ້າສຸດໂດຍສະແດງໃຫ້ເຫັນວ່າ: ແຕ່ເດືອນມັງກອນຫາເດືອນກຸມພາປີນີ້, ການລົງທຶນໂດຍກົງຂອງຕ່າງປະເທດໃນຈີນໄດ້ບັນລຸເຖິງ 176,76 ຕື້ຢວນ, ເພີ່ມຂຶ້ນ 31,5% ເມື່ອທຽບໃສ່ໄລຍະດຽວກັນຂອງປີກາຍ.
ທ່ານນາງ ເນ້ຍຜິງສ່ຽງ ນັກຄົ້ນຄວ້າຂອງສະຖາບັນຄົ້ນຄວ້າການຮ່ວມມືດ້ານເສດຖະກິດແລະການຄ້າສາກົນຂອງກະຊວງການຄ້າຈີນໄດ້ກ່າວໃນເວລາໃຫ້ສຳພາດຕໍ່ນັກຂ່າວວ່າ: ໃນ 2 ເດືອນຕົ້ນປີນີ້, ສາເຫດທີ່ເຮັດໃຫ້ຕົວເລກດ້ານການດຶງດູດການລົງທຶນຕົວຈິງຂອງຕ່າງປະເທດໃນຈີນເພີ່ມຂຶ້ນຢ່າງຫຼວງຫຼາຍນັ້ນຕົ້ນຕໍມີສອງດ້ານຄື: ດ້ານໜຶ່ງ, ໃນເດືອນມັງກອນຫາເດືອນກຸມພາປີ 2020 ພໍດີແມ່ນຢູ່ໃນໄລຍະທີ່ການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ຈີນເຂັ້ມງວດຫຼາຍ, ສະນັ້ນການລົງທຶນຕົວຈິງຂອງຕ່າງປະເທດໃນຈີນຈຶ່ງຫຼຸດລົງຢ່າງຫຼວງຫຼາຍ, “ຕົວເລກພື້ນຖານໃນໄລຍະດຽວກັນຂອງປີກາຍແມ່ນຢູ່ໃນລະດັບອ່າວຕ່ຳຈຶ່ງໄດ້ເຮັດໃຫ້ຈັງຫວະການເຕີບໂຕຂອງການລົງທຶນຂອງຕ່າງປະເທດໃນຈີນໃນເດືອນມັງກອນຫາເດືອນກຸມພາປີນີ້ເຫັນໄດ້ຢ່າງຈະແຈ້ງ”. ອີກດ້ານໜຶ່ງ, ພາຍໃຕ້ສະພາບທີ່ເສດຖະກິດໂລກໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19 ໃນປີ 2020, ຈີນໄດ້ນຳໜ້າໝູ່ໃນການຄວບຄຸມການແຜ່ລະບາດຂອງພະຍາດໂຄວິດ-19 ຢ່າງສຳເລັດຜົນ, ນຳໜ້າໝູ່ບັນລຸການຟື້ນຟູການເຮັດວຽກແລະການຜະລິດຄືນໃໝ່, ກາຍເປັນບ່ອນປອດໄພສຳລັບການລົງທຶນຂອງບໍລິສັດຂ້າມຊາດ. ປີ 2021, ເສດຖະກິດຈີນໄດ້ປະກົດມີທ່າອ່ຽງຂອງການເຕີບໂຕທີ່ນັບມື້ນັບດີຂຶ້ນ, ພາຍໃຕ້ສະພາບທີ່ການແຜ່ລະບາດຂອງພະຍາດໂຄວິດ-19 ຢູ່ປະເທດສຳຄັນຕົ້ນຕໍຍັງບໍ່ທັນສາມາດຄວບຄຸມໄວ້ໄດ້ຢ່າງຮອບດ້ານ,ແຮງດຶງດູດການລົງທຶນຂອງຕ່າງປະເທດໃນຈີນກໍຍິ່ງຈະເພີ່ມຂຶ້ນຕື່ມອີກ.