ວັນທີ 16 ມີນານີ້, ອາເມຣິກາ ແລະຍີ່ປຸ່ນໄດ້ຈັດກອງປະຊຸມພົບປະລະຫວ່າງລັດຖະມົນຕີກະຊວງການຕ່າງປະເທດ ແລະ ລັດຖະມົນຕີກະຊວງປ້ອງກັນປະເທດຂອງສອງປະເທດ ແລະ ໄດ້ອອກຖະແຫຼງການຮ່ວມ ໂດຍກ່າວວ່າ ການກະທຳຂອງຝ່າຍຈີນບໍ່ສອດຄ່ອງກັບລະບຽບສາກົນ, ເປັນການທ້າທາຍຕໍ່ປະຊາຄົມໂລກ, ນອກນີ້ຖະແຫຼງການຍັງໄດ້ສະແດງຄວາມສົນໃຈຕໍ່ບັນຫາຕ່າງໆ ເຊັ່ນ: ໄຕ້ຫວັນ, ຮົງກົງ ແລະ ເຂດຊິ່ນຈ່ຽງຂອງຈີນເປັນຕົ້ນ.
ຕໍ່ກໍລະນີດັ່ງກ່າວ, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນ ໄດ້ກ່າວຕອບໂຕ້ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 17 ມີນານີ້ວ່າ: ຖະແຫຼງການຮ່ວມຂອງອາເມຣິກາແລະຍີ່ປຸ່ນໄດ້ກ່າວໂຈມຕີນະໂຍບາຍການຕ່າງປະເທດຂອງຝ່າຍຈີນ, ເປັນການແຊກແຊງວຽກງານພາຍໃນຂອງຈີນຢ່າງຮຸນແຮງ, ມີເຈດຕະນາຢາກທຳລາຍຜົນປະໂຫຍດຂອງຈີນ. ຈີນສະແດງຄວາມບໍ່ພໍໃຈຕໍ່ເລື່ອງນີ້ຢ່າງຮຸນແຮງ ແລະ ຄັດຄ້ານຢ່າງເດັດຂາດ. ຈີນໄດ້ກ່າວປະທ້ວງຕໍ່ອາເມຣິກາ ແລະ ຍີ່ປຸ່ນຢ່າງເຄັ່ງຂຶມ.
ທ່ານຈ້າວລີ້ຈ່ຽນກ່າວວ່າ: “ຈີນເຕືອນຢ່າງຮຸນແຮງໃຫ້ອາເມຣິກາ ແລະ ຍີ່ປຸ່ນ ຈົ່ງຢຸດຕິການແຊກແຊງວຽກງານພາຍໃນຂອງຈີນໃນທັນທີ, ຢຸດຕິການຜູກມິດກັບຝ່າຍອື່ນໂດຍມີເຈດຕະນາທີ່ຖືເອົາຝ່າຍຈີນເປັນເປົ້າໝາຍໂຈມຕີໃນທັນທີ ແລະ ຢຸດຕິການທຳລາຍສະພາບລວມຂອງສັນຕິພາບແລະສະຖຽນລະພາບໃນພາກພື້ນໃນທັນທີ. ຝ່າຍຈີນຈະນຳໃຊ້ມາດຕະການອັນຈຳເປັນທຸກຢ່າງ ເພື່ອເດັດດ່ຽວປົກປັກຮັກສາອະທິປະໄຕ, ຄວາມໝັ້ນຄົງ ຜົນປະໂຫຍດດ້ານການພັດທະນາຂອງຕົນ”.