ວັນທີ 23 ມີນານີ້, ລັດຖະມົນຕີກະຊວງການຕ່າງປະເທດຈີນແລະຣັດເຊຍໄດ້ອອກຖະແຫຼງການຮ່ວມກ່ຽວກັບບາງບັນຫາໃນການບໍລິຫານໂລກໃນປັດຈຸບັນໂດຍຊີ້ໃຫ້ເຫັນວ່າ: ສະພາບການແຜ່ລະບາດ ຂອງພະຍາດໂຄວິດ-19 ຢ່າງຕໍ່ເນື່ອງໄດ້ເຮັດໃຫ້ສະພາບການສາກົນຜັນແປໄວຂຶ້ນກວ່າເກົ່າ, ລະບົບບໍລິຫານໂລກເສຍຄວາມດຸນດ່ຽງເພີ່ມຂຶ້ນ, ຂະບວນການພັດທະນາເສດຖະກິດໄດ້ຮັບຜົນກະທົບ, ໄພຂົ່ມຂູ່ໃໝ່ແລະສິ່ງທ້າທາຍໃໝ່ທີ່ມີລັກສະນະທົ່ວໂລກໄດ້ປາກົດຂຶ້ນຢ່າງບໍ່ຢຸດຢັ້ງ, ໂລກໄດ້ເຂົ້າສູ່ໄລຍະປັ່ນປ່ວນແລະມີການປ່ຽນແປງໃໝ່. ປະຊາຄົມໂລກຄວນໂຈະຄວາມຂັດແຍ້ງໄວ້ກ່ອນ, ເຕົ້າໂຮມຄວາມເຫັນທີ່ເປັນເອກະພາບກັນ, ເພີ່ມທະວີການປະສານງານກັນເພື່ອປົກປັກຮັກສາສັນຕິພາບໂລກແລະຄວາມໝັ້ນຄົງທາງຍຸທະສາດທີ່ຕັ້ງພູມສາດ, ຊຸກຍູ້ການສ້າງລະບຽບການສາກົນຫຼາຍຂົ້ວທີ່ມີຄວາມຍຸຕິທຳ, ປະຊາທິປະໄຕແລະສົມເຫດສົມຜົນຫຼາຍກວ່າເກົ່າ.
ຖະແຫຼງການໄດ້ຄັດຄ້ານການຖືເອົາບັນຫາສິດທິມະນຸດຫັນເປັນບັນຫາການເມືອງ, ໂດຍໄດ້ເນັ້ນໜັກວ່າ ຮູບແບບປະຊາທິປະໄຕບໍ່ມີມາດຕະຖານທີ່ເປັນເອກະພາບກັນ. ຄວນເຄົາລົບສິດທີ່ຊອບທຳຂອງປະເທດອະທິປະໄຕໃນການເລືອກເສັ້ນທາງພັດທະນາຢ່າງເປັນເຈົ້າຕົນເອງ.
ຖະແຫຼງການໄດ້ລະບຸວ່າ: ທຸກໆປະເທດລ້ວນແຕ່ຄວນປົກປັກຮັກສາລະບົບສາກົນທີ່ຖືອົງການສະຫະປະຊາຊາດເປັນແກນກາງແລະລະບຽບການສາກົນທີ່ຖືກົດໝາຍສາກົນເປັນພື້ນຖານ. ປະເທດໃຫຍ່ລະດັບໂລກໂດຍສະເພາະແມ່ນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດຄວນເພີ່ມທະວີຄວາມໄວ້ເນື້ອເຊື່ອໃຈກັນ, ນຳໜ້າປົກປັກຮັກສາກົດໝາຍສາກົນແລະລະບຽບການສາກົນທີ່ຖືກົດໝາຍສາກົນເປັນພື້ນຖານ. ພາຍໃຕ້ສະພາບການທີ່ການເມືອງສາກົນປັ່ນປ່ວນຮຸນແຮງຂຶ້ນ, ຈຶ່ງມີຄວາມຮຽກຮ້ອງໃຫ້ຈັດກອງປະຊຸມສຸດຍອດປະເທດສະມາຊິກຖາວອນສະພາຄວາມໝັ້ນຄົງອົງການສະຫະປະຊາຊາດຢ່າງຮີບດ່ວນ, ໂດຍຜ່ານເວທີການສົນທະນາໂດຍກົງນີ້ເພື່ອຄົ້ນຄວ້າຫາວິທີທາງແກ້ໄຂບັນຫາຮ່ວມຂອງມວນມະນຸດ, ປົກປັກຮັກສາຄວາໝັ້ນຄົງຂອງທົ່ວໂລກ.