ປະຈຸບັນ, ຈີນກຳລັງເລັ່ງລັດການສັກວັກຊີນຕ້ານໂຄວິດ-19 ໃຫ້ປະຊາຊົນດ້ວຍຄວາມປອດໄພ ແລະຄວາມເປັນລະບຽບຮຽບຮ້ອຍ. ຕາມຂໍ້ມູນສະຖິຕິສະບັບຫຼ້າສຸດຂອງຄະນະກຳມະການສາທາລະນະສຸກແລະສຸຂະພາບແຫ່ງຊາດຈີນສະແດງໃຫ້ເຫັນວ່າ: ນັບມາຮອດວັນທີ 27 ມີນານີ້, ໃນທົ່ວປະເທດຈີນໄດ້ສັກວັກຊີນຕ້ານໂຄວິດ-19 ລວມທັງໝົດ 102 ລ້ານ 4 ແສນ 1 ໝື່ນ 7 ພັນເທື່ອຫຼອດ.
ຄະນະກຳມະການສາທາລະນະສຸກແລະສຸຂະພາບແຫ່ງຊາດຈີນໃຫ້ຮູ້ວ່າ: ປະຈຸບັນ, ຈີນໄດ້ສ້າງລະບົບປະສານງານເພື່ອຕິດຕາມວັກຊີນຕ້ານໂຄວິດ-19 ຜ່ານທາງເອເລັກໂຕຼນິກໃນທົ່ວປະເທດ, ເຊິ່ງສາມາດກວດກາແຫຼ່ງທີ່ມາຂອງວັກຊີນໄດ້, ທັງສາມາດຕິດຕາມບ່ອນນຳໃຊ້ໄດ້. ພາກສ່ວນທີ່ກ່ຽວຂ້ອງຈະຕິດຕາມກວດກາເປັນປະຈຳ ເພື່ອຮັບປະກັນຄວາມປອດໄພໃນການຂົນສົ່ງແລະຮັກສາວັກຊີນ.
ນອກນີ້, ໂດຍອີງຕາມຄວາມຮຽກຮ້ອງຂອງກົນໄກປ້ອງກັນແລະຄວບຄຸມຮ່ວມຂອງລັດຖະບານຈີນ, ຕ້ອງມີພະນັກງານປິ່ນປົວແລະກອບກູ້ສຸກເສີນປະຈຳຢູ່ສະຖານທີ່ສັກວັກຊີນ, ຕ້ອງມີອຸປະກອນແລະຢາເພື່ອກອບກູ້ສຸກເສີນ, ແລະຕ້ອງມີລົດໂຮງໝໍປະຈຳຢູ່ສະຖານທີ່ສັກວັກຊີນ. ພ້ອມກັນນັ້ນ, ແຫ່ງຕ່າງໆຕ້ອງເພີ່ມທະວີການຕິດຕາມຕໍ່ອາການຜິດປົກກະຕິຫຼັງການສັກວັກຊີນ.