ທ່ານ ຢວນເສິງຟ່າ ຕ້ອນຮັບການເຂົ້າຢ້ຽມຂອງ ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດ ສປປ ລາວ ປະຈຳ ສປ ຈີນ

ມື້ມໍ່ໆມານີ້, ທ່ານ ຢວນເສິງຟ່າ ເລຂາພັກແຂວງຢຸນນານໄດ້ພົບປະກັບທ່ານນາງ ຄຳເພົາ ເອີນທະວັນ ເອກອັກຄະລັດຖະທູດ ສປປ ລາວ ປະຈຳ ສປ ຈີນ ພ້ອມດ້ວຍຄະນະ ຢູ່ນະຄອນຄຸນໝິງ.

ທ່ານ ຢວນເສິງຟ່າ ໄດ້ຕ້ອນຮັບຄະນະຜູ້ແທນນຳໂດຍທ່ານນາງ ຄຳເພົາ ເອີນທະວັນ ມາຢ້ຽມຢາມແຂວງຢູນນານໃນໂອກາດສະເຫຼີມສະຫຼອງ 60 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງ ຈີນ-ລາວ. ທ່ານກ່າວວ່າ, ຈີນ ແລະລາວ ແມ່ນປະເທດບ້ານໃກ້ເຮືອນຄຽງທີ່ດີ ມີພູຜາ ແລະສາຍນ້ຳຕິດຈອດກັນ, ເປັນເພື່ອນມິດທີ່ດີ ເບິ່ງແຍງເຊິ່ງກັນແລະກັນ, ເປັນສະຫາຍທີ່ດີ ມີອຸດົມການເປົ້ໝາຍດຽວກັນ, ແລະເປັນຄູ່ຮ່ວມມືທີ່ດີ ມີຊາຕາກຳຮ່ວມກັນ. ແຂວງຢຸນນານເປັນແຂວງດຽວຂອງປະເທດຈີນທີ່ມີຊາຍແດນຕິດຈອດກັບລາວ, ໄດ້ຈິງຈັງຈັດຕັ້ງປະຕິບັດຄວາມເຫັນດີເຫັນພ້ອມກັນຂອງຜູ້ນຳສູງສຸດຂອງສອງພັກແລະສອງປະເທດ, ໄດ້ຮັບໝາກຜົນອັນໃຫຍ່ຫຼວງໃນດ້ານຕ່າງໆເຊັ່ນ: ການຊຸກຍູ້ແຜນການປະຕິບັດງານເພື່ອສ້າງຄູ່ຮ່ວມຊາຕາກຳຈີນ-ລາວ, ເລັ່ງລັດການກໍ່ສ້າງບັນດາໂຄງການໃຫຍ່ ເປັນຕົ້ນແມ່ນເສັ້ນທາງລົດໄຟລາວ-ຈີນ, ເພີ່ມທະວີການແລກປ່ຽນດ້ານເສດຖະກິດ-ການຄ້າ, ແລະດຳເນີນການຮ່ວມມືດ້ານການປິ່ນປົວແລະຕ້ານການລະບາດຂອງພະຍາດ ເປັນຕົ້ນ. ປີນີ້ແມ່ນປີຄົບຮອບ 60 ປີຂອງການສ້າງຕັ້ງສາຍພົວພັນທາງການທູດລະຫວ່າງຈີນ-ລາວ, ແລະປີມິດຕະພາບຈີນ-ລາວ ກໍເລີ້ມຂຶ້ນຢ່າງເປັນທາງການ. ແຂວງຢຸນນານຈະເພີ້ມທະວີລົງເລິກການແລກປ່ຽນ ແລະການຮ່ວມມືກັບລາວໃນຫລາຍໆດ້ານເຊັ່ນ: ເສດຖະກິດແລະການຄ້າ, ວິທະຍາສາດແລະເຕັກໂນໂລຢີ, ສາທາລະນະສຸກ, ການສຶກສາ, ວັດທະນະທຳ ແລະ ການຂົນສົ່ງ, ເພື່ອສ້າງການປະກອບສ່ວນອັນໃໝ່ ເຂົ້າໃນການພັດທະນາສາຍພົວພັນມິດຕະພາບຈີນ-ລາວ ແລະຢຸນນານ-ລາວ ພັດທະນາໄປໜ້າຢ່າງຕໍ່ເນື່ອງ.

 ທ່ານນາງ ຄຳເພົາ ເອີນທະວັນ ກ່າວວ່າ, ການພົວພັນມິດຕະພາບລາວ- ຈີນ ມີປະຫວັດອັນຍາວນານ, ພາຍໃຕ້ການຊຸກຍູ້ຮ່ວມກັນຂອງຜູ້ນຳສູງສຸດຂອງທັງສອງຝ່າຍ, ການພົວພັນຮ່ວມມືຍຸດທະສາດຮອບດ້ານລາວ-ຈີນ ສືບຕໍ່ພັດທະນາບໍ່ຢຸດຢັ້ງ, ແລະຮ່ວມກັນສ້າງປະຊາຄົມຮ່ວມຊາຕາກຳມະນຸດທີ່ໝັ້ນແກ່ນບໍ່ສາມາດທຳລາຍໄດ້. ການຮ່ວມມື ແລະແລກປ່ຽນ ລະຫວ່າງແຂວງຢຸນນານ ແລະລາວ ໃນຂົງເຂດຕ່າງໆ ໄດ້ມີບົດບາດສຳຄັນ ໃນການເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອ ລະຫວ່າງສອງປະເທດເລິກເຊິ່ງກວ່າເກົ່າ, ໂດຍສະເພາະໃນການຮ່ວມມືປ້ອງກັນ ແລະຄວບຄຸມການລະບາດ ຂອງພະຍາດ, ແຂວງຢຸນນານ ໄດ້ໃຫ້ການຊ່ວຍເຫຼືອ ແລະສະໜັບສະໜູນລາວ, ແລະປະເທດລາວກໍ່ຮູ້ບຸນຄຸນຢ່າງເລິກເຊິ່ງ ສຳລັບສິ່ງນີ້. ຫວັງວ່າສອງຝ່າຍ ຈະສາມາດຜ່ານຜ່າຜົນກະທົບຈາກການລະບາດຂອງພະຍາດດັ່ງກ່າວ, ເຮັດວຽກຮ່ວມກັນຢ່າງໃກ້ຊິດ, ແລະຊຸກຍູ້ການຮ່ວມມືລະຫວ່າງລາວ ແລະແຂວງຢຸນນານ ໃຫ້ໄດ້ຮັບ ໝາກຜົນໃໝ່ ໃນດ້ານການລົງທຶນ ເສດຖະກິດ ແລະການຄ້າ, ການອົບຮົມບຸກຄະລາກອນ ແລະການປ້ອງກັນຄວບຄຸມພະຍາດລະບາດ.

ທ່ານ ເຊີນຊຸຍ ຮອງເຈົ້າແຂວງຢຸນນານ, ທ່ານນາງ ຫຼີມ້າຫຼີນ ຮອງເຈົ້າແຂວງຢຸນນານ, ທ່ານນາງ ມະນີລາ ສົມບັນດິດ ກົງສຸນໃຫຍ່ ສປປ ລາວ ທີ່ຄຸນມິງ ສປ ຈີນ ກໍໄດ້ເຂົ້າຮ່ວມການພົບປະ.