ກອງປະຊຸມປະຈຳປີ 2021 ຂອງເວທີປຶກສາຫາລືອາຊີໂປອາວ ຈະຈັດຂຶ້ນຢູ່ແຂວງໄຫຫຼຳຈີນແຕ່ວັນທີ 18 ຫາວັນທີ 21 ເມສານີ້. ໃນກອງປະຊຸມຖະແຫຼງຂ່າວຂອງ ກອງປະຊຸມປະຈຳປີ 2021 ຂອງເວທີປຶກສາຫາລືອາຊີໂປອາວ ທີ່ຈັດຂຶ້ນໃນວັນທີ 30 ມີນານີ້, ຜູ້ຮັບຜິດຊອບທີ່ກ່ຽວຂ້ອງຂອງເວທີປຶກສາຫາລືຄັ້ງນີ້ເຜີຍໃຫ້ຮູ້ວ່າ, ກອງປະຊຸມປະຈຳປີໃນປີນີ້ ຈະເພີ່ມເນື້ອໃນກ່ຽວກັບ “ໜຶ່ງແລວໜຶ່ງເສັ້ນທາງ”, ປຶກສາຫາລືກ່ຽວກັບໂອກາດແລະສິ່ງທ້າທາຍ ໃນການເພີ່ມທະວີການຮ່ວມມືສາກົນແລະການຄຸ້ມຄອງບໍລິຫານຂອງໂລກ.
ມື້ດຽວກັນ, ທ່ານຫຼີປາວຕົ່ງ, ຫົວໜ້າເລຂາທິການເວທີປຶກສາຫາລືອາຊີໂປອາວ ກ່າວວ່າ, ໂດຍມີການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ເປັນຢ່າງດີຂອງປະເທດເຈົ້າພາບຄືຈີນ, ກອງປະຊຸມປະຈຳປີຄັ້ງນີ້ ຈະແມ່ນກອງປະຊຸມສາກົນຂະໜາດໃຫຍ່ທີ່ຖືກອງປະຊຸມອອຟລາຍເປັນຫຼັກ ຄັ້ງທຳອິດຂອງໂລກໃນປີນີ້, ຜູ້ຮ່ວມປະຊຸມຈະມີປະມານ 2000 ຄົນ.
ກອງປະຊຸມປະຈຳປີເທື່ອນີ້ ກໍພໍດີຈັດຂຶ້ນໃນເວລາທີ່ເວທີປຶກສາຫາລືອາຊີໂປອາວສ້າງຂຶ້ນຄົບຮອບ 20 ປີ. ທ່ານຫຼີປາວຕົ່ງກ່າວວ່າ, ວົງການຕ່າງໆຈະຫວນຄືນຜົນສຳເລັດທີ່ເວທີປຶກສາຫາລືໄດ້ຮັບໃນ 20 ປີທີ່ຜ່ານມາ, ແລະຈະອອກຄວາມເຫັນອາຊີ, ສະເໜີແຜນການອາຊີ.