ສປ ຈີນ ຊ່ວຍເຫຼືອວັກຊີນປ້ອງກັນໂຄວິດ-19 ໃຫ້ ສປປ ລາວ ອີກ 800.000 ໂດດ

ວັກຊີນປ້ອງກັນໂຄວິດ-19 ຈໍານວນ 800.000 ໂດດ ໂດຍໃຫ້ການຊ່ວຍເຫຼືອລ້າ ຈາກ ລັດຖະບານ ແລະກອງທັບ ສປ ຈີນ ມອບໃຫ້ ສປປ ລາວ ໄດ້ມາຮອດສະໜາມບິນສາກົນວັດໄຕ ນະຄອນຫຼວງວຽງຈັນ ໃນຕອນຄໍ່າ ວັນທີ 31 ມີນາ 2021ນີ້, ເຊິ່ງເປັນຄັ້ງທີສອງ ທີ່ ສປ ຈີນໃຫ້ການຊ່ວຍເຫຼືອວັກຊີນປ້ອງກັນໂຄວິດ-19 ໃຫ້ແກ່ ສປປ ລາວ. ຕາງໜ້າຝ່າຍລາວຮັບເຄື່ອງຊ່ວຍເຫຼືອຄັ້ງນີ້ໂດຍທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ແລະຕາງໜ້າຝ່າຍຈີນມອບໂດຍທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ເຂົ້າຮ່ວມໂດຍທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ.

ໂອກາດນີ້, ທ່ານ ພັນຄໍາ ວິພາວັນ ໄດ້ຕາງໜ້າໃຫ້ພັກ ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງສູງໄປຍັງພັກ, ລັດຖະບານ ແລະ ປະຊາຊົນຈີນ ອ້າຍນ້ອງ ທີ່ເວລາໃດ ກໍ່ໄດ້ສະແດງຄວາມເປັນຫ່ວງເປັນໃຍ ແລະໃຫ້ການຊ່ວຍເຫຼືອອັນລ້ໍາຄ່າ ແກ່ລັດຖະບານ ກໍຄືປະຊາຊົນລາວຕະຫຼອດມາ ເຊິ່ງເປັນການສະແດງເຖິງການເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານ, ຫມັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ແທ້ຈິງ. ການຊ່ວຍເຫຼືອຄັ້ງນີ້, ເປັນການປະກອບສ່ວນອັນສໍາຄັນ ທີ່ເປັນຫຼັກຄ້ໍາປະກັນໃຫ້ລັດຖະບານ ກໍ່ຄືປະຊາຊົນລາວ ມີກໍາລັງແຮງໃຈເພີ່ມຂຶ້ນ ເພື່ອຕໍ່ສູ້ກັບພະຍາດໂຕຮ້າຍກາດນີ້ ແລະເປັນພູມຄຸ້ມກັນໃຫ້ແກ່ ສປປ ລາວ ໃນການຮັບມືກັບການລະບາດຂອງພະຍາດໂຄວິດ-19 ໄດ້ຢ່າງມີປະສິດທິພາບສູງຂຶ້ນຕື່ມ. ທ່ານຍັງໃຫ້ຄໍາຫມັ້ນສັນຍາວ່າຈະນໍາໃຊ້ຢາວັກຊີນດັ່ງກ່າວໃຫ້ເກີດຜົນປະໂຫຍດສູງສຸດ.

ທ່ານ ຈ່ຽງຈ້າຍຕົ່ງ ກ່າວວ່າ: ການຊ່ວຍເຫຼືອຄັ້ງນີ້ ບໍ່ພຽງແຕ່ໄດ້ສະແດງໃຫ້ເຫັນເຖິງຄວາມຮັບຜິດຊອບສູງຂອງຈີນໃນການຊ່ວຍເຫຼືອປະເທດພວມພັດທະນາເທົ່ານັ້ນ, ແຕ່ຍັງໄດ້ສ່ອງແສງໃຫ້ເຫັນເຖິງທາດແທ້ຂອງຄູ່ຮ່ວມຊາຕາກໍາລາວ-ຈີນ ໃນການຊ່ວຍຊູຍູ້ໜູນກັນອີກດ້ວຍ. ຈີນຍິນດີຄຽງຄູ່ກັບຝ່າຍລາວ ເພື່ອປະກອບສ່ວນເຂົ້າໃນການສ້າງຄູ່ຮ່ວມຊາຕາກໍາທາງດ້ານສາທາລານະສຸກຂອງມວນມະນຸດ ເພື່ອນໍາເອົາຜົນປະໂຫຍດໄປສູ່ປະຊາຊົນທົ່ວໂລກ.

ໃນຕົ້ນເດືອນກຸມພາຂອງປີນີ້, ສປ ຈີນ ໄດ້ໃຫ້ການຊ່ວຍເຫຼືອວັກຊີນແກ່ລັດຖະບານລາວຈໍານວນ 300.000 ໂດດ ເຊິ່ງໄດ້ສັກໃຫ້ບັນດາກຸ່ມເປົ້າໝາຍທີ່ມີຄວາມສ່ຽງ ໂດຍສະເພາະ ພະນັກງານແພດຫມໍ, ພະນັກງານປະຈໍາດ່ານຕ່າງໆ ແລະອື່ນໆ ພ້ອມທັງປະຊາຊົນລາວຜູ້ທີ່ມີຄວາມສ່ຽງ ແລະມີຄວາມຈໍາເປັນ ເຊິ່ງເຫັນວ່າຜ່ານການນໍາ ໃຊ້ວັກຊີນຊີໂນຟາມຂອງຈີນ ແມ່ນມີປະສິດທິພາບ ແລະມີຄວາມປອດໄພສູງ. ປັດຈຸບັນ ແມ່ນໄດ້ປະກາດໃຫ້ພໍ່ແມ່ປະຊາຊົນ ຜູ້ທີ່ຢາກສັກຢາວັກຊີນດັ່ງກ່າວ ແມ່ນສາມາດໄປສັກໄດ້ຢູ່ຕາມໂຮງຫມໍທີ່ລັດໄດ້ກໍານົດໄວ້.