ວັນທີ 31 ມີນາແລ້ວນີ້, ຢູ່ນະຄອນຫຼວງປັກກິ່ງ, ທ່ານຢາງເຈຍຊື ກຳມະການກົມການເມືອງສູນກາງພັກກອມມູນິດຈີນ ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງຈີນໄດ້ພົບປະທ່ານນາງສິໂຊດາ ເອກອັກຄະລັດຖະທູດກຳປູເຈຍປະຈຳຈີນ, ທ່ານນາງຄຳເພົາ ເອີນທະວັນ ເອກອັກຄະລັດຖະທູດລາວປະຈຳຈີນ ແລະທ່ານຊາມີຮ ເອກອັກຄະລັດຖະທູດໂກແວັດປະຈຳຈີນ.
ທ່ານຢາງເຈຍຊືກ່າວວ່າ: ຈີນຍິນດີເພີ່ມທະວີການໄປມາຫາສູ່ກັນກັບສາມປະເທດໃຫ້ແໜ້ນແຟ້ນຂຶ້ນຕື່ມ, ຮ່ວມກັນສ້າງ“ໜຶ່ງແລວໜຶ່ງເສັ້ນທາງ”ຢ່າງມີຄຸນນະພາບສູງ, ເພີ່ມທະວີການປະສານສົມທົບຫຼາຍຝ່າຍ. ຄະນະປະຈຳສະພາປະຊາຊົນແຫ່ງຊາດຈີນໄດ້ພິຈາລະນາຮັບຮອງເອກະສານຕິດຄັດເລກ 1 ແລະເອກະສານຕິດຄັດເລກ 2 ຂອງກົດໝາຍພື້ນຖານວ່າດ້ວຍເຂດບໍລິຫານພິເສດຮົງກົງດ້ວຍຄະແນນສຽງເຫັນດີໝົດ, ຈຸດປະສົງແມ່ນເພື່ອປະຕິບັດຫຼັກການພື້ນຖານທີ່ວ່າ“ຜູ້ຮັກຊາດປົກຄອງຮົງກົງ”, ຮັບປະກັນການປົກຄອງຮົງກົງຢ່າງໝັ້ນຄົງຍາວນານ ແລະການປະຕິບັດທິດທາງ“ປະເທດດຽວສອງລະບອບ”ຢ່າງໜັກແໜ້ນແລະຍາວນານ. ຈີນຈະສືບຕໍ່ປົກປ້ອງສິດແລະຜົນປະໂຫຍດທີ່ຊອບດ້ວຍກົດໝາຍຂອງປະເທດຕ່າງໆຢູ່ຮົງກົງ, ຍິນດີຕ້ອນຮັບປະຊາຄົມໂລກເປີດກວ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບຮົງກົງໃນທຸກຂົງເຂດ.
ເອກອັກຄະລັດຖະທູດຂອງສາມປະເທດດັ່ງກ່າວກ່າວວ່າ: ຈະສືບຕໍ່ສຸມກຳລັງເຂົ້າໃນການຊຸກຍູ້ການຂະຫຍາຍການພົວພັນມິດຕະພາບແລະການຮ່ວມມືກັບຈີນ. ວຽກງານຮົງກົງແມ່ນວຽກງານພາຍໃນຂອງຈີນ, ສາມປະເທດຈະສືບຕໍ່ສະໜັບສະໜູນທິດທາງ“ປະເທດດຽວສອງລະບອບ”ຢ່າງໝັ້ນໜຽວບໍ່ປ່ຽນແປງ ແລະສະໜັບສະໜູນຫຼັກໝັ້ນທີ່ຊອບທຳຂອງຈີນໃນບັນຫາຮົງກົງ.