ໂຮງຮຽນລຽວໂຕວ໌ 84 ປີໃນການບັນທຶກມິດຕະພາບລາວ-ຈີນ

ຢູ່ນະຄອນຫຼວງວຽງຈັນ ປະເທດລາວ, ມີໂຮງຮຽນແຫ່ງໜຶ່ງທີ່ສຸມກຳລັງແຮງໃນການຊຸກຍູ້ມິດຕະພາບລາວ-ຈີນ ນັ້ນກໍຄື ໂຮງຮຽນລຽວໂຕວ໌.

ປີ 1937 , ສົງຄາມຕໍ່ຕ້ານຮອບດ້ານໄດ້ເກີດຂຶ້ນຢູ່ຈີນ, ໄດ້ປຸກລະດົມຄວາມຮັກຊາດຂອງຄົນລາວເຊື້ອສາຍຈີນ, ຜູ້ນຳຂອງຄົນລາວເຊື້ອສາຍຈີນໄດ້ຕັດສິນໃຈກໍ່ຕັ້ງໂຮງຮຽນຈີນຮູບແບບໃໝ່ຂຶ້ນມາໜຶ່ງແຫ່ງ ນັ້ນກໍຄື ໂຮງຮຽນລຽວໂຕວ໌.

84 ປີຜ່ານໄປ, ໃນປັດຈຸບັນໂຮງຮຽນລຽວໂຕວ໌ ໄດ້ພັດທະນາເປັນໂຮງຮຽນກວມລວມ ເຊິ່ງມີອະນຸບານ, ປະຖົມ, ມັດທະຍົມຕົ້ນ ແລະ ມັດທະຍົມປາຍ, ດຳເນີນການສິດສອນແບບເອົາພາສາຈີນເປັນຫຼັກ, ແລະ ເອົາການສິດສອນທັງສອງພາສາລາວ-ຈີນໄປນຳກັນ. “ປັດຈຸບັນໂຮງຮຽນມີນັກຮຽນ 3106 ຄົນ,ຄູສອນ 206 ຄົນ, ໃນນັ້ນຄູພາສາຈີນ 49 ຄົນ, ຄູພາສາລາວ 75 ຄົນ, ຄູທີ່ຈີນສົ່ງມາຈາກຈີນ 12 ຄົນ.” ທ່ານ ຫຼິນຈຸນສຸງ (Lin Junxiong) ປະທານສະມາຄົມການສຶກສາພາສາຈີນໃນລາວ, ປະທານຄະນະກຳມະການໂຮງຮຽນລຽວໂຕວ໌ໄດ້ແນະນຳຕໍ່ນັກຂ່າວວ່າ, ການສິດສອນພາສາຈີນໃນໂຮງຮຽນແມ່ນຄືກັນກັບຢູ່ປະເທດຈີນ, ນຳໃຊ້ປຶ້ມຮຽນທີ່ຈັດພິມໂດຍສຳນັກພິມສຶກສາຈີນ, ການສິດສອນພາສາລາວ ແມ່ນນຳໃຊ້ປຶ້ມແບບຮຽນອັນດຽວກັນກັບກະຊວງສຶກສາທິການຂອງລາວ, ນຳໃຊ້ປຶ້ມແບບຮຽນທີ່ຈັດພິມໂດຍກະຊວງສຶກສາທິການຂອງລາວ, “ດັ່ງນັ້ນ, ນັກຮຽນທີ່ຈົບຈາກໂຮງຮຽນພວກເຮົາລ້ວນແຕ່ມີໃບປະກາດສອງໃບ, ໃບໜຶ່ງເປັນພາສາລາວ ໃບໜຶ່ງເປັນພາສາຈີນ.”

ທ່ານ ຫຼິນຈຸນສຸງ ກ່າວວ່າ, ໂຮງຮຽນໄດ້ເດີນທາງມາ 84 ປີແລ້ວ, ການກໍ່ສ້າງພື້ນຖານໂຄງລ່າງຂອງໂຮງຮຽນ ແລະ ການຄຸ້ມຄອງການສິດສອນກໍດີຂຶ້ນທຸກມື້. ທັງໝົດນີ້ແມ່ນບໍ່ສາມາດປາສະຈາກການສະໜັບສະໜູນ ແລະ ຊ່ວຍເຫຼືອຈາກລັດຖະບານສອງປະເທດ ແລະ ຄົນຈີນ ເຊື້ອສາຍຈີນແຕ່ລະລຸ້ນໄດ້.

ປີ 1995, ໂຮງຮຽນໄດ້ໄປຊື້ປຶ້ມແບບຮຽນຢູ່ແຂວງຢຸນນານ (Yunnan Province). ຮ້ານປຶ້ມຊິນຮົວຢຸນນານ ພາຍຫຼັງທີ່ເຂົ້າໃຈສະຖານະການ, ກໍໄດ້ສະໜອງປຶ້ມຮຽນໃຫ້ແບບບໍ່ເສຍຄ່າ. ຫຼັງຈາກນັ້ນ, ໂຮງຮຽນ ແລະ ຮ້ານປຶ້ມຊິນຮົວຢຸນນານ ໄດ້ຮ່ວມມືກັນສ້າງຮ້ານປຶ້ມຮ້ານໜຶ່ງຂຶ້ນມາຢູ່ປະຕູໂຮງຮຽນ, ກຳໄລທັງໝົດຫຼັງຫັກຄ່າໃຊ້ຈ່າຍຂອງຮ້ານປຶ້ມໄດ້ມອບໃຫ້ໂຮງຮຽນເປັນທຶນຮອນໃນການພັດທະນາ.

ຄູອາຈານທີ່ປະເທດຈີນສົ່ງມາກໍແມ່ນໜຶ່ງຈຸດພິເສດຂອງໂຮງຮຽນແຫ່ງນີ້, ພວກເຂົາບໍ່ພຽງແຕ່ຫວ່ານເມັດພັນແຫ່ງຄວາມຮູ້, ຫາກຍັງຫວ່ານເມັດພັນແຫ່ງມິດຕະພາບລາວ-ຈີນ. ເດືອນມັງກອນ ປີ 2021, ຄູອາຈານ ຫວງເວິນຊີ (Huang Wenqi) ອາຈານທີ່ຖືກສົ່ງມາຈາກ ເມືອງຫຼິວໂຈວ (Liuzhou city) ກວາງຊີ (Guangxi) ໄດ້ຮັບ “ລາງວັນປະກອບສ່ວນດີເດັ່ນ” ຂອງໂຮງຮຽນລຽວໂຕວ໌ ວຽງຈັນ, ນີ້ແມ່ນຄັ້ງທຳອິດຕັ້ງແຕ່ໂຮງຮຽນລຽວໂຕວ໌ກໍ່ຕັ້ງມາ ແລະ ໄດ້ມອບລາງວັນດັ່ງກ່າວ.

ເວລາຫ່າງພຽງແຕ່ 5 ປີ, ທ່ານ ຫຼິນຈຸນສຸງ ຍັງຈື່ໄດ້ດີກັບພາບບັນຍາກາດ ທີ່ ທ່ານ ຫຼີເຄີ້ສຽງ ນາຍົກລັດຖະມົນຕີຈີນມາຢ້ຽມຢາມໂຮງຮຽນ ໃນວັນທີ 9 ກັນຍາ 2016. “ເວລານັ້ນແມ່ນຕອນເຊົ້າ 10 ໂມງ 15 ນາທີ, ບັນຍາກາດພາຍໃນໂຮງຮຽນຄຶກຄື້ນຫຼາຍ, ທ່ານ ຫຼີເຄີ້ສຽງ ໄດ້ອວຍພອນໃຫ້ໂຮງຮຽນດີຂຶ້ນຍິ່ງໆໄປ, ຫວັງວ່າເຫຼົ່ານັກຮຽນຈະກາຍເປັນຂົວແຫ່ງການພັດທະນາປະເທດຊາດ, ເປັນຜູ້ສືບທອດມິດຕະພາບລາວ-ຈີນ” ທ່ານ ຫຼິນຈຸນສຸງ ກ່າວວ່າ, ໃນຕອນນັ້ນ ທ່ານ ນາຍົກ ຫຼີເຄີ້ສຽງ ຍັງຕາງໜ້າໃຫ້ລັດຖະບານຈີນມອບເຄື່ອງຊ່ວຍເຫຼືອທີ່ໃຊ້ໃນການຮ່ຳຮຽນຈໍານວນໜຶ່ງ, “ການມາຢ້ຽມຢາມຂອງ ທ່ານ ນາຍົກ ຫຼີເຄີ້ສຽງ, ພວກເຮົາຮູ້ສຶກເປັນກຽດຢ່າງຍິ່ງ, ຍິ່ງມີຄວາມໝັ້ນໃຈໃນການເຮັດໃຫ້ໂຮງຮຽນເຮົາກາຍເປັນໂຮງຮຽນທີ່ມີຊື່ສຽງຂອງທ້ອງຖິ່ນ.”

“ສຳລັບລຳດັບຂອງການສິດສອນ, ພາສາລາວຈັດໃຫ້ເປັນອັນດັບທີໜຶ່ງ, ພາສາຈີນເປັນອັນດັບທີສອງ, ພາສາອັງກິດເປັນອັນດັບທີສາມ.” ທ່ານ ຫຼິນຈຸນສຸງ ເວົ້າວ່າ, ການສິດສອນພາສາຈີນແມ່ນຈຸດເດັ່ນ ແລະ ທ່າແຮງ ຂອງໂຮງຮຽນ, ຜົນງານພາສາລາວກໍຢູ່ໃນລະດັບແຖວໜ້າໃນບັນດາໂຮງຮຽນລາວ. “ຄຽງຄູ່ກັບການຮ່ວມມືລາວ-ຈີນທີ່ສືບຕໍ່ເລິກເຊິ່ງ, ກະແສຄວາມນິຍົມພາສາຈີນ ໃນລາວກໍເລີ່ມຕົ້ນຂຶ້ນ. ໃນປັດຈຸບັນ, ນັກຮຽນໃນໂຮງຮຽນຂອງພວກເຮົາ 80% ແມ່ນຄົນລາວ, ພວກເຂົາຮັກພາສາຈີນ, ມັກເວົ້າພາສາຈີນກາງ. ທຸກປີ ມີນັກຮຽນພາຍໃນໂຮງຮຽນທີ່ເຮົາແນະນຳໄປຮຽນຢູ່ປະເທດຈີນກາຍ 100 ຄົນ. ”

ໂຮງຮຽນລຽວໂຕວ໌ ແລະ ມະຫາວິທະຍາໄລຫົວຊຽວຈີນ (Huaqiao University) ໄດ້ຮ່ວມມືກັນເປີດຫ້ອງປີກຽມມະຫາວິທະຍາໄລ, ເພື່ອຊ່ວຍເຫຼືອຊາວໜຸ່ມນັກຮຽນລາວຜູ້ໂດດເດັ່ນໃຫ້ໄດ້ໄປຮຽນຢູ່ຈີນ, ທ່ານຫຼິນຈຸນສຸງ ກ່າວວ່າ “ໃນປັດຈຸບັນ ພວກເຮົາກຳລັງປຶກສາຫາລືກັບມະຫາວິທະຍາໄລຢຸນນານ (Yunnan University) ກ່ຽວກັບການຮ່ວມມືກັນສ້າງຕັ້ງໂຮງຮຽນເຕັກນິກລຽວໂຕວ໌ລະດັບຊັ້ນກາງ, ເຮັດໃຫ້ນັກຮຽນລາວເຂົ້າໃຈສະພາບຂອງຈີນຫຼາຍຂຶ້ນ, ແລະ ບຳລຸງສ້າງບຸກຄະລາກອນສະເພາະດ້ານໃຫ້ປະເທດລາວໃຫ້ຍິ່ງຫຼາຍຂຶ້ນ, ເພື່ອສືບຕໍ່ເສີມສ້າງ ແລະ ຊຸກຍູ້ການພັດທະນາມິດຕະພາບລາວ-ຈີນໃຫ້ພັດທະນາ ແລະ ຍືນຍາວຕະຫຼອດໄປ!”