ແຕ່ກ່ອນ, “ການລະບາຍກາກບອນຕ່ຳ” ເປັນມະໂນພາບທີ່ນັກວິທະຍາສາດທັງຫຼາຍໃຫ້ຄວາມສົນໃຈເທົ່ານັ້ນ, ແຕ່ວ່າ: ຄຽງຄູ່ກັບການພັດທະນາຊີວິດສັງຄົມ ແລະ ຄຸນນະພາບຊີວິດຂອງປະຊາຊົນນັບມື້ນັບສູງຂຶ້ນ, ສະນັ້ນ, ຈິ່ງມີຄົນຕັ້ງຄຳຖາມວ່າ: ເຊົາຂັບລົດມື້ໜຶ່ງຈະຫຼຸດການລະບາຍກາກບອນໄດ້ຫຼາຍຊ່ຳໃດ, ປູກຕົ້ນໄມ້ເທົ່າໃດຕົ້ນຈິ່ງຈະສາມາດເຮັດໃຫ້ເກີດມີ “ຄວາມດຸນດ່ຽງລະຫວ່າງການລະບາຍກັບການກຳຈັດກາກບອນ” ຂອງສ່ວນບຸກຄົນ? ຄຳຖາມທີ່ບໍ່ເຄີຍມີຄົນຖາມຂຶ້ນໃນເມື່ອກ່ອນ, ດຽວນີ້ໄດ້ຝັງເລິກຢູ່ໃນຫົວໃຈຂອງຄົນທັງຫຼາຍ, “ການອະນຸລັກສິ່ງແວດລ້ອມທີ່ມີກາກບອນຕ່ຳ” ກໍໄດ້ຫັນປ່ຽນຈາກມະໂນພາບທີ່ເຂົ້າໃຈຍາກ ກາຍມາເປັນຮູບປະທຳທີ່ມີສ່ວນກ່ຽວຂ້ອງຢ່າງແໜ້ນແຟ້ນກັບຊີວິດປະຈຳວັນຂອງປະຊາຊົນ.
ການສົ່ງເສີມການດຳລົງຊີວິດທີ່ອະນຸລັກສິ່ງແວດລ້ອມແບບກາກບອນຕ່ຳ, ຈະບໍ່ສາມາດປາສະຈາກຄວາມຕື່ນຕົວ ແລະ ຄວາມພະຍາຍາມຂອງພົນລະເມືອງທຸກຄົນໄດ້, ຍິ່ງບໍ່ສາມາດປາສະຈາກການຊີ້ນຳນຳພາຂອງພັກ ແລະ ລັດຖະບານໄດ້ເຊັ່ນກັນ. ທີ່ຈິງແລ້ວ, ໃນຫຼາຍປີກ່ອນ, ຈີນກໍມີສະຕິຕື່ນຕົວໂດຍໃຫ້ຄວາມສຳຄັນໃນການອະນຸລັກສິ່ງແວດລ້ອມ. ປີ 1989, ຈີນໄດ້ອອກ “ກົດໝາຍວ່າດ້ວຍການອະນຸລັກສິ່ງແວດລ້ອມ” ຢ່າງເປັນທາງການ. ປີ 2013, ຈີນໄດ້ກຳນົດໃຫ້ມີ “ມື້ກາກບອນຕ່ຳທົ່ວປະເທດ” ເປັນຄັ້ງທຳອິດ ແລະ ໄດ້ເລີ່ມກິດຈະກຳ “ການລະບາຍກາກບອນຕ່ຳຢູ່ຈີນ” ເປັນຄັ້ງທຳອິດ. ໃນການອະພິປາຍທົ່ວໄປໃນສະມັດຊາໃຫຍ່ອົງການສະຫະປະຊາຊາດສະໄໝທີ 75 ທີ່ຈັດຂຶ້ນໃນປີຜ່ານມາ, ທ່ານສີຈິ້ນຜິງ ປະທານປະເທດຈີນໄດ້ສະເໜີວ່າ: ຈີນຈະພະຍາຍາມໃຫ້ການລະບາຍກາກບອນດິອົກຊິດເຖິງລະດັບສູງສຸດກ່ອນທ້າຍປີ 2030 ແລະ ຈະພະຍາຍາມໃຫ້ບັນລຸເປົ້າໝາຍໄລຍະຍາວທີ່ການລະບາຍ ແລະ ການດູດຊຶມກາກບອນດິອົກຊິດມີຄວາມດຸນດ່ຽງກັນ ດ້ວຍການປູກຕົ້ນໄມ້ ແລະ ວິທີອື່ນໆ ກ່ອນປີ 2060.
ສິ່ງທີ່ເປັນໜ້າຊົມເຊີຍນັ້ນກໍຄື: ຄຽງຄູ່ກັບວິຖີຊີວິດສີຂຽວ ແລະ ກາກບອນຕ່ຳໄດ້ຝັງເລິກຢູ່ໃນຫົວໃຈຂອງປະຊາຊົນຈີນ, ຈີນກໍພວມຫຍັບເຂົ້າໃກ້ເປົ້າໝາຍອະນຸລັກສິ່ງແວດລ້ອມທີ່ຕົນໄດ້ກຳນົດໄວ້ເທື່ອລະກ້າວ. ຈາກການປູກໄມ້ສ້າງປ່າຫາການເຜີຍແຜ່ “ຄຳສັ່ງຫ້າມໃຊ້ຖົງຢາງປຼາສະຕິກ”; ຈາກການພັດທະນາພະລັງງານໃໝ່ຫາການແຍກປະເພດຂີ້ເຫຍື້ອແບບຕື່ນຕົວຢູ່ເຂດຄຸ້ມຊຸມຊົນ; ຈາກການປະຕິບັດ “ວິທີຄຸ້ມຄອງການຊື້ຂາຍສິດລະບາຍກາກບອນ (ສະບັບທົດລອງ)”, ຈົນຮອດ “ແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14”, ຈີນໄດ້ເດີນຕາມເສັ້ນທາງທີ່ຖືກຕ້ອງ ໃນການລະບາຍກາກບອນຕ່ຳ ແລະ ອະນຸລັກສິ່ງແວດລ້ອມມາໂດຍຕະຫຼອດ.
ມີແຕ່ອະນຸລັກສິ່ງແວດລ້ອມໃຫ້ດີ, ປະຊາຊົນຈິ່ງຈະສາມາດ “ມີນ້ຳດື່ມທີ່ສະອາດ ແລະ ຫາຍໃຈເອົາອາກາດທີ່ສົດຊື່ນບໍລິສຸດ”, ຈິ່ງຈະສາມາດເຫັນພູຂຽວນ້ຳໃສ, ຈິ່ງຈະສາມາດບັນລຸການພັດທະນາທີ່ປອດໃສ ແລະ ຍືນຍົງ. ຈາກ “ການອະນຸລັກສິ່ງແວດລ້ອມແບບກາກບອນຕ່ຳ” ຈົນຮອດ “ການບັນລຸຄວາມດຸນດ່ຽງກັນລະຫວ່າງການລະບາຍກາກບອນ” ແລະ ການດູດຊຶມກາກບອນດິອົກຊິດ, ສະຫຼຸບແລ້ວ, ກໍຍ້ອນວ່າພັກກອມມູນິດຈີນໄດ້ຕັ້ງໜ້າຕອບສະໜອງຕາມຄວາມຮຽກຮ້ອງຕ້ອງການຂອງປະຊາຊົນທີ່ຢາກມຸ່ງໜ້າໄປສູ່ຊີວິດທີ່ດີງາມກວ່າເກົ່າ, ການຕອບສະໜອງກໍໄດ້ສ່ອງແສງໃຫ້ເຫັນເຖິງຈິດໃຈ “ຮັບໃຊ້ປະຊາຊົນຢາງສຸດອົກສຸດໃຈ” ເຊິ່ງເປັນອຸດົມການແຕ່ຫົວທີຂອງຊາວກອມມູນິດຈີນ, ເປັນກຳລັງແຮງຂອງພັກກອມມູນິດຈີນໃນການຊີ້ນຳນຳພາປະຊາຊົນຈີນກ້າວເດີນໄປໜ້າຢ່າງບໍ່ຢຸດຢັ້ງ ແລະ ກໍເປັນ “ເຄັດລັບແຫ່ງຜົນສຳເລັດ” ຂອງພັກກອມມູນິດຈີນ ຕະຫຼອດໄລຍະ 100 ປີນັບແຕ່ມື້ສ້າງຕັ້ງພັກກອມມູນິດຈີນຈົນເຖິງປັດຈຸບັນ.