ວັນທີ 13 ເມສານີ້, ຢູ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສົນທະນາກັບຜູ້ນຳໃນວົງການອຸດສາຫະກຳການຄ້າອາເມຣິກາ ໂດຍຜ່ານທາງວິດີໂອ. ຄະນະກຳມະການການຄ້າກັບຈີນທົ່ວປະເທດອາເມຣິກາ ພ້ອມທັງປະທານ ຫຼື ຫົວໜ້າຝ່າຍບໍລິຫານຂອງບໍລິສັດຂ້າມຊາດທີ່ມີຊື່ສຽງຂອງອາເມຣິກາ 20 ກວ່າແຫ່ງໄດ້ເຂົ້າຮ່ວມ. ທ່ານຫຼີເຄີ້ສຽງໄດ້ແລກປ່ຽນຄວາມຄິດເຫັນກັບພວກທ່ານ ແລະ ຕອບຄຳຖາມທີ່ກ່ຽວຂ້ອງ. ທ່ານແຮນຣີ ພອນສັນ ອະດີດລັດຖະມົນຕີກະຊວງການເງິນອາເມຣິກາ ແລະ ປະທານມູນນິທິພອນສັນໄດ້ເປັນປະທານກອງປະຊຸມ.
ທ່ານຫຼີເຄີ້ສຽງຊີ້ອອກວ່າ: ພາຍໃຕ້ຜົນກະທົບຈາກຫຼາຍດ້ານ, ຍອດມູນຄ່າການຄ້າລະຫວ່າງຈີນແລະອາເມຣິກາໃນປີຜ່ານມາກໍຍັງໄດ້ຮັກສາການເຕີບໂຕໄດ້ ເຊິ່ງເປັນການສະແດງໃຫ້ເຫັນວ່າ: ການຮ່ວມມືລະຫວ່າງສອງຝ່າຍແມ່ນມີເງື່ອນໄຂແລະມີໂອກາດຢ່າງພາວະວິໄສ, ສະນັ້ນ, ການຮ່ວມມືທາງເສດຖະກິດການຄ້າແມ່ນຈີນແລະອາເມຣິກາຕ່າງຝ່າຍຕ່າງກໍມີຄວາມຕ້ອງການ. “ການຕັດສາຍພົວພັນກັນ” ບໍ່ສົ່ງຜົນປະໂຫຍດຕໍ່ຝ່າຍໃດ ແລະ ກໍຈະສ້າງຜົນກະທົບຕໍ່ໂລກ. ຫວັງວ່າ: ສອງຝ່າຍຈະສາມາດພະຍາຍາມຮ່ວມກັນ, ໂດຍຜ່ານການເປີດກວ້າງຜົນປະໂຫຍດຮ່ວມກັນ ເພື່ອຊຸກຍູ້ການຮ່ວມມືກັນ, ປົກປັກຮັກສາຄວາມປອດໄພ ແລະ ຄວາມໝັ້ນທ່ຽງຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງ.