ທ່ານສີຈິ້ນຜິງຕ້ອນຮັບການເຂົ້າຍື່ນສານຕາຕັ້ງຈາກເອກອັກຄະລັດຖະທູດຄົນໃໝ່29 ທ່ານປະຈຳຈີນ
ຕອນບ່າຍຂອງວັນທີ 14 ເມສານີ້, ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຍື່ນສານຕາຕັ້ງຈາກເອກອັກຄະລັດຖະທູດຄົນໃໝ່ຂອງ 29 ປະເທດປະຈຳຈີນ.
ທ່ານສີຈິ້ນຜິງໄດ້ຝາກຄວາມຢື້ຢາມຖາມຂ່ວ ແລະສົ່ງຄຳອວຍພອນອັນປະເສີດຜ່ານທ່ານທູດໄປຍັງຜູ້ນຳຂອງແຕ່ລະປະເທດ. ທ່ານສີຈິ້ນຜິງກ່າວວ່າ: ໃນປີຜ່ານມາ, ປະຊາຊົນຈີນ ແລະປະຊາຊົນບັນດາປະເທດໄດ້ຮ່ວມກັນຜ່ານຜ່າຄວາມຫຍຸ້ງຍາກ ແລະຮ່ວມກັນຕ້ານກັບພະຍາດໂຄວິດ-19, ໄດ້ຂຽນປະຫວັດສາດໜ້າໃໝ່ກ່ຽວກັບການຮ່ວມມືສາກົນບົນຈິດໃຈມິດຕະພາບ. ປີນີ້ແມ່ນປີທີ່ພັກກອມມູນິດຈີນສ້າງຕັ້ງຂຶ້ນຄົບຮອບ 100 ປີ, ທັງແມ່ນປີທຳອິດທີ່ຈີນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 14 ແລະແມ່ນປີເປີດຂະບວນການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ.ຈີນຈະເດັດດ່ຽວຍຶດໝັ້ນໃນການປະຕິບັດຕາມແນວຄວາມຄິດຂອງການພັດທະນາໃໝ່, ຕັ້ງໜ້າສ້າງສະພາບການພັດທະນາໃໝ່, ເຮັດໃຫ້ການພັດທະນາຂອງຈີນເອື້ອອຳນວຍຜົນປະໂຫຍດໃຫ້ແກ່ປະຊາຊົນບັນດາປະເທດຢ່າງມີປະສິດທິຜົນຫຼາຍກວ່າເກົ່າ. ປີນີ້ຍັງແມ່ນປີຄົບຮອບ 50 ປີທີ່ຈີນຟື້ນຟູບ່ອນນັ່ງທີ່ຊອບດ້ວຍກົດໝາຍໃນອົງການສະຫະປະຊາຊາດ ແລະແມ່ນປີຄົບຮອບ 20 ປີທີ່ຈີນເຂົ້າເປັນສະມາຊິກຂອງອົງການການຄ້າໂລກ. ຈີນຍິນດີຮ່ວມກັບບັນດາປະເທດ, ເດັດດ່ຽວສະໜັບສະໜູນລັດທິຫຼາຍຝ່າຍ, ປົກປັກຮັກສາລະບົບສາກົນທີ່ຖືເອົາອົງການສປຊເປັນແກນກາງ ແລະລະບຽບການສາກົນທີ່ຖືກົດໝາຍສາກົນເປັນພື້ນຖານ, ເດັດດ່ຽວປົກປ້ອງລະບົບການຄ້າຫຼາຍຝ່າຍ, ເດັດດ່ຽວຊຸກຍູ້ການສ້າງລະບົບການບໍລິຫານໂລກ ແລະຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ງານກິລາໂອລິມປິກລະດູໜາວປັກກິ່ງຈະຈັດຂຶ້ນໃນປີ 2022. ພາຍໃຕ້ການສະໜັບສະໜູນ ແລະເຂົ້າຮ່ວມຢ່າງຕັ້ງໜ້າຂອງບັນດາຝ່າຍ, ຈີນມີຄວາມໝັ້ນໃຈອຳຈະສາມາດແກ້ໄຂຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະຈັດງານກິລາໂອລິມປິກຄັ້ງນີ້ໃຫ້ເປັນງານມະຫາກຳທີ່ລຽບງ່າຍ, ປອດໄພ ແລະປະທັບໃຈ.
ທ່ານສີຈິ້ນຜິງກ່າວເນັ້ນວ່າ: ປະຊາຊົນຈີນເວລາໃດກໍທະນຸຖະໜອມມິດຕະພາບ ແລະຮັກຫອມສັນຕິພາບຢ່າງສະເໝີຕົ້ນສະເໝີປາຍ, ຍິນດີລົງເລິກການພົວພັນມິດຕະພາບ, ເພີ່ມທະວີຄວາມໄວ້ເນື້ອເຊື່ອໃຈກັນ ແລະເປີດກວ້າງການຮ່ວມມືກັບປະຊາຊົນບັນດາປະເທດບົນພື້ນຖານຄວາມສະເໝີພາບກັນ ແລະຕ່າງຝ່າຍຕ່າງມີຜົນປະໂຫຍດ, ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ. ຫວັງວ່າບັນດາທ່ານທູດຈະປະກອບສ່ວນຢ່າງຕັ້ງໜ້າເຂົ້າໃນຊຸກຍູ້ການພັດທະນາສາຍພົວພັນສອງຝ່າຍ ແລະການຮ່ວມມືລະຫວ່າງອົງການສປຊ ກັບຈີນ.