ທ່ານສີຈິ້ນຜິງສົ່ງສານຊົມເຊີຍຜົນສຳເລັດຂອງການສົ່ງຍານອະວະກາດແກນກາງຂອງສະຖານີອະວະກາດ “ທຽນເຮີ”ຂຶ້ນສູ່ອະວະກາດ
ເວລາ 11ໂມງ 23 ນາທີຂອງວັນທີ 29 ເມສານີ້, ຈີນໄດ້ສົ່ງຍານອະວະກາດແກນກາງຂອງສະຖານີອະວະກາດ “ທຽນເຮີ”ຂອງຈີນຂຶ້ນສູ່ວົງໂຄຈອນຕາມທີ່ກຳນົດໄວ້ລ່ວງໜ້າ, ຖືວ່າ ປະສົບຜົນສຳເລັດໃນການປະຕິບັດແຜນການສົ່ງຍານຂຶ້ນສູ່ອະວະກາດໃນຄັ້ງນີ້. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນໄດ້ສົ່ງສານຊົມເຊີຍໂດຍຕາງໜ້າໃຫ້ສູນກາງພັກ,ລັດຖະບານແລະຄະນະກຳມະການການທະຫານສູນກາງຈີນ ສະແດງຄວາມຊົມເຊີຍຢ່າງສຸດໃຈແລະສົ່ງຄວາມຢື້ຢາມຖາມຂ່າວຢ່າງຈິງໃຈເຖິງສູນບັນຊາການການປະຕິບັດໜ້າທີ່ການບິນອະວະກາດໃນການສ້າງສະຖານີອະວະກາດໃນໂຄງການການບິນອະວະກາດບັນທຸກມະນຸດພ້ອມດ້ວຍບັນດາໜ່ວຍງານແລະທຸກໆສະຫາຍ ທີ່ໄດ້ເຂົ້າຮ່ວມການຄົ້ນຄວ້າວິທະຍາສາດແລະການທົດລອງກ່ຽວກັບການປະຕິບັດໜ້າທີ່ສົ່ງຍານອະວະກາດ “ທຽນເຮີ”ຂຶ້ນສູ່ອະວະກາດຄັ້ງນີ້.
ໃນສານຊົມເຊີຍຂອງທ່ານສີຈິ້ນຜິງໄດ້ລະບຸວ່າ: ການສ້າງສະຖານີວະອະກາດແລະສ້າງຫ້ອງທົດລອງອະວະກາດແຫ່ງຊາດໃຫ້ສຳເລັດ ເປັນເປົ້າໝາຍສຳຄັນໃນການບັນລຸຍຸດທະສາດ “3ບາດກ້າວ”ຂອງໂຄງການການບິນອະວະກາດບັນທຸກມະນຸດຂອງຈີນ, ເປັນໂຄງການທີ່ມີລັກສະນະນຳໜ້າອັນສຳຄັນໃນການສ້າງປະເທດຊາດໃຫ້ເປັນປະເທດເຂັ້ມແຂງດ້ານວິທະຍາສາດເຕັກໂນໂລຊີແລະການບິນອະວະກາດ. ການສົ່ງຍານອະວະກາດແກນກາງ “ທຽນເຮີ”ຂຶ້ນສູ່ອະວະກາດຢ່າງສຳເລັດຜົນ ເປັນຂີດໝາຍສະແດງໃຫ້ເຫັນວ່າ ການສ້າງສະຖານີອະວະກາດຂອງຈີນໄດ້ກ້າວເຂົ້າສູ່ໄລຍະປະຕິບັດຢ່າງຮອບດ້ານ ເຊິ່ງໄດ້ສ້າງພື້ນຖານອັນໝັ້ນແກ່ນໃຫ້ແກ່ການປະຕິບັດໜ້າທີ່ຕາມແຜນການໃນຕໍ່ໜ້າ. ຫວັງວ່າບັນດາສະຫາຍຈະອອກແຮງເສີມຂະຫຍາຍນ້ຳໃຈ “2 ລະເບີດ 1 ດາວທຽມ”ແລະນ້ຳໃຈການບິນອະວະກາດບັນທຸກມະນຸດ, ເພິ່ງຕົນເອງແລະສ້າງຄວາມເຂັ້ມແຂງດ້ວຍຕົນເອງ, ປະດິດສ້າງໃໝ່ແລະສ້າງຜົນງານໃໝ່, ເພື່ອຍາດເອົາໄຊຊະນະຢ່າງຮອບດ້ານໃນການເຮັດສຳເຫຼັດໜ້າທີ່ການສ້າງສະຖານີອະວະກາດ, ປະກອບສ່ວນໃໝ່ໃຫຍ່ຫຼວງກວ່າເກົ່າເຂົ້າໃນການສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ.