ກອງປະຊຸມພົບປະສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລາວ-ຈີນຄົບຮອບ 60 ປີ ຈັດຂຶ້ນທີ່ເມືອງຄຸນໝິງ

ວັນທີ 26 ເດືອນເມສາ, ກອງປະຊຸມພົບປະສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລາວ-ຈີນຄົບຮອບ 60 ປີໄດ້ຈັດຂຶ້ນທີ່ນະຄອນຄຸນໝິງ. ນັກຂ່າວໄດ້ຮັບຮູ້ຂໍ້ມູນຂ່າວສານຈາກກອງປະຊຸມນີ້ວ່າ, ແຂວງຢຸນນານເປັນແຂວງດຽວຂອງຈີນທີ່ມີຊາຍແດນຕິດຈອດກັນກັບປະເທດລາວ, ແຂວງຢຸນນານຖືເອົາການສ້າງສາຍພົວພັນໄມຕີຈິດມິດຕະພາບ ກັບ ປະເທດລາວເປັນສຳຄັນ, ຊຸກຍູ້ການຮ່ວມມື ແລະ ການແລກປ່ຽນລະຫວ່າງສອງຝ່າຍດ້ວຍການເຄື່ອນໄຫວເຮັດຕົວຈິງ, ປະກອບສ່ວນ “ກຳລັງແຮງຂອງແຂວງຢຸນນານ” ໃຫ້ແກ່ການສ້າງຄູ່ຮ່ວມຊາຕາກຳລາວ-ຈີນ.

ສອງຝ່າຍແຂວງຢຸນນານ ກັບ ປະເທດລາວມີການຮ່ວມມືໃນຫຼາຍດ້ານ. ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະ ທີມງານຮ່ວມມືຂອງແຂວງຢຸນນານປະເທດຈີນ-ພາກເໜືອປະເທດລາວ ໄດ້ກາຍເປັນເວທີ ແລະ ກົນໄກທີ່ສຳຄັນເພື່ອເພີ່ມທະວີມິດຕະພາບ ການປະສານງານ ຊຸກຍູ້ການພັດທະນາ. ວຽກງານກ່ຽວກັບເມືອງມິດຕະພາບລະຫວ່າງແຂວງຢຸນນານ ກັບ ປະເທດລາວ ພັດທະນາຢ່າງກ້າວໜ້າ, ລະຫວ່າງ 14 ເມືອງມິດຕະພາບເຊັ່ນ ນະຄອນຄຸນໝິງ-ນະຄອນຫຼວງວຽງຈັນ, ນະຄອນຈິງຫົງ- ນະຄອນຫຼວງພະບາງ ແລະ ອື່ນໆໄດ້ການຮ່ວມມືຕົວຈິງຫຼາຍດ້ານ. ການກໍ່ສ້າງພື້ນຖານໂຄງລ່າງມີຄວາມກ້າວໜ້າຢ່າງຕໍ່ເນື່ອງ, ການຮ່ວມມືດ້ານການຄ້າຕ່າງຝ່າຍຕ່າງໄດ້ຜົນປະໂຫຍດ, ການແລກປ່ຽນດ້ານວັດທະນະທຳກໍລົງເລິກຢ່າງບໍ່ຢຸດຢັ້ງ.

ໃນມື້ດຽວກັນ, ຍັງມີງານລ້ຽງຮັບຮອງ ແລະ ງານວາງສະແດງຮູບພາບ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ-ຈີນ ຄົບຮອບ 60 ປີ. ອິງຕາມຂ່າວສານ, ແຕ່ເດືອນເມສາ ຮອດ ເດືອນພະຈິກ, ພະແນກທີ່ກ່ຽວຂ້ອງໃນແຂວງຢຸນນານ ກັບ ສະຖານກົງສູນໃຫຍ່ລາວ ປະຈຳນະຄອນຄຸນໝິງ ຈະຈັດການແຂ່ງຂັນຂຽນບົດຄວາມໃນຫົວຂໍ້ “ມິດຕະພາບລາວ-ຈີນ”, ຍັງມີສັບປະດາວັດທະນະທຳທີ່ເມືອງມິດຕະພາບຂອງຈີນ (ແຂວງຢຸນນານ)-ປະເທດລາວ ທີ່ຈະຈັດຂຶ້ນໃນເດືອນກໍລະກົດ.

ມາຈາກ：ເວັບໄຊ້ຢຸນນານ

ນັກຂ່າວ：ຫານເສີງຢວນ ຢາວເສີງເສີງ