ເສັ້ນທາງລົດໄຟລາວ-ຈີນໄດ້ປູຮາງຮອດກິ່ງແຂວງສິບສອງພັນນາ

ວັນທີ 26 ເດືອນເມສາ, ນັກຂ່າວໄດ້ຮັບຮູ້ຂໍ້ມູນຈາກ ກຸ່ມບໍລິສັດກໍ່ສ້າງເສັ້ນທາງລົດໄຟຈີນ ສາຂາຄຸນໝິງວ່າ, ວຽກການປູຮາງຂອງເສັ້ນທາງລົດໄຟລາວ-ຈີນ ຕອນຢີຊີ（Yuxi）ຮອດບໍ່ຫານ ພາຍໃນປະເທດຈີນມີຄວາມກ້າວໜ້າ ແລະ ເປັນໄປຢ່າງສະດວກ, ປັດຈຸບັນນີ້ໄດ້ປູຮາງຮອດກິ່ງແຂວງປົກຄອງຕົນເອງຊົນເຜົ່າໄທລື້ສິບສອງພັນນາ, ສ້າງພື້ນຖານອັນໝັ້ນຄົງທີ່ຈະເປີິດນຳໃຊ້ບໍລິການໃນທ້າຍປີນີ້.

ເສັ້ນທາງລົດໄຟລາວ-ຈີນຕອນພາຍໃນປະເທດຈີນ ເລີ່ມແຕ່ນະຄອນຢີຊີ, ຜ່ານນະຄອນພູເອີ, ກິ່ງແຂວງສິບສອງພັນນາ, ສຸດທ້າຍໄປຮອດດ່ານບໍ່ຫານຊາຍແດນປະເທດລາວ, ສາຍເສັ້ນທາງຕົ້ນຕໍມີຄວາມຍາວທັງໝົດ 508 ກິໂລແມັດ, ເສັ້ນຢີຊີໄປຮອດຈິງຫົງເປັນເສັ້ນຄູ່, ຈິງຫົງໄປຮອດບໍ່ຫານເປັນເສັ້ນດຽວ, ເສັ້ນທາງຕົ້ນຕໍມີການປູຮາງ 863 ກິໂລແມັດ, ເສັ້ນຂອງສະຖານີປູຮາງ 129 ກິໂລແມັດ.

ວຽກການປູຮາງລົດໄຟຕອນຢີຊີໄປຮອດບໍ່ຫານ ເລີ່ມຂຶ້ນຕັ້ງແຕ່ເດືອນເມສາ ປີ 2020 ເປັນຕົ້ນມາ, ໄດ້ນຳໃຊ້ເຄື່ອງຈັກປູຮາງສອງຄັນທີ່ມີຄວາມທັນສະໄໝຂອງຈີນ CPG500, ດຳເນີນການກໍ່ສ້າງຕະຫຼອດມື້ຕະຫຼອດຄືນ, ການປູຮາງມີຄວາມຄືບໜ້າຢ່າງວ່ອງໄວ. ມາຮອດປັດຈຸບັນນີ້, ມື້ໜຶ່ງປູຮາງໄດ້ສະເລ່ຍ 5 ກິໂລແມັດ, ຄາດວ່າຈະສຳເລັດໃນທ້າຍເດືອນມິຖຸນາ.

ເສັ້ນທາງລົດໄຟລາວ-ຈີນມີຄວາມຍາວທັງໝົດ 1000 ກວ່າກິໂລແມັດ, ຫຼັງຈາກສຳເລັດວຽກເປີດນຳໃຊ້ບໍລິການເປັນທາງການ, ນະຄອນຄຸນໝິງໄປຮອດຈິງຫົງໃຊ້ເວລາພຽງແຕ່ 3 ຊົ່ວໂມງ, ການເດີນທາງຮອດນະຄອນຫຼວງວຽງຈັນມີຄວາມຄາດຫວັງວ່າຈະສາມາດເດີນທາງຮອດໄດ້ໂດຍກົງ ແລະ ໄປຮອດພາຍໃນມື້ດຽວໄດ້.

ມາຈາກ：ເວັບໄຊ້ຢຸນນານ

ນັກຂ່າວ: ຫູຊຽວຢົງ