ວັນທີ 29 ເມສານີ້, ທ່ານກ່າວເຟິ່ງ ໂຄສົກກະຊວງການຄ້າຈີນກ່າວຢູ່ນະຄອນຫຼວງປັກກິ່ງວ່າ: ເມື່ອບໍ່ດົນມານີ້, ກະຊວງການຄ້າຈີນໄດ້ເຮັດການສຳຫຼວດຄວາມຄິດເຫັນຂອງວິສາຫະກິດການລົງທຶນຂອງຕ່າງປະເທດຫຼາຍກວ່າ 3200 ແຫ່ງ ເຊິ່ງຜົນການສຳຫຼວດຊີ້ໃຫ້ເຫັນວ່າ: ວິສາຫະກິດມີທ່າທີເຊື່ອໝັ້ນຕໍ່ການດຳເນີນທຸລະກິດຢູ່ຈີນໃນອະນາຄົດເພີ່ມຂຶ້ນ 2,1% ເມື່ອທຽບໃສ່ຕົ້ນປີ 2021, ກະຊວງການຄ້າຈີນຈະນຳໃຊ້ມາດຕະການຕ່າງໆເພື່ອເຮັດໃຫ້ການລົງທຶນຂອງຕ່າງປະເທດມີຄວາມໝັ້ນຄົງຕື່ມອີກ.
ຕາມຂໍ້ມູນສະຖິຕິຊີ້ໃຫ້ເຫັນວ່າ: ໃນໄຕມາດທີ 1, ຈຳນວນວິສາຫະກິດການລົງທຶນໃໝ່ຂອງຕ່າງປະເທດໄດ້ເພີ່ມຂຶ້ນ 47,8% ເມື່ອທຽບໃສ່ໄລຍະດຽວກັນຂອງປີກາຍ. ຕໍ່ເລື່ອງນີ້, ທ່ານກ່າວເຟິ່ງກ່າວວ່າ: ໃນໄຕມາດທີ 1, ມູນຄ່າການລົງທຶນຂອງຕ່າງປະເທດໃນຈີນເພີ່ມຂຶ້ນຢ່າງໄວວາ, ນອກຈາກສາເຫດທີ່ມີການລົງທຶນໜ້ອຍໃນໄລຍະດຽວກັນຂອງປີກາຍແລ້ວ, ຕົ້ນຕໍແມ່ນມາຈາກການທີ່ເສດຖະກິດຈີນສາມາດຟື້ນຟູຈາກຜົນກະທົບຂອງພະຍາດໂຄວິດ-19 ໄດ້, ຕະຫຼາດມີອະນາຄົດທີ່ດີ, ສະພາບແວດລ້ອມການດຳເນີນທຸລະກິດໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ, ຄວາມໝັ້ນໃຈຂອງນັກລົງທຶນຕ່າງປະເທດເພີ່ມຂຶ້ນ, ຄວາມຄາດຫວັງຂອງການລົງທຶນແມ່ນມີຄວາມໝັ້ນຄົງ ແລະມີທ່າອ່ຽງດີຂຶ້ນ.
ທ່ານຍັງກ່າວຕື່ມວ່າ: ປັດຈຸບັນນີ້, ສະພາບການສາກົນມີຄວາມສັບສົນ ແລະຂ້ຽວຂາດ, ການລົງທຶນຂ້າມຊາດໄດ້ຫຼຸດລົງຢ່າງຕໍ່ເນື່ອງ, ການໄປມາຫາສູ່ກັນລະຫວ່າງຊາດບໍ່ສະດວກ, ການເຄື່ອນໄຫວດຶງດູດການລົງທຶນຖືກສະກັດກັ້ນ, ຄວາມບໍ່ແນ່ນອນໄດ້ເພີ່ມຂຶ້ນ, ເຮັດໃຫ້ການລົງທຶນໂດຍກົງຂອງຕ່າງປະເທດໃນປີ 2021 ຍັງຜະເຊີນໜ້າກັບຄວາມກົດດັນຫຼາຍຢູ່.