ຕົວເລກຂໍ້ມູນທີ່ອົງການພາສີຈີນເປີດເຜີຍໃນວັນທີ 7 ພຶດສະພານີ້ສະແດງໃຫ້ເຫັນວ່າ: ຍອດມູນຄ່າການຄ້າຂາເຂົ້າຂາອອກຂອງຈີນໃນ 4 ເດືອນຕົ້ນປີນີ້ມີເຖິງ 11.620 ຕື້ຢວນ, ສືບຕໍ່ຮັກສາທ່ວງທ່າເພີ່ມຂຶ້ນໄດ້ເປັນຢ່າງດີ. ນອກນີ້, ການຄ້າຂອງຈີນກັບພາກພື້ນຕ່າງໆຂອງໂລກກໍໄດ້ມີຄວາມດຸນດ່ຽງກວ່າເກົ່າ, ການຄ້າກັບປະເທດທີ່ຢູ່ລຽບຕາມ “ໜຶ່ງແລວໜຶ່ງເສັ້ນທາງ” ໄດ້ຮັກສາທ່ວງທ່າເພີ່ມຂຶ້ນອ່າວໄວ, ການຄ້າກັບຕ່າງປະເທດໄດ້ຮັບການພັດທະນາໃຫ້ມີຄວາມຫຼາກຫຼາຍ ແລະ ມີທ່າແຮງແຂ່ງຂັນດີກວ່າເກົ່າ.
ທ່ານຫຼີຂຸຍເວີນ ຫົວໜ້າກົມສະຖິຕິແລະວິເຄາະຂອງອົງການພາສີແຫ່ງຊາດຈີນກ່າວວ່າ: “ນັບແຕ່ເດືອນມິຖຸນາປີກາຍນີ້ເປັນຕົ້ນມາ, ຍອດມູນຄ່າການຄ້າຂາເຂົ້າຂາອອກຂອງຈີນໄດ້ຮັກສາການເພີ່ມຂຶ້ນເປັນ 11 ເດືອນລຽນຕິດ. ເມື່ອທຽບໃສ່ໄລຍະດຽວກັນຂອງປີກ່ອນແລ້ວ, ຈັງຫວະການເຕີບໂຕຂອງຍອດມູນຄ່າຂາເຂົ້າຂາອອກໃນ 4 ເດືອນຕົ້ນປີນີ້ສູງເຖິງ 21,8%. ນີ້ສະແດງໃຫ້ເຫັນວ່າ: ການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແລະ ການພັດທະນາເສດຖະກິດສັງຄົມຢ່າງເປັນເອກະພາບກັນຂອງຈີນໄດ້ຮັບຜົນສຳເລັດທີ່ມີລັກສະນະຍຸດທະສາດທີ່ສຳຄັນ, ນະໂຍບາຍແລະມາດຕະການຮັກສາຄວາມໝັ້ນທ່ຽງດ້ານການຄ້າກັບຕ່າງປະເທດຂອງຈີນກໍມີປະສິດທິຜົນສູງ.