ວັນທີ 11 ພຶດສະພານີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວວ່າ, ວັກຊີນແມ່ນອາວຸດສຳຄັນໃນການເອົາຊະນະພະຍາດໂຄວິດ-19, ການກະທຳຕົວຈິງສຳຄັນກວ່າປາກເປົ່າ. ໃນບັນຫາວັກຊີນບໍ່ຄວນເວົ້າແຕ່ປາກເປົ່າລ້າໆ, ວຽກອັນຮີບດ່ວນໃນປະຈຸບັນ ຄືຕ້ອງເອົາວັກຊີນໄປຊ່ວຍເຫຼືອປະເທດພວມພັດທະນາຢ່າງແທ້ຈິງ.
ຫວ່າງກ່ອນນີ້ບໍ່ດົນ, ໂຄສົກສະຫະພັນເພື່ອວັກຊີນ ແລະ ພູມຕ້ານທານໂລກກ່າວວ່າ, ສະຫະພັນດັ່ງກ່າວພວມຕາງໜ້າCOVAX ເຈລະຈາກັບບໍລິສັດຜະລິດວັກຊີນຫຼາຍແຫ່ງ ເຊິ່ງລວມທັງບໍລິສັດຊີໂນຟາມຂອງຈີນ, ເພື່ອເປີດກວ້າງແຫຼ່ງສະໜອງວັກຊີນ. ນອກນີ້ຂ່າວຍັງແຈ້ງວ່າ, ຫວ່າງມໍ່ໆມານີ້ ອາເມຣິກາໄດ້ຮຽກຮ້ອງໃຫ້ຍົກເລີກການປົກປ້ອງຊັບສິນທາງປັນຍາດ້ານວັກຊີນໂຄວິດ-19, ແຕ່ຍັງເປັນຫ່ວງວ່າປະເທດອື່ນຈະໄດ້ຮັບເຕັກໂນໂລຊີຜະລິດຢາຊີວະພາບທີ່ສຳຄັນຂອງອາເມຣິກາ.
ໃນເວລາຕອບຄຳຖາມທີ່ກ່ຽວຂ້ອງຂອງນັກຂ່າວ, ທ່ານນາງຮວ້າຊຸ່ນຢິງກ່າວວ່າ, ຈີນແມ່ນປະເທດທີ່ສະເໜີ ທັງລົງມືປະຕິບັດຕາມຄຳໝັ້ນສັນຍາທີ່ໃຫ້ວັກຊີນເປັນຜະລິດຕະພັນສາທາລະນະຂອງໂລກກ່ອນໝູ່. ຈີນໄດ້ຊ່ວຍເຫຼືອວັກຊີນແກ່ 80 ກວ່າປະເທດພວມພັດທະນາ, ແລະສົ່ງອອກວັກຊີນໃຫ້ແກ່ 50 ກວ່າປະເທດ, ພ້ອມທັງດຳເນີນການຮ່ວມມືດ້ານການໂອນເຕັກນິກ ແລະ ຮ່ວມມືຜະລິດກັບປະເທດພວມພັດທະນາ. ຈີນຍິນດີຕ້ອນຮັບປະເທດອື່ນ ໂດຍສະເພາະແມ່ນປະເທດທີ່ມີຄວາມສາມາດ ແລະ ມີເງື່ອນໄຂພຽງພໍສະໜອງວັກຊີນໃຫ້ແກ່ປະເທດພວມພັດທະນາໂດຍໄວ, ເພື່ອສ້າງເງື່ອນໄຂທີ່ເອື້ອອຳນວຍໃຫ້ແກ່ບັນດາປະເທດສາມາດເອົາຊະນະພະຍາດໂຄວິດ-19 ໄດ້ໂດຍໄວ.