ຈີນຈັດກອງປະຊຸມແນະນຳການກະກຽມງານກິລາໂອລິມປິກລະດູໜາວປັກກິ່ງຕໍ່ທູຕານຸທູດປະຈຳຈີນເປັນຄັ້ງທຳອິດ
ວັນທີ 21 ພຶດສະພາ2021, ຄະນະບໍລິຫານງານຂອງຄະນະຈັດງານກິລາໂອລິມປິກລະດູໜາວປັກກິ່ງໄດ້ຈັດກອງປະຊຸມແນະນຳສະພາບການກະກຽມງານກິລາໂອລິມປິກລະດູໜາວປັກກິ່ງເປັນຄັ້ງທຳອິດຕໍ່ບັນດາທູຕານຸທູດຕ່າງປະເທດປະຈຳຈີນ, ເຊິ່ງມີທູດ120 ທ່ານຈາກ 70 ກວ່າປະເທດເຂົ້າຮ່ວມກອງປະຊຸມຄັ້ງນີ້.
ໃນກອງປະຊຸມ, ທ່ານຈ່າງຈ້ຽນຕຸງ ຮອງເຈົ້າຄອງນະຄອນຫຼວງປັກກິ່ງ ທັງເປັນຮອງປະທານຄະນະບໍລິຫານງານຂອງຄະນະຈັດງານກິລາໂອລິມປິກລະດູໜາວປັກກິ່ງໄດ້ແນະນຳວຽກງານຫ້າງຫາກະກຽມກ່ຽວກັບງານກິລາໂອລິມປິກລະດູໜາວແລະງານກິລາໂອລິມປິກຄົນພິການລະດູໜາວປັກກິ່ງ ແມ່ນມີຄວາມກຽມພ້ອມທຸກປະການ ເປັນຕົ້ນແມ່ນເດີ່ນກິລາແລະສິ່ງກໍ່ສ້າງພື້ນຖານໂຄງລ່າງ, ການຈັດຕັ້ງງານແຂ່ງຂັນ, ການບໍລິການ, ການໂຄສະນາເຜີຍແຜ່, ການແລກປ່ຽນແລະຮ່ວມມືສາກົນ, ການສືບເນື່ອງຫຼັງງານແລະມໍລະດົກ, ພ້ອມດ້ວຍການເຜີຍແຜ່ກິລາຫິມະແລະນ້ຳກ້ອນ ແລະອື່ນໆ.
ຕາມການແນະນຳໃຫ້ຮູ້ວ່າ, ປັດຈຸບັນ, ເດີ່ນກິລາທັງໝົດທີ່ໃຊ້ສຳລັບການແຂ່ງຂັນໄດ້ສ້າງສຳເລັດແລ້ວແລະໄດ້ຜ່ານການກວດກາແລະຢືນຢັນຈາກອົງການກິລາລະດູໜາວສາກົນ. ອາຄານຕ່າງໆໃນບ້ານໂອລິມປິກລະດູໜາວ 3 ແຫ່ງໄດ້ສຳເລັດແລ້ວ. ຕົ້ນປີນີ້ຍັງໄດ້ຈັດກິດຈະກຳທົດລອງແຂ່ງຂັນລາຍການຫິມະແລະນ້ຳກ້ອນຢ່າງສຳເລັດຜົນ, ຊຶ່ງທັງໝົດໄດ້ຜ່ານການກວດສອບເປັນຢ່າງດີ.
ທ່ານປະທານຄະນະກຳມະການປະສານວຽກງານກິລາໂອລິມປິກລະດູໜາວປັກກິ່ງປີ 2022 ຂອງຄະນະກຳມະການໂອລິມປິກສາກົນໄດ້ກ່າວຄຳປາໃສໂດຍຜ່ານທາງອອນລາຍແລະທ່ານໄດ້ຢືນຢັນຜົນງານກະກຽມຂອງປັກກິ່ງຢ່າງຕັ້ງໜ້າທັງໄດ້ສະແດງຄວາມໝັ້ນໃຈຕໍ່ການເປັນເຈົ້າພາບຈັດງານກິລາໂອລິມປິກລະດູໜາວປັກກິ່ງຢ່າງສຳເລັດຜົນ.
ພະແນກພົວພັນຕ່າງປະເທດຂອງຄະນະຈັດງານກິລາໂອລິມປິກລະດູໜາວປັກກິ່ງໄດ້ແນະນຳວຽກງານກະກຽມການຮັບຕ້ອນແຂກພິເສດ(VIP)ສາກົນ ແລະຕອບຄຳຖາມຂອງບັນດາທູຕານຸທູດ. ຕາມຂ່າວໃຫ້ຮູ້ວ່າ, ໃນທ້າຍປີນີ້ແລະຕົ້ນປີໜ້າ, ຄະນະຈັດງານກິລາໂອລິມປິກປັກກິ່ງຍັງຈະຈັດກອງປະຊຸມແນະນຳສະພາບການໃຫ້ແກ່ທູຕານຸທູດປະຈຳຈີນຕື່ມອີກ ເພື່ອແນະນຳສະພາບຄວາມຄືບໜ້າຂອງວຽກງານຮັບຕ້ອນແຂກພິເສດ(VIP)ສາກົນ.