ກ່ຽວກັບ ຖະແຫຼງການຮ່ວມລະຫວ່າງອາເມຣິກາ ແລະ ສ.ເກົາຫຼີທີ່ໄດ້ລະບຸເຖິງບັນຫາໄຕ້ຫວັນຈີນ ແລະ ທະເລຈີນໃຕ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 24 ພຶດສະພານີ້ວ່າ: ຈີນຮຽກຮ້ອງໃຫ້ປະເທດທີ່ກ່ຽວຂ້ອງຄວນມີ ຄວາມສຸຂຸມຮອບຄອບໃນບັນຫາໄຕ້ຫວັນ, ຢ່າທ້າທາຍເກາະຜິດ.
ທ່ານຈ້າວລີ້ຈ່ຽນກ່າວວ່າ, ຈີນໃຫ້ຄວາມສົນໃຈນຳເນື້ອໃນທີ່ກ່ຽວຂ້ອງໃນຖະແຫຼງການຮ່ວມລະຫວ່າງອາເມຣິກາ ແລະສ.ເກົາຫຼີ, ແລະສະແດງຄວາມເປັນຫ່ວງຕໍ່ເລື່ອງນີ້. ຈີນເຫັນວ່າ: ການພັດທະນາສາຍພົວພັນອາເມຣິກາ-ສ.ເກົາຫຼີຄວນມີຜົນດີຕໍ່ການຊຸກຍູ້ສັນຕິພາບ ສະຖຽນລະພາບ ການພັດທະນາ ແລະຄວາມຈະເລີນຮຸ່ງເຮືອງຂອງພາກພື້ນ, ແຕ່ບໍ່ແມ່ນເຮັດໃນໃນທິດທາງກົງກັນຂ້າມ, ຍິ່ງບໍ່ຄວນທຳລາຍຜົນປະໂຫຍດຂອງຝ່າຍທີສາມ ເຊິ່ງລວມທັງປະເທດຈີນ. ບັນຫາໄຕ້ຫວັນແມ່ນວຽກງານພາຍໃນຂອງຈີນ, ພົວພັນເຖິງອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຈີນ, ເຊິ່ງບໍ່ອະນຸຍາດໃຫ້ອິດທິກຳລັງພາຍນອກໃດໆເຂົ້າມາແຊກແຊງ. ຈີນຮຽກຮ້ອງໃຫ້ປະເທດທີ່ກ່ຽວຂ້ອງຈົ່ງມີຄວາມສຸຂຸມຮອບຄອບຕໍ່ບັນຫາໄຕ້ຫວັນ, ຢ່າທ້າທາຍເກາະຜິດ. ກ່ຽວກັບບັນຫາທະເລຈີນໃຕ້, ບັນດາປະເທດມີສິດເສລີໃນການເດີນເຮືອ ແລະ ການບິນຜ່ານທະເລຈີນໃຕ້ຖ້າປະຕິບັດຕາມກົດໝາຍສາກົນ, ກໍຈະບໍ່ມີບັນຫາຫຍັງເລີຍ, ປະເທດທີ່ກ່ຽວຂ້ອງກໍມີຄວາມຮັບຮູ້ທີ່ຈະແຈ້ງຕໍ່ເລື່ອງນີ້ຢູ່ແລ້ວ.
ທ່ານຈ້າວລີ້ຈ່ຽນກ່າວເນັ້ນວ່າ: ປະເທດດຽວ ຫຼື ບາງປະເທດບໍ່ມີສິດຕີຄວາມໝາຍກ່ຽວກັບລະບຽບສາກົນແຕ່ຝ່າຍດຽວ, ຍິ່ງບໍ່ມີສິດຖືເອົາມາດຕະຖານຂອງຕົນບັງຄັບໃສ່ປະເທດອື່ນ. ແຕ່ໃດໆມາ, ຈີນຄັດຄ້ານປະເທດທີ່ກ່ຽວຂ້ອງທີ່ສ້າງ “ວົງແຄບນ້ອຍ” ເຊັ່ນ “ກົນໄກ4ຝ່າຍ”, “ຍຸດທະສາດອິນເດຍ-ປາຊີຟິກ” ແລະອື່ນໆທີ່ແນໃສ່ປະເທດອື່ນ, ການກະທຳໃນລັກສະນະນີ້ແມ່ນຝືນກັບຈິດໃຈຂອງປະຊາຊົນ, ໃນທີ່ສຸດຈະບໍ່ສົມຫວັງ ແລະບໍ່ມີທາງອອກ.”