ວັນທີ 25 ພຶດສະພານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວວ່າ: ຈີນຍິນດີຮ່ວມກັບຣັດເຊຍ ແລະປະຊາຄົມໂລກ, ສືບຕໍ່ສະໜັບສະໜູນ ແລະປະຕິບັດຕາມລັດທິຫຼາຍຝ່າຍທີ່ແທ້ຈິງ, ຕັ້ງໜ້າຊຸກຍູ້ໃຫ້ການພົວພັນສາກົນມີປະຊາທິປະໄຕກວ່າເກົ່າ, ຊຸກຍູ້ບັນດາປະເທດລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະສ້າງຄວາມໝັ້ນທ່ຽງຫຼາຍກວ່າເກົ່າໃຫ້ກັບສັນຕິພາບ ແລະການພັດທະນາຂອງໂລກ.
ວັນທີ 24 ພຶດສະພານີ້, ທ່ານເຊີເກ ລັຟໂຣຟ ລັດຖະມົນຕີກະຊວງການຕ່າງປະເທດຣັດເຊຍໄດ້ໃຫ້ສຳພາດຕໍ່ສື່ມວນຊົນວ່າ: ຣັດເຊຍ ແລະຈີນມີຄວາມເພີ່ງພໍໃຈຕໍ່ຮູບແບບການຮ່ວມມືທີ່ມີຢູ່ລະຫວ່າງສອງຝ່າຍໃນປັດຈຸບັນນີ້, ສາຍພົວພັນຈີນ-ຣັດເຊຍແມ່ນຢູ່ໃນລະດັບທີ່ດີທີ່ສຸດໃນປະຫວັດສາດ.
ທ່ານຈ້າວລີ້ຈ່ຽນໄດ້ຕອບຄຳຖາມທີ່ກ່ຽວຂ້ອງວ່າ: ການທີ່ສາຍພົວພັນຈີນ-ຣັດເຊຍສາມາດຜ່ານຜ່າການທົດສອບຈາກການປ່ຽນແປງຂອງສະພາບການສາກົນໄດ້ ແລະກາຍເປັນກຳລັງແຮງທີ່ມີຄວາມໝັ້ນທ່ຽງຂອງໂລກ ກໍຍ້ອນວ່າສອງຝ່າຍໄດ້ຍຶດໝັ້ນໃນຫຼັກການບໍ່ຮ່ວມກຸ່ມ, ບໍ່ເປັນປໍລະປັກ ແລະບໍ່ແນໃສ່ຝ່າຍທີສາມ; ເຄົາລົບຜົນປະໂຫຍດຕົ້ນຕໍ ແລະຄຳນຶງເຖິງຄວາມກັງວັນທີ່ສົມເຫດສົມຜົນຂອງກັນ ແລະກັນຢ່າງສະເໝີຕົ້ນສະເໝີປາຍ; ເດັດດ່ຽວປົກປັກຮັກສາລະບົບສາກົນທີ່ຖືອົງການສະຫະປະຊາຊາດເປັນໃຈກາງ ແລະລະບຽບສາກົນບົນພື້ນຖານຂອງກົດໝາຍສາກົນ.