ງານກິລາໂອລິມປິກລະດູໜາວປັກກິ່ງເນັ້ນປະຕິບັດຕາມຄຳໝັ້ນສັນຍາ:“ຈັດງານໂອລິມປິກແບບສີຂຽວ”
ວັນທີ 26 ພຶດສະພານີ້, ຄະນະຈັດງານກິລາໂອລິມປິກລະດູໜາວປັກກິ່ງໄດ້ໄຂກອງປະຊຸມ ແລະແນະນຳ 18 ມາດຕະການຄວບຄຸມການຫຼຸດຜ່ອນການລະບາຍກາກບອນດີອອກຊິດແລະກຳນົດ 4 ມາດຕະການເພື່ອບັນລຸເປົ້າໝາຍຈັດງານກິລາໂອລິມປິກທີ່ລະບາຍກາກບອນດີອອກຊິດຕ່ຳ.ນີ້ເປັນການຢັ້ງຢືນວ່າ: ງານກິລາໂອລິມປິກລະດູໜາວປັກກິ່ງເນັ້ນປະຕິບັດຕາມຄຳໝັ້ນສັນຍາຄືຈັດງານໂອລິມປິກແບບສີຂຽວ.
ຕາມການແນະນຳໃຫ້ຮູ້ວ່າ: ທຸກສະຖານທີ່ຈັດງານກິລາໂອລິມປິກລະດູໜາວປັກກິ່ງ ລ້ວນແຕ່ໄດ້ໃຊ້ໄຟຟ້າສີຂຽວທັງໝົດ, ນັບທັງໄຟຟ້າເຍືອງແສງໃນເວລາດຳເນີນວຽກງານແລະການຄົມມະນາຄົມແມ່ນນຳໃຊ້ໄຟຟ້າດ້ວຍແສງຕາເວັນແລະພະລັງແຮງລົມຂອງເມືອງຈ່າງເຈ່ຍໂຂວ. ມາຮອດປັດຈຸບັນ, ໄດ້ມີຫໍໂຮງກິລາ 19 ແຫ່ງໄດ້ນຳໃຊ້ໄຟຟ້າສີຂຽວໃນເວລາກໍ່ສ້າງ, ເມື່ອຮອດເວລາຈັດງານແຂ່ງຂັນ ຫໍໂຮງກິລາທັງໝົດຂອງງານຈະສາມາດບັນລຸການນຳໃຊ້ພະລັງງານສະອາດແລະ ເມື່ອຮອດເວລາສີ້ນສຸດງານກິລາໂອລິມປິກລະດູໜາວປັກກິ່ງ, ຫໍໂຮງກິລາຕ່າງໆຈະສິ້ນເປືອງໄຟຟ້າສີຂຽວປະມານ 400 ລ້ານວັດ, ຄາດວ່າຈະສາມາດຫຼຸດການລະບາຍກາກບອນດີອອກຊິດປະມານ 3,2 ແສນໂຕນ.
ງານກິລາໂອລິມປິກລະດູໜາວປັກກິ່ງບໍ່ພຽງແຕ່ໄດ້ນຳໃຊ້ເດີ່ນກິລາໂອລິມປິກລະດູຮ້ອນປີ 2008 ເທົ່ານັ້ນ, ໃນເວລາສ້າງເດີ່ນກິລາໃໝ່ທີ່ໃຊ້ສຳລັບງານກິລາໂອລິມປິກລະດູໜາວນັ້ນ ກໍໄດ້ອີງຕາມມາດຕະຖານລະດັບ 3 ດາວຂອງສິ່ງກໍ່ສ້າງສີຂຽວ. ນອກນັ້ນ, ສູນລອຍນ້ຳແຫ່ງຊາດ, ຫໍກິລາແຫ່ງຊາດ, ສູນກິລາວູເຄີ່ຊົງ ແລະຫໍກິລານະຄອນຫຼວງເປັນຕົ້ນ ລ້ວນແຕ່ໄດ້ບັນລຸການຫັນນ້ຳເປັນນ້ຳກ້ອນ ແລະຫັນພື້ນບົກເປັນນ້ຳກ້ອນ, ເພື່ອຈັດການແຂ່ງຂັນກິລາເທິງນ້ຳກ້ອນຂອງງານກິລາໂອລິມປິກລະດູໜາວ.
ໃນຂະນະທີ່ຊຸກຍູ້ໂຄງການປາສະຈາກການປ່ອຍກາກບອນດີອອກຊິດນັ້ນ, ຄະນະຈັດງານກິລາໂອລິມປິກລະດູໜາວປັກກິ່ງຍັງໄດ້ສົ່ງເສີມແລະປຸກລະດົມໃຫ້ມວນຊົນເຂົ້າຮ່ວມໂຄສະນາເຜີຍແຜ່ຄວາມຄືບໜ້າແລະຈຸດເດັ່ນຂອງການເຄື່ອນໄຫວຕ່າງໆເພື່ອຫຼຸດຜ່ອນການລະບາຍກາກບອນດີອອກຊິດຕ່ຳ.