ຕິດຕາມຊ້າງປ່າອາຊີຂອງແຂວງຢຸນນານ 15 ໂຕທີ່ອົບພະຍົບໄປທິດເໜືອ

ຊ້າງທີ່ເຄີຍກິນອາຫານຕາມທົ່ງນາ, ເຄີຍເລາະຫຼິ້ນຕາມທາງດ່ວນ, ເຄີຍກິນກາກເຫຼົ້າຈົນ “ເມົາ”, ຊ້າງປ່າອາຊີທີ່ພົບເຫັນໄດ້ໜ້ອຍກຳລັງອົບພະຍົບໄປທາງທິດເໜືອ ແລະ ໄດ້ຮັບຄວາມສົນໃຈຈາກສັງຄົມຢ່າງກວ້າງຂວາງ, ແລ້ວຊ້າງປ່າກຳລັງຈະເດີນທາງໄປໃສ?

ວັນທີ 16 ເດືອນເມສາ, ຊ້າງປ່າອາຊີຈຳນວນ 17ໂຕ ທີ່ດຳລົງຊີວິດ ແລະ ອາໄສຢູ່ທີ່ເຂດສະຫງວນທຳມະຊາດແຫ່ງຊາດ ກິ່ງແຂວງສິບສອງພັນນາ ໄດ້ອົບພະຍົບຈາກເມືອງມໍ້ຈ່ຽງ ນະຄອນພູເອີ ໄປຮອດເມືອງຢວນຈ່ຽງ ນະຄອນຢີ້ຊີ. ວັນທີ 24 ເດືອນເມສາ, ມີຊ້າງປ່າສອງໂຕກັບຄືນເມືອງມໍ້ຈ່ຽງ ນະຄອນພູເອີ, ຊ້າງປ່າທີ່ເຫຼືອ 15 ໂຕສືບຕໍ່ອົບພະຍົບໄປທິດເໜືອ, ພວກມັນຜ່ານເມືອງສືພິງກິ່ງແຂວງຫົງເຫີ, ເຂົ້າສູ່ເມືອງເອີຊານ ນະຄອນຢິ້ຊີ, ປັດຈຸບັນນີ້, ຊ້າງປ່າຢູ່ໃນເຂດຫົງຖ້າ ນະຄອນຢີ້ຊີ, ຫ່າງຈາກເຂດຕົວເມືອງຂອງນະຄອນຄຸນໝິງ 100​ ກິໂລແມັດ.

ຈາກການຕິດຕາມກວດກາ, ກຸ່ມຊ້າງນີ້ປະກອບມີຊ້າງໂຕແມ່ 6 ໂຕ, ຊ້າງໂຕຜູ້ 3 ໂຕ, ຊ້າງໄວໜຸ່ມ 3 ໂຕ, ຊ້າງນ້ອຍ 3 ໂຕ. ກຸ່ມຊ້າງໄດ້ອົບພະຍົບໄປປະມານ 500 ກິໂລແມັດ, ເກືອບຂ້າມດິນແດນເຄິ່ງໜຶ່ງຂອງແຂວງຢຸນນານ.

ຊ້າງອາຊີເປັນສັດປ່າທີ່ຖືກອະນຸຮັກສຳຄັນລະດັບໜຶ່ງຂອງປະເທດຈີນ, ການແຈກຢາຍຕົ້ນຕໍແມ່ນຢູ່ສາມກິ່ງແຂວງ ແລະ ເມືອງຄື: ເມືອງພູເອີ, ກິ່ງແຂວງສິບສອງພັນນາ ນະຄອນຫຼິງຊ່າງ, ເປັນສັດທີ່ໃຫຍ່ທີ່ສຸດ ແລະ ເປັນຕົວແທນຂອງສັດທີ່ມີກະດູກສັນຫຼັງທີ່ອາໄສຢູ່ເທິງບົກ. ຜ່ານການຊ່ວຍເຫຼືອ ແລະ ອະນຸຮັກຫຼາຍກວ່າ 30 ປີ, ຈຳນວນຊ້າງຂອງກຸ່ມຊ້າງປ່າອາຊີໃນສະຕະວັດທີ 20 ຕົ້ນປີ 80 ມີແຕ່ 193 ໂຕ, ໃນຕອນນີ້ໄດ້ຂະຫຍາຍເປັນປະມານ 300 ໂຕ.

ເສີນໝິງຢົງ ອາຈານຂອງຄະນະນິເວດ ແລະ ສິ່ງແວດລ້ອມ ມະຫາວິທະຍາໄລຢຸນນານເວົ້າວ່າ: ຊ້າງອາຊີອົບພະຍົບໄປທິດເໜືອທີ່ມີໄລຍະທາງໄກ, ນີ້ເປັນຄັ້ງທຳອິດໃນປະເທດເຮົາ. 40 ວັນທີ່ຜ່ານມານີ້, ບ່ອນທີ່ກຸ່ມຊ້າງກາຍໄປ, ໄດ້ເກີດຜົນກະທົບຕໍ່ລະບຽບການດຳລົງຊີວິດຂອງປະຊາຊົນທ້ອງຖິ່ນ.

ຊ້າງອາຊີເບິ່ງແລ້ວໜ້າຮັກຫຼາຍ, ແຕ່ກໍມັກໂຈມຕີຢ່າງແຮງ. ເຖິງແມ່ນວ່າຍັງບໍ່ທັນຮູ້ເຫດຜົນວ່າເປັນຫຍັງກຸ່ມຊ້າງຈຶ່ງອົບພະຍົບໄປທິດຕາເວັນອອກສ່ຽງເໜືອກໍຕາມ, ແຕ່ອົງການທີ່ກ່ຽວຂ້ອງຂອງແຂວງຢຸນນານ ແລະ ທ້ອງຖິ່ນໄດ້ປະຕິບັດມາດຕະການຕ່າງໆເພື່ອປ້ອງກັນຄວາມສ່ຽງທີ່ມີຕໍ່ຄວາມປອດໄພສາທາລະນະ ແລະ ເພື່ອຮັບປະກັນຄວາມປອດໄພຂອງຄົນກັບຊ້າງ.

ຫຼາຍປີຜ່ານມາ, ເພື່ອໃຫ້ຄົນກັບຊ້າງຢູ່ຢ່າງກົມກຽວກັນ, ພະແນກຂອງລັດໄດ້ມີມາດຕະການຕ່າງໆ ເຊັ່ນ: ສະໜອງອາຫານໃຫ້ຊ້າງ, ສ້າງຮົ້ວກັນຊ້າງໃຫ້ຊາວບ້ານ, ດຳເນີນການຕິດຕາມ ແລະ ອອກແຈ້ງຂ່າວເຕືອນ, ຄຽງຄູ່ກັນນັ້ນ ກໍອອກແຮງໃຫ້ຊາວບ້ານໄດ້ຮັບຜົນປະໂຫຍດຈາກການອະນຸຮັກຊ້າງ, ໃຫ້ຊຸມຊົນເຂົ້າຮ່ວມການອະນຸຮັກ, ສົ່ງເສີມການຕິດຕາມເພື່ອການປົກປັກຮັກສາ ແລະ ຟື້ນຟູບ່ອນທີ່ຊ້າງຢູ່ອາໄສ.

ເສີນໝິງຢົງຄິດວ່າ,​ ເບິ່ງຈາກໄລຍະໄກ, ການອະນຸຮັກຊ້າງປ່າອາຊີ, ໄດ້ເຮັດໃຫ້ຄົນກັບຊ້າງກົມກຽວກັນ, ໃນເຂດດັ້ງເດີມທີ່ມີການເຄື່ອນໄຫວຂອງຊ້າງປ່າອາຊີກໍ່ສ້າງຖິ່ນຖານອາໄສໃຫ້ພວກມັນ, ຊຸກຍູ້ການປັບປຸງຂອງ《ຂໍ້ກຳນົດຂອງເຂດອະນຸຮັກທຳມະຊາດ》, ສົ່ງເສີມການກໍ່ສ້າງສວນສາທາລະນະແຫ່ງຊາດຂອງຊ້າງປ່າອາຊີຢ່າງຕັ້ງໜ້າ.

ມາຈາກ: ສຳນັກຂ່າວຊິນຮວາຂອງຈີນ

ນັກຂ່າວ: ຈ້າວເພ້ຍລານ ຫູຊຽວ ສວນໜິ້ນ