ທ່ານຫຼີເຄີ້ສຽງເຂົ້າຮ່ວມກອງປະຊຸມສຸດຍອດຄູ່ຮ່ວມມືເພື່ອເປົ້າໝາຍໂລກສີຂຽວ 2030 ຄັ້ງທີ2
ວັນທີ 30 ພຶດສະພານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ກ່າວຄຳປາໄສໃນກອງປະຊຸມສຸດຍອດຄູ່ຮ່ວມມືເພື່ອເປົ້າໝາຍໂລກສີຂຽວ 2030 ຄັ້ງທີ2ຜ່ານທາງວິດີໂອ.
ທ່ານຫຼີເຄີ້ສຽງກ່າວເນັ້ນວ່າ: ສີຂຽວເປັນປັດໄຈຕັດສິນຜົນງານດ້ານການພັດທະນາໃນອະນາຄົດ. ຈີນຍິນດີຮ່ວມກັບບັນດາຝ່າຍແກະແຂນກັນ ຊຸກຍູ້ການຟື້ນຟູແບບສີຂຽວເພື່ອຮ່ວມກັນສ້າງອະນາຄົດທີ່ດີງາມກວ່າເກົ່າໃຫ້ແກ່ມວນມະນຸດ.
ທ່ານຫຼີເຄີ້ສຽງໄດ້ມີຂໍ້ສະເໜີ 3 ຂໍ້ຄື: ໜຶ່ງແມ່ນສາມັກຄີປະສານງານກັນ, ຮ່ວມກັນເອົາຊະນະໃນບັ້ນສະກັດກັ້ນແລະຕໍ່ຕ້ານພະຍາດໂຄວິດ-19ໃນທົ່ວໂລກ. ພວກເຮົາຄວນເພີ່ມທະວີການຮ່ວມມືສາກົນເພື່ອຕ້ານກັບພະຍາດ, ປັບປຸງລະບົບບໍລິຫານສາທາລະນະສຸກຂອງໂລກໃຫ້ສົມບູນຂຶ້ນຕື່ມອີກ. ສອງແມ່ນຫັນປ່ຽນແນວຄິດ, ຊຸກຍູ້ການຫັນປ່ຽນຮູບການພັດທະນາແບບສີຂຽວແລະກາກບອນຕ່ຳ. ໃນເວລາຟື້ນຟູເສດຖະກິດຫຼັງເກີດມີສະພາບພະຍາດໂຄວິດ-19, ບັນດາປະເທດຄວນກຳແໜ້ນກາລະໂອກາດໃໝ່ຕ່າງໆເຊັ່ນ:ເລັ່ງຂະບວນການຫັນເປັນດິຈິຕອນໃຫ້ໄວຂຶ້ນ,ກະຕຸກຊຸກຍູ້ພະລັງແຮງໃໝ່ໃນການຂັບເຄື່ອນການພັດທະນາແລະອື່ນໆເພື່ອຊຸກຍູ້ການພັດທະນາດ້ວຍຄຸນນະພາບສູງ. ສາມແມ່ນຄຳນຶງເຖິງຄວາມຫຍຸ້ງຍາກພິເສດຂອງປະເທດພວມພັດທະນາ. ປະຊາຄົມໂລກຄວນຍຶດໝັ້ນໃນຫຼັກການ “ຮ່ວມກັນແຕ່ມີໜ້າທີ່ຮັບຜິດຊອບຕ່າງກັນ”, ໃຫ້ຄວາມສຳຄັນຢ່າງສູງຕໍ່ຄວາມສົນໃຈແລະຄວາມຮຽກຮ້ອງຕ້ອງການຂອງປະເທດພວມພັດທະນາ, ຄວນປົກປັກຮັກສາລະບົບລະບຽບການການຄ້າຫຼາຍຝ່າຍທີ່ຖືອົງການການຄ້າໂລກເປັນແກນກາງ.