ທ່ານສີຈິ້ນຜິງ: ໄວຄະນອງທີ່ສະຫງ່າລາສີຍ້ອນການຝຶກຝົນຫຼໍ່ຫຼອມ, ຄຸນຄ່າຂອງຊີວິດໄດ້ຖືກຍົກສູງຂຶ້ນຍ້ອນການສູ້ຊົນ
ວັນທີ 7 ມິຖຸນາປີ2021, ນັກຮຽນຈີນ 10,78 ລ້ານຄົນໄດ້ຍ່າງເຂົ້າຫ້ອງສອບເສັງສຳລັບການເສັງເຂົ້າມະຫາວິທະຍາໄລ.
ໃນລະດູໜາວປີ1977, ຈີນໄດ້ຟື້ນຟູລະບຽບການສອບເສັງເຂົ້າມະຫາວິທະຍາໄລຄືນໃໝ່, ການຮັບສະໝັກນັກຮຽນເພື່ອເຂົ້າຮຽນຢູ່ສະຖາບັນການສຶກສາຊັ້ນສູງໃນທົ່ວປະເທດຈີນໄດ້ໃຊ້ຮູບການສອບເສັງຢ່າງເປັນເອກະພາບກັນເພື່ອຄັດເລືອກເອົາຜູ້ມີຄວາມຮູ້ຄວາມສາມາດເຂົ້າຮຽນຢູ່ມະຫາວິທະຍາໄລ.
ບັດເຂົ້າຫ້ອງສອບເສັງສຳລັບການເສັງເຂົ້າມະຫາວິທະຍາໄລປີ1977
ໃນໃຈຂອງຜູ້ທີ່ມີປະສົບການຕົວຈິງຈຳນວນຫຼວງຫຼາຍເຫັນວ່າ: ລະດູໜາວ ປີ1977 ເປັນລະດູໜາວທີ່ມີຄວາມກະຕືລືລົ້ນ.
ຜູ້ຄົນຈຳນວນ 5,7 ລ້ານຄົນທີ່ມີຊີວະປະຫວັດຕ່າງກັນ, ມີອາຍຸຫຼຸດລື່ນກັນຫຼາຍ ແລະມີສະຖານະພາບແຕກຕ່າງກັນນັ້ນໄດ້ຫຼັ່ງໄຫຼຍ່າງເຂົ້າຫ້ອງສອບເສັງ ເຊິ່ງເປັນຂີດໝາຍສະແດງໃຫ້ເຫັນວ່າ ຍຸກສະໄໝທີ່ສາມາດປ່ຽນແປງຊາຕາກຳຂອງຕົນດ້ວຍການແຂ່ງຂັນຢ່າງຍຸຕິທຳນັ້ນໄດ້ມາເຖິງແລ້ວ. ນັບແຕ່ນັ້ນມາ, ຄົນຈີນນັບເປັນພັນເປັນໝື່ນໄດ້ຝາກຄວາມມຸ້ງຫວັງແລະຄວາມໃຝ່ຝັນຂອງຕົນໄວ້ກັບ “ການສອບເສັງເຂົ້າມະຫາວິທະຍາໄລ”.
ບັດເຂົ້າຫ້ອງສອບເສັງສຳລັບການເສັງເຂົ້າມະຫາວິທະຍາໄລປີ1977
ບັດເຂົ້າຫ້ອງສອບເສັງປີ1977ຄືກັບການບອກເລົ່າຢ່າງງຽບໆກ່ຽວກັບການບຸກບືນສູ້ຊົນຂອງຄົນລຸ້ນໜຶ່ງຢູ່ບາດລ້ຽວປະຫວັດສາດ.
ນີ້ຄືຄວາມຊົງຈຳແບບລວມໝູ່ຂອງຄົນລຸ້ນໜຶ່ງ. ທ້າວຫຼິວຊ້ຽງ ຜູ້ສອບເສັງເຂົ້າມະຫາວິທະຍາໄລລຸ້ນປີ1977ຂອງແຂວງຊ່ານຕຸ່ງໄດ້ພັນລະນາກ່ຽວກັບສະພາບການສອບເສັງໃນເວລານັ້ນດ້ວຍຄຳທີ່ວ່າ “ແບບບໍ່ເຄີຍມີມາກ່ອນ”: “ພໍ່ກັບລູກ, ແມ່ກັບລູກສາວ, ອ້າຍເອື້ອຍນ້ອງ, ອາຈານກັບນັກຮຽນ, ຄູ່ຜົວເມຍຈຳນວນບໍ່ໜ້ອຍໄດ້ຮ່ວມກັນຍ່າງເຂົ້າຫ້ອງສອບເສັງດຽວກັນ. ເມືອງທີ່ຂ້າພະເຈົ້າດຳລົງຊີວິດຢູ່ໃນເວລານັ້ນມີປະຊາກອນ 900.000 ກວ່າຄົນ, ຜູ້ເຂົ້າຮ່ວມການສອບເສັງມີຢ່າງຫຼວງຫຼາຍ, ແຕ່ໃນທີ່ສຸດ ຜູ້ທີ່ເສັງໄດ້ແລະຜ່ານການກວດກາສຸຂະພາບແລ້ວສາມາດເຂົ້າຮຽນຢູ່ມະຫາວິທະຍາໄລນັ້ນມີບໍ່ຮອດ 50 ຄົນ.”
ບັດເຂົ້າຫ້ອງສອບເສັງສຳລັບການເສັງເຂົ້າມະຫາວິທະຍາໄລປີ1977
ໃນລະດູໜາວທີ່ຟົດຟື້ນໃນປີນັ້ນ, ບໍ່ພຽງແຕ່ເປັນບາດລ້ຽວຂອງຊາຕາກຳສ່ວນບຸກຄົນເທົ່ານັ້ນ. ຕາມສະຖິຕິ, ພາຍໃນເວລາ 3 ປີຫຼັງຈາກຈີນຟື້ນຟູລະບຽບການສອບເສັງເຂົ້າມະຫາວິທະຍາໄລ, ມີຜູ້ມີຄວາມຮູ້ຄວາມສາມາດ 900.000 ກວ່າຄົນໄດ້ເຕີບໃຫຍ່ກາຍເປັນກຳລັງຫຼັກແຫຼ່ງຢູ່ທຸກຂະແໜງການ, ຄົນເຫຼົ່ານີ້ໄດ້ກາຍເປັນກຳລັງແຮງສຳຄັນໃນການຊຸກຍູ້ວຽກງານການປະຕິຮູບແລະເປີດປະຕູສູ່ພາຍນອກໃນໄລຍະຖັດມາ.
ລະດູໜາວທີ່ຟົດຟື້ນໃນປີນັ້ນໄດ້ເປັນການຢ່ວງບາດກ້າວເຂົ້າສູ່ລະດູບານໃໝ່ທີ່ດອກໄມ້ເບັ່ງບານສວຍງາມ. ການຟື້ນຟູລະບຽບການສອບເສັງເຂົ້າມະຫາວິທະຍາໄລ ບໍ່ພຽງແຕ່ໄດ້ຟື້ນຟູກຽດສັກສີຂອງຄວາມຮູ້ເທົ່ານັ້ນ, ທັງເປັນ “ໄມ້ງັດດ້ານພຶດຕິກຳຕົວຈິງ”ທີ່ຊຸກຍູ້ການປົດປ່ອຍແນວຄິດ, ການປະຕິຮູບແລະການເປີດປະຕູສູ່ພາຍນອກອີກດ້ວຍ. ພະລັງແຮງຂອງຄົນ, ສະຕິປັນຍາຂອງຄົນ, ຄຸນຄ່າຂອງຄົນໄດ້ຖືກສະແດງອອກມາໃຫ້ເຫັນຢ່າງໂດດເດັ່ນ, ການສູ້ຊົນຂອງບຸກຄົນນັບເປັນພັນເປັນໝື່ນໄດ້ຂຽນປະຫວັດສາດໜ້າໃໝ່ທີ່ຍິ່ງໃຫຍ່ສະຫງ່າງາມ.