ວັນທີ 15 ມິຖຸນາແມ່ນວັນລະນຶກການສ້າງຕັ້ງອົງການຮ່ວມມືຊຽງໄຮ້ຄົບຮອບ 20 ປີ. ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານຈ້າວລີຈ່ຽນ ໂຄສົກກະຊວງການຕ່າງປະເທດຈີນກ່າວວ່າ, ຕະຫຼອດໄລຍະ 20 ປີມານີ້, ອົງການຮ່ວມມືຊຽງໄຮ້ສາມາດຜ່ານຜ່າການປ່ຽນແປງຂອງສະຖານະການໂລກໄດ້ທຸກຄັ້ງ ແລະໄດ້ຊອກເຫັນເສັ້ນທາງກ່ຽວກັບການຊຸກຍູ້ການຮ່ວມມືແລະການພັດທະນາກັບອົງການຈັດຕັ້ງພາກພື້ນແລະສາກົນແບບໃໝ່ຢ່າງສຳເລັດຜົນ, ໄດ້ເສີມຂະຫຍາຍບົດບາດທີ່ມີລັກສະນະສ້າງສັນທີ່ສຳຄັນໃນການຊຸກຍູ້ໃຫ້ພາກພື້ນມີສະຖຽນລະພາບ ຄວາມໝັ້ນຄົງ ການພັດທະນາແລະຄວາມຈະເລີນຮຸ່ງເຮືອງ, ແລະເປັນການຊອກເຫັນພຶດຕິກຳຕົວຈິງທີ່ສຳຄັນໃນການສ້າງການພົວພັນສາກົນແບບໃໝ່ແລະການສ້າງປະຊາຄົມຮ່ວມຊາຕາກຳຂອງມວນມະນຸດ.
ທ່ານຈ້າວລີຈ່ຽນຊີ້ອອກວ່າ, ອົງການຮ່ວມມືຊຽງໄຮ້ໄດ້ກາຍເປັນແບບຢ່າງຂອງລັດທິຫຼາຍຝ່າຍ, ໂດຍອົງການນີ້ໄດ້ຍຶດໝັ້ນໃນການປົກປັກຮັກສາຄວາມຍຸດຕິທຳແລະຄວາມເປັນທຳໃນສາກົນ, ໄດ້ສົ່ງສຽງຂອງຕົນຢ່າງແຂງແຮງໃນການປົກປ້ອງລັດທິຫຼາຍຝ່າຍ, ຄັດຄ້ານລັດທິຝ່າຍດຽວແລະລັດທິປົກປ້ອງ, ໄດ້ສະແດງໃຫ້ເຫັນເຖິງຫຼັກໝັ້ນຂອງຕົນຢ່າງຈະແຈ້ງໃນການຊຸກຍູ້ການສ້າງຄວາມສາມັກຄີເພື່ອຮ່ວມກັນຕ້ານກັບພະຍາດໂຄວິດ-19 ແລະຄັດຄ້ານການຖືບັນຫາພະຍາດເປັນບັນຫາການເມືອງ, ໄດ້ສະເໜີແຜນການຂອງຕົນໃນການແກ້ໄຂບັນຫາຈຸດສຸມຂອງພາກພື້ນໂດຍທາງການເມືອງ, ຢູ່ໃນອົງການຮ່ວມມືຊຽງໄຮ້, ປະເທດສັງເກດການແລະຄູ່ສົນທະນາໄດ້ມີການປະສານສົມທົບກັນຢ່າງແໜ້ນແຟ້ນ, ດຳເນີນການຮ່ວມມືຢ່າງກວ້າງຂວາງກັບອົງການສະຫະປະຊາຊາດ, ອາຊຽນ ແລະອົງການຈັດຕັ້ງສາກົນແລະພາກພື້ນຕ່າງໆ ເພື່ອຮ່ວມກັນຊຸກຍູ້ລະບຽບສາກົນໃຫ້ກ້າວເດີນໄປຕາມທິດທາງທີ່ຍຸດຕິທຳແລະສົມເຫດສົມຜົນກວ່າເກົ່າ.