ອົງການກິດຈະການການບິນອະວະກາດບັນທຸກຄົນຂອງຈີນແຈ້ງໃຫ້ຮູ້ວ່າ, ນັກບິນອະວະກາດ 3 ທ່ານ ຄື: ທ່ານເນ້ໄຫເຊີ້ງ, ທ່ານລີວໂປ໋ມີງ ແລະ ທ່ານທ່າງຮົງໂປ່ຈະຖືກສົ່ງຂຶ້ນໄປກັບຍານອະວະກາດບັນທຸກຄົນ “ເຊີນໂຈ່ວເລກ12” ສູ່ຫ້ອງແກນກາງທ່ຽນເຮີຂອງສະຖານີອະວະກາດໃນເວລາ 9 ໂມງ 22 ນາທີຂອງວັນທີ 17 ມິຖຸນານີ້. ຕາມແຜນການ, ນັກບິນອະວະກາດຈະປະຕິບັດພາລະກິດຢູ່ໃນອະວະກາດເປັນເວລາ 3 ເດືອນ.
ໃນກອງປະຊຸມຂ່າວທີ່ຈັດຂຶ້ນໃນຕອນເຊົ້າວັນທີ 16 ມິຖຸນານີ້, ທ່ານຈີ້ສີມີງ ຜູ້ຊ່ວຍຫົວໜ້າຫ້ອງການອົງການການບິນອະວະກາດບັນທຸກຄົນຂອງຈີນໄດ້ແນະນຳວ່າ, ໂດຍເປັນການບິນອະວະກາດບັນທຸກຄົນເທື່ອທຳອິດໃນໄລຍະສ້າງສະຖານີອະວະກາດຂອງຈີນ, ພາລະກິດການບິນອະວະກາດບັນທຸກຄົນຂອງຍານອະວະກາດ “ເຊີນໂຈ່ວເລກ12” ເທື່ອນີ້ສຳຄັນທີ່ສຸດ. ເມື່ອເບິ່ງຈາກສະພາບການລວມແລ້ວ, ການບິນອະວະກາດບັນທຸກຄົນຂອງຍານອະວະກາດ “ເຊີນໂຈ່ວເລກ12” ມີຈຸດພິເສດ 4 ຢ່າງ, ຄື:
ໜຶ່ງ, ຈະເປັນການຢືນຢັນສະມັດຖະນະຂອງລະບົບການບິນອະວະກາດບັນທຸກຄົນລະຫວ່າງໜ່ວຍໂລກ ກັບ ອະວະກາດຕື່ມອີກ. ສອງ, ຈະເປັນການຢືນຢັນການຮັບປະກັນດ້ານເຕັກນິກໃນການປະຕິບັດພາລະກິດພັກຢູ່ອະວະກາດເປັນເວລາດົນຂອງນັກບິນອະວະກາດຢ່າງຮອບດ້ານ. ສາມ, ຈະເປັນການຢືນຢັນຄວາມສາມາດເຄື່ອນໄຫວຂອງນັກບິນອະວະກາດ ກັບ ແຂນກົນຈັກໃນເວລາອອກນອກສະຖານີ ແລະ ປະຕິບັດງານຢູ່ນອກສະຖານີຕາມວົງໂຄຈອນ. ສີ, ຈະເປັນການຢືນຢັນຄວາມສາມາດໃນການຄົ້ນຄວ້າ ແລະ ການກັບຄືນສູ່ສະຖານທີ່ລົງຈອດພາກພື້ນດິນຕົ່ງເຟີ່ງເປັນເທື່ອທຳອິດ.
ທ່ານຈີ້ສີມີງໄດ້ແນະນຳວ່າ, ອີງຕາມແຜນການກໍ່ສ້າງສະຖານີອະວະກາດ, ໃນປີນີ້ ແລະ ປີໜ້າຈະປະຕິບັດໜ້າທີ່ການບິນອະວະກາດ 11 ເທື່ອ, ເພື່ອເຮດໃຫ້ການກໍ່ສ້າງສະຖານີອະວະກາດຕາມໂຄຈອນສຳເລັດໃນປີ 2022 ແລະ ຈະສ້າງ ຫ້ອງທົດລອງອະວະກາດແຫ່ງຊາດຈີນໃຫ້ສຳເລັດ.