ວັນທີ18ມິຖຸນານີ້,ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວວ່າ: ຈີນຍິນດີພ້ອມກັບບັນດາປະເທດແລະເຂດແຄວ້ນທີ່ສຸມໃສ່ການນຳໃຊ້ອະວະກາດໃນທາງສັນຕິ,ດຳເນີນການແລກປ່ຽນແລະຮ່ວມມືສາກົນ, ເພື່ອປະກອບສ່ວນອັນຕັ້ງໜ້າໃຫ້ແກ່ມວນມະນຸດໃນການຊອກຄົ້ນຄວາມເລິກລັບທາງອະວະກາດ,ນຳໃຊ້ອະວະກາດໃນທາງສັນຕິ,ແລະຊຸກຍູ້ການສ້າງຕັ້ງປະຊາຄົມຮ່ວມຊາຕາກຳຂອງມວນມະນຸດ.
ຕາມຂ່າວແຈ້ງວ່າ,ປະຊາຄົມໂລກໄດ້ເອົາໃຈໃສ່ຢ່າງກວ້າງຂວາງຕໍ່ຈີນທີ່ສົ່ງຍານອະວະກາດ“ເຊີນໂຈ່12”ຢ່າງສຳເລັດຜົນເພື່ອສົ່ງນັກບິນອະວະກາດ3ຄົນເຂົ້າສູ່ສະຖານີອະວະກາດ, ພາກສ່ວນການບິນອະວະກາດຂອງຫຼາຍປະເທດໄດ້ສະແດງຄວາມຊົມເຊີຍຢ່າງສຸດໃຈຕໍ່ຈີນ. ບັນດາຝ່າຍໄດ້ວິຈານໂດຍເຫັນວ່າ: ການສົ່ງຍານອະວະກາດຢ່າງສຳເລັດຜົນຄັ້ງນີ້ໄດ້ສະແດງໃຫ້ເຫັນວ່າ ການຊອກຄົ້ນອະວະກາດຂອງຈີນໄດ້ຢວ່າງບາດກ້າວທີ່ສຳຄັນອີກກ້າວໜຶ່ງ,ເປັນການຢືນຢັນຄວາມໝັ້ນໃຈແລະຄວາມສາມາດທີ່ນັບມື້ນັບເພີ່ມຂຶ້ນໃນຂົງເຂດອະວະກາດຂອງຈີນ.
ທ່ານຈ້າວລີ້ຈ່ຽນກ່າວວ່າ, ການຊອກຄົ້ນອະວະກາດທີ່ກວ້າງໃຫຍ່ໄພສານແມ່ນຄວາມຝັນຮ່ວມຂອງມວນມະນຸດ ເຊິ່ງລວມທັງຈີນ. ການສ້າງຕັ້ງແລະເຮັດພາລິດຢູ່ສະຖານີອະວະກາດຂອງຈີນຈະເປັນການສະສົມເຕັກນິກແລະບົດຮຽນໄວ້ໃຫ້ມະນຸດໃນການຊອກຄົ້ນອະວະກາດຊັ້ນນອກ. ຈີນຍິນດີຮ່ວມກັບບັນດາປະເທດແລະເຂດແຄວ້ນທີ່ສຸມໃສ່ການນຳໃຊ້ອະວະກາດໃນທາງສັນຕິ,ດຳເນີນການແລກປ່ຽນແລະຮ່ວມມືສາກົນ,ເພື່ອປະກອບສ່ວນອັນຕັ້ງໜ້າໃຫ້ແກ່ມວນມະນຸດໃນການຊອກຄົ້ນຄວາມເລິກລັບທາງອະວະກາດ,ນຳໃຊ້ອະວະກາດໃນທາງສັນຕິ,ແລະຊຸກຍູ້ການສ້າງຕັ້ງປະຊາຄົມຮ່ວມຊາຕາກຳຂອງມວນມະນຸດ.